অসমৰ ভূমিপুত্ৰ চুতীয়া জনগোষ্ঠীক জনজাতিকৰণত বিলম্ব, স্বায়ত্ব শাসিত পৰিষদ প্ৰদান নকৰাত ক্ষোভিত হৈ পৰিছে চুতীয়া জনগোষ্ঠীৰ লোকসকল।
চৰকাৰৰ ভূমিকাত ক্ষোভ উজাৰি আজি টীয়ক আঞ্চলিক চুতীয়া ছাত্ৰ সন্থাই টীয়কৰ মাজ মজিয়াত ৩৭ নং ৰাষ্ট্ৰীয় ঘাইপথৰ ওপৰত অসমৰ মুখ্যমন্ত্ৰী সৰ্বানন্দ সোণোৱাল আৰু জনজাতি দপ্তৰৰ মন্ত্ৰী চন্দন ব্ৰহ্মৰ প্ৰতিকৃতি দাহ কৰি তীব্ৰ প্ৰতিবাদ সাব্যস্ত কৰে।
মৰাণ,মটক আৰু কোচ ৰাজবংশীসকলক যদি স্বায়ত্বশাসিত পৰিষদ প্ৰদান কৰিব পাৰে সমান্তৰালকৈ অসমৰ আদিম ভূমিপুত্ৰ চুতীয়া জনগোষ্ঠীক কিয় দিব নোৱাৰিব বুলি সংগঠনটোৱে প্ৰশ্ন উত্থাপন কৰিছে ।
চৰকাৰে এনে কাৰ্যৰ যোগেদি ছয় জনগোষ্ঠীৰ মাজত বিভাজনৰ সৃষ্টি কৰিবলৈ কৌশল ৰচনা কৰিছে বুলিও সংগঠনটোৱে অভিযোগ কৰিছে।
অহা বিধানসভা নিৰ্বাচনৰ আগতে ছয় জনগোষ্ঠীক জনজাতিকৰণ কৰিবলৈ সংগঠনটোৱে দাবী জনাইছে।
