প্ৰধানমন্ত্ৰী নৰেন্দ্ৰ মোদীয়ে শনিবাৰে দিল্লীত অনুষ্ঠিত ১৮ সংখ্যক ব্ৰিকছ সন্মিলনত অংশগ্ৰহণ কৰা ৰাষ্ট্ৰপতি, প্ৰতিনিধি আৰু আন্তঃৰাষ্ট্ৰীয় সংস্থাসমূহৰ বিষয়াসকলৰ সন্মানত এক বিশেষ ৰাজকীয় নৈশভোজৰ (গালা ডিনাৰ) আয়োজন কৰে। অৱশ্যে সেই নৈশভোজত এটা ডাঙৰ ছন্দপতন দেখা গৈছিল। ইতিমধ্যে আন্তঃৰাষ্ট্ৰীয় আৰু কূটনৈতিক মহলত ব্যাপক চৰ্চা লাভ কৰা প্ৰধানমন্ত্ৰীৰ আমন্ত্ৰণত আয়োজন কৰা এই অনুষ্ঠানত চীনৰ ৰাষ্ট্ৰপতি ছি জিনপিঙে অংশগ্ৰহণ কৰা নাছিল।
‘ভাৰত মণ্ডপম’ত অনুষ্ঠিত নৈশভোজত চীনৰ ৰাষ্ট্ৰপতিৰ অনুপস্থিতিৰ কোনো আনুষ্ঠানিক ব্যাখ্যা দিয়া হোৱা নাই। অৱশ্যে সূত্ৰৰ পৰা জানিব পৰা মতে, শীৰ্ষ সন্মিলনত কেইবাটাও কাৰ্যসূচীত অংশগ্ৰহণ কৰাৰ পিছত তেওঁ নিজৰ হোটেললৈ উভতি গৈ জিৰণি লয়।
আনহাতে, আবুধাবিৰ ক্ৰাউন প্ৰিন্স শ্বেখ খালেদ বিন মহম্মদে শীৰ্ষ সন্মিলন সম্পূৰ্ণ কৰি দেশলৈ উভতি যোৱা বাবে নৈশভোজত উপস্থিত থাকিব নোৱাৰিলে। অৱশ্যে ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু ব্ৰিকছ মিত্ৰজোঁটৰ অন্যান্য শীৰ্ষ নেতাসকলে আনন্দৰে এই নৈশভোজত অংশগ্ৰহণ কৰে।
ভাৰতৰ কেন্দ্ৰীয় মন্ত্ৰী অমিত শ্বাহ, নিৰ্মলা সীতাৰমণ, পীয়ুষ গোৱেল, অশ্বিনী বৈষ্ণৱ আৰু শিৱৰাজ সিং চৌহানৰ লগতে বিভিন্ন ৰাজ্যৰ কেইবাগৰাকীও মুখ্যমন্ত্ৰী উপস্থিত থাকে। লোকসভাৰ অধ্যক্ষ ওম বিৰলাৰ লগতে যোগী আদিত্যনাথ, দেৱেন্দ্ৰ ফাড়নৱীছ, শুভেন্দু অধিকাৰী, হিমন্ত বিশ্ব শৰ্মাৰ দৰে ব্যক্তিকো দেখা গৈছে।
নৈশভোজত নিমন্ত্ৰিত মন্ত্ৰীসকলৰ বাবে সুকীয়া সুকীয়া টেবুলৰ ব্যৱস্থা কৰা হৈছিল, য’ত বিশ্ব মঞ্চৰ প্ৰতিনিধিসকলে তেওঁলোকৰ সৈতে সন্ধিয়াৰ আড্ডাত যোগ দিছিল। বহাৰ ব্যৱস্থা এনেদৰে সজোৱা হৈছিল যাতে অতিথিসকলে সুস্বাদু খাদ্য উপভোগ কৰিব পাৰে আৰু লগতে মুকলি পৰিৱেশত কূটনৈতিক আৰু দ্বিপাক্ষিক আলোচনাও কৰিব পাৰে।
গালা ডিনাৰ মেনুত পৰম্পৰাগত আৰু আধুনিক ভাৰতীয় নিৰামিষ খাদ্যৰ ব্যৱস্থা কৰা হৈছিল। মূল মেনুত আছিল খাণ্ডভি মিলে-ফেউইল, কুম্ভ গালোটি, পনীৰ লাবাবদাৰ, গুচি মাৰ্মিক, গাজৰ-বীন প’ৰিয়েল আৰু পুষ্টিকৰ বজ্ৰাৰ পোলাও। খাদ্যৰ শেষত ডেজাৰ্টটো আছিল পুৰণি দিল্লীৰ বিখ্যাত ফ্ৰুট ক্ৰীমৰ লগতে জিলেপি আৰু সুস্বাদু শ্বাহতুত ফিৰণি।
উল্লেখ্য যে ১২ আৰু ১৩ ছেপ্টেম্বৰত ভাৰতত অনুষ্ঠিত হোৱা এই ঐতিহাসিক ব্ৰিকছ সন্মিলনত মিত্ৰজোঁটৰ ১১খন সদস্য দেশ আৰু ১০খন সহযোগী দেশৰ শীৰ্ষ নেতাসকলৰ লগতে বিভিন্ন বিশ্বখ্যাত আন্তঃৰাষ্ট্ৰীয় সংস্থাৰ প্ৰতিনিধিয়ে অংশগ্ৰহণ কৰিছে।
