মুখ্যমন্ত্ৰী হিমন্ত বিশ্ব শৰ্মাই আকৌ এবাৰ মাদ্ৰাছাৰ পৰিৱৰ্তে সাধাৰণ বিদ্যালয়ৰ শিক্ষাৰ সপক্ষে যুক্তি দাঙি ধৰি মাদ্ৰাছাৰ বিৰুদ্ধে সৰৱ হোৱা দেখা গৈছে। তেওঁ দাবী কৰে যে শিক্ষাৰ্থীসকলে মাদ্ৰাছাত অধ্যয়ন কৰি চিকিৎসক বা অভিযন্তা হ’ব নোৱাৰে। তেওঁৰ মতে ‘মাদ্ৰাছা’ শব্দটো বিলুপ্ত হোৱা উচিত।
দেওবাৰে এক সৰ্বভাৰতীয় সংবাদমাধ্যৰ অনুষ্ঠানত হিমন্তই কয়, “যেতিয়ালৈকে এই শব্দটোৰ (মাদ্ৰাছা) অস্তিত্ব থাকিব, শিশুসকলে চিকিৎসক বা অভিযন্তা হোৱাৰ কথা ভাবিবও নোৱাৰিব। যদি শিশুসকলক কোৱা হয় যে তেওঁলোকে মাদ্ৰাছা এখনত অধ্যয়ন কৰি চিকিৎসক বা অভিযন্তা হ’ব নোৱাৰে তেতিয়া তেওঁলোকে নিজে তালৈ (মাদ্ৰাছালৈ) যাব নিবিচাৰিব।”
লগতে পঢ়ক: অসমত আম আদমী পাৰ্টিৰ শক্তি প্ৰদৰ্শন; ডিব্ৰুগড়ত ৫০০০ৰো অধিকৰ আপত যোগদান
২০২০ চনত ৰাজ্য চৰকাৰে অসমৰ সকলো চৰকাৰী মাদ্ৰাছা আঁতৰাই সোইবোৰ সাধাৰণ বিদ্যালয়লৈ পৰিৱৰ্তন কৰাৰ সিদ্ধান্ত লৈছিল। অসম চৰকাৰে দাবী কৰিছিল যে ই “ধৰ্মনিৰপেক্ষ শিক্ষা ব্যৱস্থা” গঢ়ি তোলাৰ পথ প্ৰশস্ত কৰিব।
অৱশ্যে, এই সিদ্ধান্তৰ বিৰুদ্ধে ২০২১ চনত গুৱাহাটি উচ্চ ন্যায়ালয়ত ১৩ খন আবেদন দাখিল কৰা হৈছিল। কিন্তু চলিত বৰ্ষৰ জানুৱাৰী মাহত উচ্চ ন্যায়ালয়ৰ খণ্ড বিচাৰপীঠে অসম চৰকাৰৰ সিদ্ধান্ত বাহাল ৰাখে।
দেওবাৰে অনুষ্ঠানটোত চৰকাৰৰ সিদ্ধান্তৰ বিষয়ে মুখ্যমন্ত্ৰীক প্ৰশ্ন কৰা হৈছিল। ইয়াৰ উত্তৰত হিমন্তই এই সিদ্ধান্তৰ সপক্ষে নিজৰ যুক্তি দাঙি ধৰে। তেওঁ শিশুসকলক মাদ্ৰাছাত ভৰ্তি কৰিলে ই তেওঁলোকৰ মানৱ অধিকাৰ উলংঘনৰ সমতুল্য হ’ব বুলিও কয়। তেওঁ কয়, “আপোনাৰ সন্তানক কোৰাণ শিকাওক, কিন্তু ঘৰতে!”
লগতে পঢ়ক: পুনৰ কৰ’নাৰ প্ৰকোপ! ভাৰতকে ধৰি ১৬ খন দেশলৈ ভ্ৰমণ নিষিদ্ধ কৰিছে চৌদি আৰবে
তেওঁ লগতে কয়, “বিদ্যালয়ত সাধাৰণ শিক্ষাৰ ওপৰত গুৰুত্ব দিয়া উচিত। ঘৰত ধৰ্মীয় গ্ৰন্থসমূহ ঘৰতো শিকাব পাৰি। কিন্তু এজন চিকিৎসক, অভিযন্তা, অধ্যাপক বা বিজ্ঞানী হ’বলৈ স্কুলীয়া শিক্ষা লোৱা উচিত। ”
