সকলো বৃত্তিৰ দৰে আইনজীৱিৰ পেছাতো ডাঙৰ প্ৰত্যাহ্বান আছে। অত্যাধুনিক প্ৰযুক্তিৰ ভিত্তিত জেট যুগত এই প্ৰত্যাহ্বানৰ মাত্ৰা বৃদ্ধি পাইছে। এই পৰিবেশত আইনী বৃত্তিত আশ্ৰয় লৈ জীৱন গঢ়িব বিচৰাসকলে সফলতাৰ বাবে কোনটো পথ অনুসৰণ কৰিব লাগে? সেই পথ দেখুৱাবলৈ উচ্চতম ন্যায়ালয়ৰ মুখ্য ন্যায়াধীশ সূৰ্য কান্তৰ ভাষণত ঠাই পালে সূৰ্য কুমাৰ যাদৱ আৰু যশপ্ৰীত বুমৰাহৰ কথা।
দেশৰ মুখ্য ন্যায়াধীশ সূৰ্য কান্তৰ ভাষাত ‘প্ৰতিজন খেলুৱৈয়ে সকলোতে পাৰদৰ্শী হ’ব নোৱাৰে। ডেথ অভাৰত সূৰ্য্য কুমাৰ যাদৱক কোনেও বলিং কৰা দেখা নাপাব। আকৌ বুমৰাহক ৰানৰ পিছত দৌৰা দেখা নাপাব। তেওঁলোকে যি কামত ভাল, ঠিক সেই কামটোৱে কৰে। এই ভিত্তিতে দলটো গঢ় লৈ উঠে। যিবোৰ দল সফল হয় তেওঁলোকে সেইবোৰ এই ধাৰণা লৈ নাযায় যে সকলোৱে সকলো কামতে পাৰদৰ্শী হ’ব লাগিব। মই পৰামৰ্শ দিম যে আপোনালোকৰ পেছাৰ ক্ষেত্ৰতো একে নীতি প্ৰযোজ্য।” গান্ধীনগৰত গুজৰাট ৰাষ্ট্ৰীয় আইন বিশ্ববিদ্যালয়ৰ সমাৱৰ্তন অনুষ্ঠানত এই মন্তব্য কৰে মুখ্য ন্যায়াধীশ সূৰ্য কান্তে।
মুখ্য ন্যায়াধীশগৰাকীয়ে কয়, “একেবাৰে সকলোতে সমানে চেষ্টা কৰি দেশৰ বিশিষ্ট অধিবক্তাসকলে এই স্থানত উপনীত হোৱা নাই। তেওঁলোকে সময়ৰ লগে লগে নীৰৱে নিজৰ চিন্তাধাৰা প্ৰসাৰিত কৰিছে।”
তেওঁৰ মতে আইনী পাঠ্যপুথিয়ে মতবাদমূলক বোধগম্যতা প্ৰদান কৰিলেও প্ৰকৃত অনুশীলনৰ বাবে অনুশাসন, দায়িত্ব আৰু ব্যৱহাৰিক সীমাবদ্ধতাৰ ভিতৰত কাম কৰাৰ ক্ষমতাৰ প্ৰয়োজন। তেওঁ গোটেই বিষয়টোক মানচিত্ৰ এখন বুজি পোৱা আৰু পৰৱৰ্তী সময়ত সেই মানচিত্ৰখন চাই নিজকে মোকাবিলা কৰাৰ সৈতেও তুলনা কৰে।
