চীনৰ পিপলছ লিবাৰেচন আৰ্মীয়ে অৰুণাচল প্ৰদেশৰ উজনি চিয়াং জিলাৰ পৰা এজন ১৭ বছৰীয়া যুৱকক অপহৰণ কৰা ঘটনাটোৰ বিষয়ে অৱগত নহয় চীন। এই কথা সদৰি কৰিছে চীনৰ বৈদেশিক মন্ত্ৰালয়ে।
উল্লেখ্য যে অৰুণাচল প্ৰদেশৰ সাংসদ তাপিৰ গাওৱে মিৰাম টাৰন নামৰ এজন কিশোৰক মঙলবাৰে চিয়ুংলা অঞ্চলৰ অন্তৰ্গত লুংটা জোৰ অঞ্চলৰ পৰা পিপলছ লিবাৰেচন আৰ্মীয়ে (পিএলএ) অপহৰণ কৰিছে বুলি বিস্ফোৰক মন্তব্য কৰিছিল।
অপহৃত টাৰনৰ বন্ধু জনয় য়াইঙ পলাই সাৰিবলৈ সক্ষম হৈছিল আৰু পিএলএৰ দ্বাৰা টাৰণৰ অপহৰণৰ বিষয়ে কৰ্তৃপক্ষক অৱগত কৰিছিল বুলি গাওৱে সংবাদ মাধ্যমক জানিবলৈ দিছিল।
পিএলএয়ে টাৰনক অপহৰণ কৰাৰ অভিযোগৰ সন্দৰ্ভত প্ৰতিক্ৰিয়া প্ৰকাশ কৰি বেইজিংত চীনা বৈদেশিক মন্ত্ৰালয়ৰ মুখপাত্ৰজনে কয়, “মই এই পৰিস্থিতিৰ বিষয়ে অৱগত নহয়।”
ভাৰতীয় সেনাই সন্ধানহীন টাৰণক বিচাৰিবলৈ আৰু প্ৰতিষ্ঠিত প্ৰটোকল অনুসৰি তেওঁক ঘূৰাই দিবলৈ পিএলএৰ পৰা সহায় বিচাৰিছিল আৰু ইয়াৰ পিছতে চীনৰ বৈদেশিক মন্ত্ৰালয়ে এই বিষয়ে জ্ঞাত নহয় বুলি সঁহাৰি জনায়।
তেওঁলোকে কয় যে যেতিয়া ভাৰতীয় সেনাই টাৰণৰ বিষয়ে তথ্য লাভ কৰিছিল, তৎক্ষণাৎ হটলাইনৰ এক প্ৰতিষ্ঠিত প্ৰণালীৰ জৰিয়তে পিএলএৰ সৈতে যোগাযোগ কৰিছিল।
