দুমাহ ধৰি নিৰুদ্দেশ হৈ আছে চীনৰ প্ৰতিৰক্ষা মন্ত্ৰী জেনেৰেল লি ছাংফু। যাৰ ফলশ্ৰুতিত এই গুৰুত্বপূৰ্ণ পদবীৰ পৰা অপসাৰিত হ’বলগীয়া হৈছে প্ৰতিৰক্ষা মন্ত্ৰীগৰাকী। চীনৰ সংবাদ মাধ্যমে প্ৰকাশ কৰিছে এই খবৰ।
চলিত বৰ্ষত এইদৰে পদবীৰ পৰা অপসাৰিত হোৱা চীনৰ দ্বিতীয়জন মন্ত্ৰী হৈছে লি। ইতিপূৰ্বে গত জুলাই মাহত কাৰ্যভাৰৰ পৰা অপসাৰণ কৰা হৈছিল প্ৰাক্তন বৈদেশিক মন্ত্ৰী কিন গেঙক।
মাৰ্চ মাহত কেবিনেট ৰিশ্বফেলৰ সময়ত প্ৰতিৰক্ষা মন্ত্ৰী হোৱা লি যোৱা ২৯ আগষ্টত ভাষণ দিয়াৰ পিছৰে পৰা নিৰুদ্দেশ হৈ আছে।
লক্ষণীয়ভাৱে কিন গেং আৰু লি ছাংফুৱে চীনৰ ৰাষ্ট্ৰপতি তথা শাসকীয় কমিউনিষ্ট পাৰ্টিৰ নেতা জিনপিঙৰ স্থিতিস্থাপকতাৰ বিষয়ে প্ৰশ্ন উত্থাপন কৰিছিল।
দুৰ্নীতিৰ পৰিণতিতে লিৰ নিৰুদ্দেশ আৰু অপসাৰণৰ হোৱা বুলি অনুমান কৰা হৈছে। অৱশ্যে ক্ষমতাধিষ্ঠ কমিউনিষ্ট পাৰ্টিৰ অনুসন্ধানকাৰী সংস্থাসমূহে লিৰ বিৰুদ্ধে অভিযোগ দাখিল কৰা হৈছে নে নাই সেই সন্দৰ্ভত এতিয়াও কোনো ঘোষণা কৰা নাই।
চীনৰ চৰকাৰী সংবাদ মাধ্যমই উল্লেখ কৰা মতে, লিক প্ৰতিৰক্ষা মন্ত্ৰী হিচাপে নিযুক্তি দিয়াৰ ফলত আমেৰিকাৰ সৈতে প্ৰতিৰক্ষা বাৰ্তালাপত প্ৰভাৱ পৰিছিল। কিয়নো তেওঁক ২০১৮ চনত ৱাশ্বিংটনৰ দ্বাৰা অনুমোদন জনোৱা হৈছিল।
লি আৰু কিন দুয়োগৰাকীকে ৰাজ্যিক পৰিষদ, চীনৰ মন্ত্ৰীসভা আৰু চৰকাৰী ক্ষমতাৰ পৰা বিতাড়ন কৰা হৈছে বুলিও দেশখনৰ চৰকাৰী সংবাদ মাধ্যমে প্ৰকাশ কৰিছে।
এনে পৰিস্থিতিত তেওঁলোকৰ ৰাজনৈতিক কেৰিয়াৰ কাৰ্যতঃ অন্ত পৰা বুলিব পাৰি যদিও তেওঁলোকে বিচাৰৰ সন্মুখীন হ’ব নে অন্যান্য আইনী নিষেধাজ্ঞাৰ সন্মুখীন হ’ব সেয়া স্পষ্ট নহয়।
