তামিলনাডুৰ ৰাজনীতিত এতিয়া তীব্ৰ চাঞ্চল্যৰ সৃষ্টি হৈছে। অল ইণ্ডিয়া আন্না দ্ৰাবিড় মুন্নেত্ৰা কাঝাগাম চমুকৈ এআইএডিএমকে দলৰ তিনিজন বিধায়কে পদত্যাগ কৰাৰ পিছতে এই ৰাজনৈতিক পৰিস্থিতি অধিক গৰম হৈ পৰিছে। এই তিনিজন বিধায়কে দলৰ পৰা পদত্যাগ কৰি মুখ্যমন্ত্ৰী থালাপথী বিজয়ৰ দল তামিলগা ভেট্ৰি কাজাগাম চমুকৈ টিভিকেত যোগদান কৰিছে। ইয়াৰ উপৰিও টিভিকে দলৰ এজন নেতাই দাবী কৰিছে যে অহা কেইটামান সপ্তাহৰ ভিতৰত দলটোৰ আৰু প্ৰায় আঠজন বিধায়কে পদত্যাগ কৰি তেওঁলোকৰ দলত যোগদান কৰিব পাৰে। এনে পৰিস্থিতিত ৰাজ্যখনৰ কেইবাখনো আসনত উপ-নিৰ্বাচন অনুষ্ঠিত হোৱাৰ সম্ভাৱনা প্ৰকট হৈ পৰিছে।
মুখ্যমন্ত্ৰী বিজয়ে এতিয়া কাংগ্ৰেছ বা আন কোনো সহযোগী দলৰ সমৰ্থন নোহোৱাকৈ অকলে নিজৰ চৰকাৰ চলাব বিচাৰে। তামিলনাডু বিধানসভা নিৰ্বাচনত বিজয়ৰ দলে ১০৮ খন আসনত জয়লাভ কৰিছিল আৰু একক সংখ্যাগৰিষ্ঠতা লাভ কৰিবলৈ তেওঁলোকক মাত্ৰ ১০ খন আসনৰ প্ৰয়োজন আছিল। বহু টনাটনিৰ পিছত কাংগ্ৰেছ, চিপিআই, চিপিআই এম, ভিচিকে আৰু আইইউএমএলৰ সমৰ্থনত বিজয়ে মুখ্যমন্ত্ৰী হিচাপে শপত গ্ৰহণ কৰিছিল। কিন্তু এতিয়া বিজয়ৰ পৰিকল্পনা হৈছে কাংগ্ৰেছৰ ওপৰত নিৰ্ভৰশীলতা হ্ৰাস কৰি নিজা বলত চৰকাৰ গঠন কৰা, যিটো কথাই সহযোগী দলসমূহৰ বাবে চিন্তাৰ কাৰণ হৈ পৰিছে। বৰ্তমান বিজয়ৰ চকু ৰাজ্যখনৰ চাৰিখন আসনত হ’বলগীয়া উপ-নিৰ্বাচনৰ ওপৰত আছে। এই আসনৰ সংখ্যা আৰু বৃদ্ধি পাব পাৰে কাৰণ এআইএডিএমকেৰ আন এজন বিধায়ক এচাক্কী চুবায়াইয়ো পদত্যাগ কৰাৰ সম্ভাৱনা আছে, যদিও বৰ্তমান তেওঁৰ পদত্যাগ পত্ৰখন স্পীকাৰে গ্ৰহণ কৰা নাই। হস্তলিখিত নোহোৱাৰ বাবেই তেওঁৰ টাইপ কৰা পদত্যাগ পত্ৰখন নাকচ কৰা হৈছিল, কিন্তু তেৱোঁ টিভিকে দলত যোগ দিব বুলি চৰ্চা চলিছে।
বিধানসভাত ফ্ল’ৰ টেষ্টৰ সময়ত ২৫ জন বিধায়কে বিজয়ৰ চৰকাৰক সমৰ্থন কৰিছিল। ইয়াৰ পিছৰে পৰা এই বিধায়কসকলৰ একাংশক কেবিনেটত অন্তৰ্ভুক্ত কৰা হ’ব বুলি চৰ্চা চলিছিল যদিও সহযোগী দলসমূহৰ হেঁচাৰ বাবে সেই পৰিকল্পনা বাতিল কৰিবলগীয়া হৈছিল। এতিয়া জানিব পৰা মতে, পদত্যাগ কৰা বিধায়কসকলে উপ-নিৰ্বাচনত টিভিকে দলৰ নিৰ্বাচনী প্ৰতীক হুইচেল মাৰ্ক লৈ নিৰ্বাচনত অৱতীৰ্ণ হ’ব। যদি তেওঁলোকে পুনৰ জয়লাভ কৰে, তেন্তে বিধানসভাত টিভিকেৰ বিধায়কৰ সংখ্যা বৃদ্ধি পাব আৰু তেওঁলোক সংখ্যাগৰিষ্ঠতাৰ সংখ্যাৰ অতি ওচৰ চাপি যাব। বৰ্তমান মুখ্যমন্ত্ৰী বিজয়ৰ হাতত ১০৭ জন বিধায়ক আছে। নিৰ্বাচনত বিজয়ে দুখন আসনত জয়ী হৈছিল যদিও পিছত এখন আসন এৰি দিছিল। যদি উপ-নিৰ্বাচন হ’বলগীয়া চাৰিওখন আসনতে টিভিকেই জয়লাভ কৰে, তেন্তে তেওঁলোকৰ বিধায়কৰ সংখ্যা ১১১ জন হ’ব। তথাপিও একক চৰকাৰ গঠনৰ বাবে তেওঁলোকক আৰু কেইজনমান বিধায়কৰ প্ৰয়োজন হ’ব। সেইবাবেই বিজয়ে বিচাৰিছে যে এআইএডিএমকেৰ আৰু কিছু বিধায়কে পদত্যাগ কৰি তেۆঁলোকৰ দলত যোগ দিয়ক, যাতে তেওঁলোকে কাংগ্ৰেছৰ সমৰ্থন অবিহনেই ভৱিষ্যতে চৰকাৰ চলাব পাৰে।
