ক’ৰ’ণাতংকৰ মাজতে প্ৰায় ৭ টা মাহৰ পিছত দেশৰ বিভিন্ন প্ৰান্তত চিনেমা হলসমূহ পুনৰ খোলাৰ বাবে প্ৰস্তুতি প্ৰায় সম্পূৰ্ণ কৰি তুলিছে।
উল্লেখ্য যে ক’ৰ’ণা প্ৰতিৰোধৰ বাবে যোৱা ২২ মাৰ্চত কেন্দ্ৰীয় চৰকাৰে দেশজুৰি বলৱৎ কৰা লকডাউনৰ সময়ৰে পৰা দেশৰ সকলোবোৰ চিনেমা হল বন্ধ হৈ আছে।
দেশত আনলক আৰম্ভ হোৱাৰ পৰাই দেশৰ চিনেমা হলসমূহ পুনৰ খোলাৰ সম্পৰ্কে যথেষ্ট চৰ্চা আৰু উৎকণ্ঠাৰ সৃষ্টি হোৱাৰ পৰিলক্ষিত হৈছিল।
ইফালে বৃহস্পতিবাৰৰ পৰা কেন্দ্ৰীয় চৰকাৰে কিছুমান নীতি নিৰ্দেশনা আৰু প্ৰট’কলৰ মাজেৰে মাল্টিপ্লেক্স চিনেমা হলসমূহ পুনৰ খুলিবলৈ অনুমতি প্ৰদান কৰিছে।
অৱশ্যে কেন্দ্ৰীয় গৃহ মন্ত্ৰণালয়ে এই সম্পৰ্কে ৰাজ্য চৰকাৰসমূহক শেষ সিদ্ধান্ত লোৱাৰ অধিকাৰ প্ৰদান দিছে।
অৰ্থাৎ ৰাজ্যসমূহে কেতিয়াৰ পৰা চিনেমা হলসমূহ পুনৰ খুলিব তাৰ সিদ্ধান্ত ৰাজ্য চৰকাৰসমূহে ল’ব পাৰিব। ইয়াৰ পিছতে দেশৰ কিছুসংখ্যক ৰাজ্যই চিনেমা হলসমূহ পুনৰ খোলাৰ সিদ্ধান্ত গ্ৰহণ কৰিছে।
ক’ৰ’ণাতংকৰ উৎকণ্ঠাৰ মাজতে দেশৰ কেবাখনো ৰাজ্যই চলিত সপ্তাহৰ পৰাই চিনেমা হলসমূহ পুনৰ খোলাৰ বাবে অনুমতি প্ৰদান কৰিছে।
সেই অনুসৰি দেশৰ মহাৰাষ্ট্ৰ, তামিলনাডু, কেৰালা, ছত্তিশগড় আৰু অসম আদি ৰাজ্যত চিনেমা হলসমূহ বন্ধ থাকিব যদিও উত্তৰ প্ৰদেশ, মধ্য প্ৰদেশ, দিল্লী আৰু গুজৰাট আদিকে কৰি কেবাখনো ৰাজ্য আৰু কেন্দ্ৰীয় শাসিত অঞ্চলত চলিত সপ্তাহৰ পৰাই চিনেমা হলবোৰ পুনৰ খোলা হ’ব।
ইফালে পিভিআৰ-এ জনাইছে দেশৰ ১০ খন ৰাজ্য আৰু চাৰিখন কেন্দ্ৰীয় শাসিত অঞ্চলত চলিত সপ্তাহৰ পিভিআৰ-এ চিনেমাৰ দৰ্শনী আৰম্ভ কৰিব।
উল্লেখ্য যে দেশৰ ৭১ চহৰত ১৭৬ টা পিভিআৰ মাল্টিপ্লেক্সত ৮৪৫ খন স্ক্ৰীণ আছে।