নাগৰিকত্ব বিধেয়কৰ বিৰুদ্ধে প্ৰতিবাদৰূপে মুখ্য মন্ত্ৰীৰ লগতে শাসকীয় বিজেপি নেতাসকলক ক’লা পতাকা দেখুওৱাৰ “অপৰাধ”ত ৰাজ্যজুৰি বিক্ষোভকাৰীক “গ্ৰেপ্তাৰ” আৰু নলবাৰীত কেইজনমান আছুকৰ্মীক থানাৰ ভিতৰতে প্ৰহাৰ কৰা ঘটনাৰ বাবে চৰকাৰৰ ক্ষমা প্ৰাৰ্থনা দাবী কৰিছে নাগৰিকত্ব আইন সংশোধনবিৰোধী মঞ্চই।
“নলবাৰীত বিজেপি নেতাৰ বিৰুদ্ধে ক’লা পতাকা প্ৰদৰ্শন কৰাৰ চেলুতে পুলিচে সদৌ অসম ছাত্ৰ সন্থাৰ কেইগৰাকীমান কৰ্মীক কেৱল মাৰ পিট কৰাই নহয়, বৰং সকলোকে আচৰিত কৰি শাসক দলৰ স্থানীয় নেতা আৰু কৰ্মীৰ দলে থানাত সোমাই পুলিচৰ সন্মুখতে আটক ছাত্ৰ কৰ্মীসকলক বেয়াকৈ মাৰ ধৰ কৰিছে বুলি প্ৰকাশ পাইছে।… এনে ঘটনাৰ বাবে চৰকাৰে ৰাইজৰ ওচৰত ক্ষমাভিক্ষা কৰক,” মঞ্চৰ হৈ মঙলবাৰে এই বিবৃতি অধ্যক্ষ হীৰেন গোহাঁইৰ।
বিজেপি নেতৃত্বাধীন চৰকাৰখনৰ কাৰ্য্যকলাপক গণতন্ত্ৰ তথা জনগণৰ স্বাৰ্থৰ বিৰুদ্ধে এক “ভয়াৱহ পদক্ষেপ” বুলি মঞ্চই অভিহিত কৰিছে।
“লগতে ৰাইজকো সোঁৱৰাই দিছো যে এনে কাৰ্য্যই চৰকাৰৰ বিৰুদ্ধে নিজৰ গণতান্ত্ৰিক প্ৰতিবাদ সাব্যস্ত কৰাৰ মৌলিক অধিকাৰকো নস্যাৎ কৰিছে,” মঞ্চৰ নেতা বৰ্ষীয়ান বুদ্ধিজীৱীগৰাকীৰ মন্তব্য।
এই দমনমূলক কাৰ্য্যকলাপৰ বিৰুদ্ধে চৰকাৰক সকীয়াই মঞ্চই লগতে কয় যে ই অতি ৰোমহৰ্ষক কাণ্ড। “গণতন্ত্ৰৰ বুনিয়াদী নীতিবোৰকে দমন কৰি এটা দলৰ হাতত প্ৰশাসন, পুলিচ সকলোকে গতাই দিয়াৰ লক্ষণ প্ৰকাশ কৰিছে।”