নাগৰিকত্ব সংশোধনী বিধেয়ককলৈ ৰাজ্যৰ পৰিস্থিতি উত্তাল হৈ থকাৰ সময়তে শিৱসাগৰ নগৰত আজি অনা অসমীয়া ব্যৱসায়ীৰ হাতত কোচ ৰাজবংশী ছাত্ৰ সন্থাৰ নেতা অপমানিত হ’বলগীয়া হোৱা ঘটনাই নগৰখনত তীব্ৰ প্ৰতিক্ৰিয়াৰ সৃষ্টি কৰিছে।
ঘটনা বিৱৰণী মতে, শিৱসাগৰ নগৰৰ মাৰোৱাৰী পট্টীৰ আশাৰাম বাগৰী নামৰ ব্যৱসায়ীজনৰ ব্যৱসায়ী প্ৰতিষ্ঠানলৈ চিলাৰায় দিৱস উদযাপনৰ বাবে বৰঙণি বিচাৰি আজি আক্ৰাছুৰ শিৱসাগৰ জিলা সমিতিৰ কেইগৰাকীমান নেতা গৈছিল।
বৰঙণি বিচৰাকলৈ প্ৰতিষ্ঠানটোৰ স্বত্বাধিকাৰীৰ লগত আক্ৰাছুৰ তৰ্কাতৰ্কী হোৱাত প্ৰতিষ্ঠানটোৰ স্বত্বাধিকাৰী গৰাকীয়ে অসমীয়া জাতিকলৈ অপমানসূচক বক্তব্য কৰাৰ লগতে প্ৰতিষ্ঠানৰ চাটাৰ বন্ধ কৰি আক্ৰাছুৰ কৰ্মী কেইজনক প্ৰহাৰ কৰি হত্যাৰ চেষ্টা চলোৱাৰ অভিযোগ উত্থাপন কৰে সংগঠনটোৱে।
উক্ত ঘটনাক কেন্দ্ৰ কৰি আক্ৰাছুৰ সদস্যৰ লগতে আন আন জাতীয় সংগঠনসমূহে এক উত্তপ্ত পৰিস্থিতি সৃষ্টি কৰে।তেওঁলোকে মাৰোৱাৰীপট্টীৰ সকলো ব্যৱসায়ী প্ৰতিষ্ঠান বন্ধ কৰি দিয়াৰ লগতে শিৱসাগৰ সদৰ আৰক্ষী থানাত ব্যৱসায়ীজনৰ বিৰুদ্ধে এজাহাৰ দাখিল কৰি তেওঁক আটক কৰাৰ দাবীত ৰাজপথত বহি প্ৰতিবাদ সাব্যস্ত কৰে।
আনহাতে অভিযুক্ত ব্যৱসায়ীজনেও ঘটনাৰ সন্দৰ্ভত সংগঠনটোৰ বিৰুদ্ধে এজাহাৰ দাখিল কৰে বুলি জানিব পৰা গৈছে। আক্ৰাছুয়ে আৰক্ষীয়ে পক্ষপাতমূলক আচৰণ কৰাৰ অভিযোগ আনি দ’লমুখ চাৰিআলিত অৱস্থান ধৰ্মঘট কৰে।
