তিনিচুকীয়াৰ বাঘজানৰ তৈলক্ষেত্ৰত গেছ নিৰ্গত হোৱা সন্দৰ্ভত কেন্দ্ৰীয় পেট্ৰ’লিয়াম মন্ত্ৰী ধৰ্মেন্দ্ৰ প্ৰধানৰ সৈতে মুখ্য মন্ত্ৰী সৰ্বানন্দ সোণোৱালে আজি টেলিফোনিক বাৰ্তালাপ কৰে।
বাৰ্তালাপৰ সময়ত সোণোৱালে ঘটনা সন্দৰ্ভত সবিশেষ কেন্দ্ৰীয় মন্ত্ৰী গৰাকীক অৱগত কৰে।
এই ঘটনাৰ তাৎক্ষণিকভাৱে প্ৰতিৰোধৰ ব্যৱস্থা ল’বলৈ কেন্দ্ৰীয় মন্ত্ৰীগৰাকীক মুখ্য মন্ত্ৰীয়ে আহ্বান জনায়।
কেন্দ্ৰীয় মন্ত্ৰী গৰাকীয়ে এই ক্ষেত্ৰত তৎকালীন পদক্ষেপ গ্ৰহণ কৰা হ’ব বুলি আশ্বাস প্ৰদান কৰে।
বাঘজানৰ তৈলক্ষেত্ৰত গেছ নিৰ্গত হোৱা ঘটনা সন্দৰ্ভত মুখ্য মন্ত্ৰী সোণোৱালে অইল ইণ্ডিয়া লিমিটেডৰ অধ্যক্ষ তথা পৰিচালন সঞ্চালক সুশীল চন্দ্ৰ মিশ্ৰৰ সৈতেও টেলিফোনযোগে আলোচনা কৰে।
কাষৰীয়া অঞ্চলৰ জনসাধাৰণৰ স্বাস্থ্যৰ সুৰক্ষা নিশ্চিত কৰাৰ লগতে যিকোনো দুৰ্ঘটনা ৰোধ কৰাৰ স্বাৰ্থত প্ৰাকৃতিক গেছৰ এই নিৰ্গমন তৎকালে বন্ধ কৰাৰ বাবে প্ৰয়োজনীয় ব্যৱস্থা গ্ৰহণ কৰিবলৈ পৰিচালন সঞ্চালকগৰাকীক মুখ্য মন্ত্ৰী সোণোৱালে আহ্বান জনায়।
আনহাতে, মুখ্য মন্ত্ৰী সোণোৱালে অসম প্ৰদূষণ নিয়ন্ত্ৰণ পৰিষদৰ অধ্যক্ষ ৱাই সূৰ্যনাৰাণক ঘটনাস্থলীলৈ যোৱাৰ বাবে আজি নিৰ্দেশ দিয়ে।
কাইলৈ অইন ইণ্ডিয়া লিমিটেডৰ অধ্যক্ষ তথা পৰিচালন সঞ্চালক সুশীল চন্দ্ৰ মিশ্ৰৰ সৈতে অসম প্ৰদূষণ নিয়ন্ত্ৰণ পৰিষদৰ অধ্যক্ষগৰাকী ঘটনাস্থলীলৈ গৈ পৰিস্থিতিৰ বুজ লোৱাৰ লগতে তৎকালীন পদক্ষেপো গ্ৰহণ কৰিব।
