ৰাম জনমভূমি-বাবৰি মছজিদ গোচৰৰ উচ্চতম ন্যায়ালয়ে শনিবাৰে দিবলগীয়া ৰায়ৰ পূৰ্বে ৰাষ্ট্ৰীয় ৰাজধানী দিল্লীত সুৰক্ষা ব্যৱস্থা কটকটীয়া কৰি তোলা হৈছে।
ৰায়দানৰ পূৰ্বে উচ্চতম ন্যায়ালয়ৰ ন্যায়াধীশৰ সুৰক্ষা ব্যৱস্থাও বৃদ্ধি কৰি তোলা হৈছে।
অযোধ্যা গোচৰৰ ৰায়দান কৰিবলগীয়া বিচাৰপীঠত মুখ্য ন্যায়াধীশ ৰঞ্জন গগৈৰ সৈতে পাঁচগৰাকী ন্যায়াধীশ আছে।
মুখ্য ন্যায়াধীশ ৰঞ্জন গগৈক জেদ প্লাছ সুৰক্ষা প্ৰদান কৰা হৈছে।
বাকী ন্যায়াধীশকেইজনৰ লগতে তেওঁলোকৰ বাসগৃহকে ধৰি উচ্চতম ন্যায়ালয়ৰ চৌহদ তথা বাহিৰত সুৰক্ষা ব্যৱস্থা কটকটীয়া কৰি তোলা হৈছে।
সূত্ৰসমূহৰ পৰা জানিব পৰা মতে, উচ্চতম ন্যায়ালয়ৰ আভ্যন্তৰীণ কক্ষৰ সুৰক্ষা দিল্লী আৰক্ষীৰ সুৰক্ষা গোটক অৰ্পন কৰা হৈছে। উচ্চতম ন্যায়ালয়ৰ ভিতৰভাগত যি সুৰক্ষা থাকিব, সেয়া সুৰক্ষা গোটে নজৰ ৰাখিব।
উচ্চতম ন্যায়ালয়ৰ সমগ্ৰ অঞ্চলটো সুৰক্ষা ব্যৱস্থাৰে ঘেৰি তোলা হৈছে। ন্যায়ালয়খনলৈ যোৱা সকলো পথত সুৰক্ষা বৃদ্ধি কৰা হৈছে।
সন্দেহজনক লোকৰ ওপৰত নজৰ ৰখাৰ লগতে গোচৰৰ ৰায়টোৰ পূৰ্বে দিল্লী আৰক্ষীয়ে অতিৰিক্ত বাহিনীকো আমন্ত্ৰন কৰি আনিছে।