ৰাষ্ট্ৰীয় নাগৰিকপঞ্জীৰ চূড়ান্ত খচৰা প্ৰকাশৰ পাছত খচৰাত বাদ পৰা লোকসকলে দাখিল কৰিব লগীয়া নথি সন্দৰ্ভত এন আৰ চিৰ ৰাজ্যিক সমন্বয়ক প্ৰতীক হাজেলাই দিয়া পৰামৰ্শক লৈ ৰাজ্যৰ বিভিন্ন দল-সংগঠনৰ মাজত তীব্ৰ প্ৰতিক্ৰিয়াৰ সৃষ্টি হৈছে। এই ক্ষেত্ৰত প্ৰতীক হাজেলাক বিভিন্নজনে কঠোৰ সমালোচনা কৰাৰ বিপৰীতে এই পৰামৰ্শক লৈ সন্তুষ্টি ব্যক্ত কৰিলে আসাম পাব্লিক ৱৰ্কছে।
শনিবাৰে দিচপুৰ প্ৰেছ ক্লাবত এখন সংবাদমেলত এই পৰামৰ্শসমূহৰ কথা উত্থাপন কৰি আসাম পাব্লিক ৱৰ্কছৰ সভাপতি অভিজিৎ শৰ্মাই মূলতঃ শৰণাৰ্থীৰ পঞ্জীয়ন প্ৰমাণপত্ৰ অগ্ৰাহ্য কৰিবলৈ দিয়া পৰামৰ্শক আদৰণি জনায়। অৱশ্যে এই পৰামৰ্শৰ অন্তৰালত মুখ্য মন্ত্ৰী সৰ্বানন্দ সোণোৱালৰ নিৰ্দেশ থকা বুলি শৰ্মাই মন্তব্য কৰে।
তেওঁ কয়, “নাগৰিকত্ব সংশোধনী বিধেয়কৰ বিৰুদ্ধে আন্দোলন চলি থকা অৱস্থাত মুখ্য মন্ত্ৰীয়ে মুখেৰে একো মতা নাছিল। ইয়াকে লৈ আমি সমালোচনা কৰিছিলো। কিন্তু মনে মনে থাকিলেও তেখেতে যে অসমক ভাল পায়, জাতিটোক ভাল পায়, তাৰ প্ৰমাণ এইবাৰ কৰি দেখুৱালে। তেখেতে প্ৰতীক হাজেলাৰ হতুৱাই শৰণাৰ্থীৰ প্ৰমাণ পত্ৰখন অগ্ৰাহ্য কৰাব দিলে।”
যাতে হিন্দু বাংলাদেশীৰ নাম এন আৰ চিত সোমাব নোৱাৰে তাৰ বাবেই মুখ্য মন্ত্ৰীয়ে এই কাম কৰা বুলি অভিজিৎ শৰ্মাই মন্তব্য কৰে।
শৰ্মাই লগতে কয় যে যদি মুখ্য মন্ত্ৰী সোণোৱালে তেওঁ ভবাৰ দৰেই এই পৰামৰ্শ দিছে, তেন্তে ই এক শুভ লক্ষণ আৰু তেওঁ তাৰ বাবে মুখ্য মন্ত্ৰীক ধন্যবাদ জনাব।
অৱশ্যে, অভিজিৎ শৰ্মাৰ এই ধাৰণা কিমান বিশ্বাসযোগ্য তাক লৈয়ো প্ৰশ্নৰ অৱতাৰণা হয়। কিয়নো হাজেলাই প্ৰেৰণ কৰা পৰামৰ্শসমুহৰ বিৰোধীতা কৰিছে ৰাজ্যিক বিজেপিয়ে। আনকি বিজেপিৰ ৰাজ্যিক সাধাৰণ সম্পাদক দিলীপ শইকীয়াই বিবৃতিযোগে সংবাদ মাধ্যম কৈছে, “ৰাষ্ট্ৰীয় নাগৰিকপঞ্জীৰ প্ৰকাশিত দ্বিতীয় খচৰাত ভাৰতীয় গোৰ্খা, বাঙালী, হিন্দীভাষী ইত্যাদি কেইবা লাখ লোকৰ নাম বাদ পৰাৰ পাছত শেহতীয়াকৈ উদ্ভৱ হোৱা পৰিস্থিতি আৰু মহামান্য উচ্চতম ন্যায়ালয়ে পৰিস্থিতি পৰ্যবেক্ষণ কৰি থকাৰ মাজতে ৰাষ্ট্ৰীয় নাগৰিকপঞ্জীৰ ৰাজ্যিক সমন্বয়ক প্ৰতীক হাজেলাই উদ্দেশ্য প্ৰণোদিতভাৱে আগবঢ়োৱা মতামতে পৰিস্থিতি অধিক জটিল কৰি তুলিছে।”
এই বিষয়ত ৰাজ্যিক বিজেপিৰ সভাপতি ৰঞ্জিত কুমাৰ দাসে আন একাংশ ৰাজ্যিক নেতৃত্বসহ কেন্দ্ৰীয় নেতৃত্বৰে আলোচনাৰ বাবে ইতিমধ্যে দিল্লীলৈ ৰাওনা হৈছে।
কিন্তু শৰ্মাৰ মতে বিজেপিৰ ৰাজ্যিক সভাপতি ৰঞ্জিত কুমাৰ দাস আৰু মুখ্য মন্ত্ৰী সৰ্বানন্দ সোণোৱালৰ মতৰ মাজত পাৰ্থক্য আছে।
এন আৰ চিৰ খচৰাৰ পৰা বাদ পৰা লোকসকলক লৈ বিজেপিৰ চৰকাৰ আৰু দলৰ মাজৰ স্থিতি ভিন্ন বুলি দাবী কৰা শৰ্মাৰ বক্তব্যত কিমান গ্ৰহণযোগ্যতা আছে সেয়া সময়েহে ক’ব।
