চাঞ্চল্যকৰ ঘটনা! ৰে’লৰ শৌচাগাৰত উদ্ধাৰ শিশুৰ মৃতদেহ

মুম্বাইৰ লোকমান্য তিলক টাৰ্মিনাছত সংঘটিত হৈছে এক হৃদয়বিদাৰক ঘটনা। গোৰখপুৰৰ পৰা মুম্বাই অভিমুখী কুশনগৰ এক্সপ্ৰেছ ৰে’লৰ শৌচাগাৰত থকা ডাষ্টবিনৰ পৰা উদ্ধাৰ কৰা হৈছে ৫ বছৰীয়া কন্যা শিশুৰ মৃতদেহ। ঘটনা দেখি হতবাক যাত্ৰীসকল।

প্ৰাপ্ত তথ্য অনুসৰি, লোকমান্য তিলক টাৰ্মিনাছত ৰে’লখনৰ এ চি ক’চ বি-২ৰ বাথৰুমত মৃতদেহটো উদ্ধাৰ হয়। সন্দেহজনক পৰিস্থিতিত মৃতদেহটো শৌচাগাৰৰ ভিতৰত থকা ডাষ্টবিনত লুকুৱাই ৰখা হৈছিল। ঘটনাস্থলীত উপস্থিত যাত্ৰীসকলে ততাতৈয়াকৈ ৰে’ল কৰ্তৃপক্ষক খবৰ দিয়ে। পিছত আৰ পি এফ আৰু জি আৰ পিৰ দল উপস্থিত হৈ মৃতদেহটো জিম্মাত লৈ মৰণোত্তৰ পৰীক্ষাৰ বাবে ৰাজাৱদী হাস্পতাললৈ প্ৰেৰণ কৰে।

প্ৰাথমিক তদন্তত ইতিমধ্যে পোহৰলৈ আহিছে এক চাঞ্চল্যকৰ তথ্য। শিশুটিৰ ডিঙি কাটি হত্যা কৰা হৈছে বুলি আৰক্ষীয়ে নিশ্চিত কৰিছে। সূত্ৰ অনুসৰি, হত্যাত কোনো বহিৰাগত নহয়, শিশুটিৰ নিজৰ আত্মীয় জড়িত আছে। মৃত কন্যা শিশুটিৰ মাহীয়েকৰ ল’ৰা (ভাতৃ)ক প্ৰধান অভিযুক্ত হিচাপে সন্দেহ কৰা হৈছে।

বৰ্তমান জি আৰ পি আৰু আৰ পি এফে যৌথভাৱে গোচৰটো তদন্ত কৰি আছে বুলি জানিব পৰা গৈছে। এই ঘটনাই কুশনগৰ এক্সপ্ৰেছৰ যাত্ৰীসকলৰ মাজত তীব্ৰ আতংক আৰু উৎকণ্ঠা সৃষ্টি কৰিছে।