যোৱা বছৰ জম্মু-কাশ্মীৰৰ পেহেলগামত হোৱা সন্ত্ৰাসবাদী আক্ৰমণৰ তদন্তত এক গুৰুত্বপূৰ্ণ তথ্য পোহৰলৈ আহিছে। এই আক্ৰমণৰ সময়ত সন্ত্ৰাসবাদীয়ে ব্যৱহাৰ কৰা এটা গো-প্ৰ’ হিৰো ১২ কেমেৰাৰ সূত্র বিচাৰি এতিয়া চীনৰ কাষ চাপিছে ভাৰতীয় তদন্তকাৰী সংস্থা এন আই এ। এই কেমেৰাটো চীনৰ এজন বিতৰকৰ জৰিয়তে যোগান ধৰা হৈছিল বুলি প্রাথমিক তদন্তত গম পোৱা গৈছে। যাৰ বাবে এই যন্ত্ৰটোৰ প্ৰকৃত গৰাকী আৰু ইয়াৰ বিক্ৰীৰ সম্পূৰ্ণ তথ্য বিচাৰি এন আই এ-এ চীন চৰকাৰক আনুষ্ঠানিকভাৱে অনুৰোধ জনাইছে।
একাংশ বিশেষ আদালতে চীনৰ ন্যায়িক কৰ্তৃপক্ষলৈ এখন পত্ৰ প্ৰেৰণ কৰিছে যাতে এই বিশেষ কেমেৰাটো কেনেকৈ সন্ত্ৰাসবাদীৰ হাতত পৰিল সেই সম্পৰ্কে সবিশেষ তথ্য লাভ কৰিব পৰা যায়। তদন্তকাৰী বিষয়াসকলে জনোৱা মতে এই কেমেৰাটোৰ ক্ৰমিক নম্বৰ হৈছে চি ৩৫০১-৩২-৫৪-৭১-৭০৬। সন্ত্ৰাসবাদীয়ে এই যন্ত্ৰটো আক্ৰমণৰ পূৰ্বে অঞ্চলটো নিৰীক্ষণ কৰিবলৈ আৰু তেওঁলোকৰ অভিযানৰ প্ৰস্তুতি চলাবলৈ ব্যৱহাৰ কৰিছিল বুলি সন্দেহ কৰা হৈছে। এই তথ্যই গোটেই আক্ৰমণটোৰ আঁৰৰ পৰিকল্পনা ফাদিল কৰাত সহায় কৰিব পাৰে।
যোৱা ২২ এপ্ৰিলত সংঘটিত হোৱা এই সন্ত্ৰাসবাদী আক্ৰমণৰ তদন্তৰ সময়ত আৰক্ষীয়ে বহুতো মোবাইল ফোন আৰু বৈদ্যুতিন সঁজুলি উদ্ধাৰ কৰিছিল। কিন্তু এই গো-প্ৰ’ কেমেৰাটোৱে তদন্তৰ ক্ষেত্ৰত এক নতুন মোৰ আনিছে। ইয়াৰ আগতে এন আই এ-এ নেদাৰলেণ্ডৰ গো-প্ৰ’ কোম্পানীৰ সৈতেও যোগাযোগ কৰিছিল যাতে এই যন্ত্ৰটো কেতিয়া আৰু কাৰ দ্বাৰা সক্ৰিয় কৰা হৈছিল সেই বিষয়ে জানিব পৰা যায়। এতিয়া চীনৰ পৰা লাভ কৰিবলগীয়া তথ্যই এই ভয়ংকৰ আক্ৰমণৰ সৈতে জড়িত ব্যক্তিসকলক চিনাক্ত কৰাত এক গুৰুত্বপূৰ্ণ ভূমিকা পালন কৰিব।
