মুখ্য মন্ত্ৰী সৰ্বানন্দ সোণোৱালে আজি যোৰহাট আৱৰ্ত ভৱনৰ সভাকক্ষত যোৰহাট জিলা চেম্বাৰ্ছ অৱ কমাৰ্ছ অৱ কমাৰ্চৰ সদস্যসকলৰ সৈতে এখন বৈঠকত মিলিত হয়।
বৈঠকত কোভিড-১৯ সৃষ্ট ল’কডাউনৰ পৰৱৰ্তী সময়ছোৱাত ব্যৱসায়ীসকলে সন্মুখীন হোৱা বিভিন্ন সমস্যাৰ সন্দৰ্ভত আলোচনা কৰা হয়।
চেম্বাৰ্ছ অৱ কমাৰ্চৰ সদস্যসকলে ল’কডাউনৰ পৰৱৰ্তী পৰ্যায়ত তেওঁলোক সন্মুখীন হোৱা বিভিন্ন সমস্যা সম্পৰ্কত মুখ্য মন্ত্ৰীক অৱগত কৰে।
বৈঠকত সোণোৱালে কয় যে ল’কডাউনৰ পৰৱৰ্তীকালত ব্যৱসায়ীসকলে সন্মুখীন হোৱা সমস্যাসমূহৰ বাস্তৱ সমাধানৰ বাবে ৰাজ্য চৰকাৰে পদক্ষেপ গ্ৰহণ কৰিব।
বৈঠকত মৰিয়নি চেম্বাৰ্ছ অৱ কমাৰ্চে যোৰহাটৰ পৰা মৰিয়নি নগৰলৈ এ এছ টি চি বাছ সেৱাৰ সংখ্যা বৃদ্ধি কৰিবলৈ যাৱতীয় পদক্ষেপ ল’বলৈ অনুৰোধ জনায়।
মুখ্য মন্ত্ৰীয়ে কয় যে, যাত্ৰীৰ চাহিদা অনুসৰি এ এছ টি চি বাছ সেৱা বৃদ্ধি কৰাৰ বাবে যাৱতীয় পদক্ষেপ গ্ৰহণ কৰা হ’ব। তেওঁ লগতে কয় যে, কোভিড-১৯ মহামাৰীৰ স্বত্তেও জিলাখনত অৰ্থনৈতিক কাম-কাজ অব্যাহত ৰখা হৈছে।
অৰ্থনৈতিক কাম-কাজৰ সমান্তৰালভাৱে কোভিড-১৯ৰ বিৰুদ্ধে যুঁজ দি যাব লাগিব বুলিও মুখ্য মন্ত্ৰী সোণোৱালে লগতে কয়।
