কালি (২৭ জুন, ২০২৪) নলবাৰীত অনুষ্ঠিত হোৱা ৰাজ্যিক কেবিনেটৰ বৈঠকত ১৬ বিধৰো অধিক ব্যঞ্জনেৰে আপ্যায়িত কৰাৰ বাতৰি প্ৰচাৰ হোৱাৰ পিছত ৰাইজৰ মাজত ব্যাপক প্ৰতিক্ৰিয়া হোৱা দেখা গৈছিল। নলবাৰী প্ৰশাসনৰ এনে কাণ্ডই সৃষ্টি কৰা প্ৰতিক্ৰিয়াৰ পিছতেই মুখ্যমন্ত্ৰী হিমন্ত বিশ্ব শৰ্মাই আজি নলবাৰীৰ জিলা আয়ুক্তলৈ এখন পত্ৰ প্ৰেৰণ কৰি এনে ইলাহী কাৰবাৰৰ উত্তৰ বিচাৰিছে।
পত্ৰখনত মুখ্যমন্ত্ৰী ড০ হিমন্ত বিশ্ব শৰ্মাই জিলা আয়ুক্তগৰাকীলৈ লিখিছে যে বাৰে বাৰে কোৱাৰ পিছতো খোৱাৰ নামত কিয় এনে ইলাহী আয়োজনৰ প্ৰয়োজন নাছিল। লগতে প্ৰশ্ন কৰিছে যে কেবিনেট বৈঠকৰ বাবে সাধাৰণ নিৰামিষ আহাৰ যোগাৰ কৰিবলৈ কোৱাৰ পাছতো কিয় এনে বিশাল আয়োজন কৰা হল?
লগতে পঢ়কঃ একেবাৰতে বহুত বাঢ়িল মোবাইল ৰিচাৰ্জৰ খৰচ! ৩ জুলাইৰ পৰা কাৰ্যকৰী হ’ব নতুন মূল্য
উল্লেখ্য যে কালি নলবাৰীত আয়োজন কৰা এই কেবিনেট বৈঠকৰ বাবে আয়োজন কৰা খাদ্য সম্ভাৰত প্লেইন ৰাইচ, জিৰা আৰু পোলাও, ছাগলীৰ মাংস, মিছা মাছ ভজা, আদা দিয়া সৰু মাছৰ লগতে কাৱৈ আৰু মাগুৰ মাছৰ আঞ্জা, চিকেন চুপৰ লগতে মাহৰ দাইলৰ লগত খাহিৰ তেল, দাইল, কলফুল ভাজি, ঢেকীঁয়া ভাজি, কল পছলা, সৰু আলু ভাজি, বৰা ভাজি, আলু পিটিকা,পদিনা চাটনি, তিলৰ চাটনি, অমিতা খাৰ, চালাদ, মিঠা দৈ আৰু গোলাপ জামুনকে ধৰি ১৬ বিধতকৈয়ো অধিক ব্যঞ্জন আছিল।
স্বাভাৱিকতে, কেবিনেট বৈঠকৰ নামত এনে ইলাহী কাৰবাৰে ৰাইজৰ চকু কপালত তুলিছে। মূল্যবৃদ্ধিকে ধৰি বিভিন্ন সমস্যাত জৰ্জৰিত ৰাজ্যৰ জনসাধাৰণৰ মাজত বিৰূপ প্ৰতিক্ৰিয়াৰ লগতে ক্ষোভৰো সৃষ্টি হয়। ৰাইজৰ এনে প্ৰতিক্ৰিয়া দেখিয়েই অৱশেষত গা লৰিল মুখ্যমন্ত্ৰীৰ। সেয়ে, প্ৰশ্ন উঠিছে যে এদিন পিছত নলবাৰী জিলা আয়ুক্তক জবাবদিহি কৰি পত্ৰ লিখি দায় সৰাৰ উপায় বিচাৰিলে নেকি!
প্ৰসংগক্ৰমে, হিমন্ত বিশ্ব শৰ্মা মুখ্যমন্ত্ৰী হোৱাৰ পিছতে সঘনাই কেবিনেট বৈঠক অনুষ্ঠিত কৰাৰ লগতে এই বৈঠক ৰাজ্যৰ বিভিন্ন স্থানত অনুষ্ঠিত কৰি চমক দিব বিচাৰিছিল। সেই সময়ৰে পৰা এই কেবিনেট বৈঠকৰ বিলাসী আয়োজনক লৈ বিতৰ্কৰ ওৰ পৰা নাই। বৰঞ্চ ইয়াৰ পূৰ্বে মুখ্যমন্ত্ৰীয়ে কেবিনেট বৈঠকৰ সম্প্ৰসাৰণৰ বিষয়ত উঞ্ছবৃত্তিহে প্ৰকাশ কৰি আহিছে।
এতিয়া কথাটো হ’ল ২৭ তাৰিখৰ কেবিনেট বৈঠকৰ বাবে কৰা ইলাহী আয়োজনৰ কথা পূৰ্বেই সংবাদ মাধ্যমত প্ৰকাশ পাইছিল। আনকি ভোজভাতৰ বাবে আয়োজন কৰা বিবিধ ব্যঞ্জনৰ তালিকাও প্ৰকাশ পাইছিল। কিন্তু তাৰপিছত ৰাইজৰ নেতাসকলৰ কোনো প্ৰতিক্ৰিয়া প্ৰকাশ পোৱা নাছিল। কিন্তু কেবিনেট বৈঠকত ভুৰিভোজ গ্ৰহণ কৰি অহাৰ পিছত ৰাইজৰ প্ৰতিক্ৰিয়া দেখি আনুষ্ঠানিকতা ৰক্ষা কৰিহে এখন পত্ৰ দিয়া বুলিহ সচেতন মহলে উপলব্ধি কৰে।
