বিগত দুমাহ ধৰি মেডিকেল প্ৰৱেশ পৰীক্ষা NEETক লৈ উত্তাল হৈ পৰিছে ৰাষ্ট্ৰীয় ৰাজনীতি। প্ৰশ্নকাকত ফাদিল হোৱাৰ বাবে বাতিল কৰা হৈছিল পৰীক্ষা। সেই হতাশাৰ বাবেই কেইবাজনো ছাত্ৰ-ছাত্ৰীয়ে আত্মহত্যা কৰিছে। কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত ৰাজনৈতিক দলকে ধৰি জনসাধাৰণ ওলাই আহিছে। এনে পৰিস্থিতিত NEET সন্দৰ্ভত এটা ডাঙৰ সিদ্ধান্ত লোৱা হ’ব পাৰে। মূলতঃ কোচিং চেণ্টাৰৰ দপদপনি বন্ধ কৰা আৰু ছাত্ৰ-ছাত্ৰীৰ সঠিক মূল্যায়ন নিশ্চিত কৰিবলৈ নতুন পদক্ষেপ গ্ৰহণ কৰিব পাৰে।
NEET সন্দৰ্ভত দেশজোৰা বিতৰ্কৰ মাজতে শিক্ষা মন্ত্ৰালয়ে গঠন কৰিছে ৯ জনীয়া এখন সমিতি। যোৱা বছৰ গঠন হোৱা এই সমিতিৰ মূল উদ্দেশ্য হৈছে NEET বা Joint Entranceৰ দৰে পৰীক্ষা ব্যৱস্থা পৰীক্ষা কৰা।
শেহতীয়াভাৱে ছাত্ৰ-ছাত্ৰীসকলে এনে পৰীক্ষাত উত্তীৰ্ণ হ’বলৈ ব্যক্তিগত প্ৰশিক্ষণৰ ওপৰত সম্পূৰ্ণৰূপে নিৰ্ভৰশীল হৈ পৰিছে। কোচিং চেণ্টাৰত স্কুলৰ আৰ্হিতে অধ্যয়ন চলি আছে। সফলতাৰ তাড়নাৰ দৌৰত এই কোচিং চেণ্টাৰৰ পৰাও পৰীক্ষাৰ প্ৰশ্নকাকত ফাদিল হৈ আছে। কেন্দ্ৰীয় সমিতিয়ে এই বিষয়সমূহৰ ওপৰত বিবেচনা কৰি আছে।
সূত্ৰ অনুসৰি অহা কেইসপ্তাহমানৰ ভিতৰত এই কমিটীয়ে প্ৰতিবেদন দাখিল কৰিব পাৰে। ইয়াত পৰামৰ্শ দিয়া হ’ব যে ব’ৰ্ড পৰীক্ষাত পোৱা ৫০ শতাংশ নম্বৰ NEETৰ দৰে প্ৰতিযোগিতামূলক পৰীক্ষাৰ চূড়ান্ত ফলাফল নিৰ্ণয়ৰ বাবে বিবেচনা কৰা হ’ব।
অহা বছৰৰ পৰা অনলাইন হ’ব NEET। কম্পিউটাৰ ভিত্তিক পৰীক্ষাত পোৱা ৫০ শতাংশ নম্বৰ আৰু বিদ্যালয়ৰ দ্বাদশ শ্ৰেণীৰ পৰীক্ষাত লাভ কৰা ৫০ শতাংশ নম্বৰৰ ভিত্তিত চূড়ান্ত তালিকা প্ৰস্তুত কৰিবলৈ কমিটীয়ে পৰামৰ্শ দিব।
প্ৰসংগক্ৰমে NEET বাতিল হোৱাৰ পিছত তামিলনাডুৰ মুখ্যমন্ত্ৰী থালাপতি বিজয়ে এই পৰীক্ষা ব্যৱস্থা বিলুপ্ত কৰিব লাগে বুলি কৈছিল। ২০১৭ চনলৈকে তামিলনাডুত দ্বাদশ শ্ৰেণীৰ নম্বৰৰ ওপৰত ভিত্তি কৰি চিকিৎসা বিজ্ঞানৰ নামভৰ্তি কৰা হৈছিল। তাৰ পিছত কেন্দ্ৰই ৰাজ্যত NEET বাধ্যতামূলক কৰিলে। ইয়াৰ প্ৰতিবাদত তামিলনাডুৱে সৰ্বসন্মতিক্ৰমে বিধেয়কখন গৃহীত কৰে। কিন্তু ৰাষ্ট্ৰপতিয়ে তাত সন্মতি নিদিলে। অৱশ্যে এইবাৰ কেন্দ্ৰীয় সমিতিয়ে বিজয়ৰ দাবীৰ আধা পূৰণ কৰিব পাৰে। সেই পৰামৰ্শ কাৰ্যকৰী হ’বনে?
