মুখ্য মন্ত্ৰীৰ খাৰঘুলিৰ চৰকাৰী বাসভৱনৰ চৌহদত দেওবাৰে সন্ধিয়া আৰক্ষী জোৱান শুক্লেশ্বৰ কাথাৰৰ গুলীবিদ্ধ মৃতদেহ উদ্ধাৰ হোৱাৰ ঘটনাৰ মুখ্য মন্ত্ৰী সৰ্বানন্দ সোণোৱালে তদন্তৰ নিৰ্দেশ দিছে।
উল্লেখযোগ্য যে মুখ্যমন্ত্ৰীয়ে তেওঁৰ চৰকাৰী বাসভৱন হিচাপে ব্যৱহাৰ কৰি থকা খাৰঘুলিৰ ব্ৰহ্মপুত্ৰ অতিথিশালাৰ লগত সংলগ্ন সুৰক্ষা বেষ্টনিত অসম আৰক্ষীৰ জোৱানজনৰ গুলীবিদ্ধ মৃতদেহ উদ্ধাৰ হৈছিল।
আৰক্ষী জোৱান শুক্লেশ্বৰ কাথাৰৰ মৃতদেহত শৰীৰত ছয়টা গুলীৰ আঘাত পোৱা গৈছিল। সেই গুলীকেইটা তেওঁৰ চাৰ্ভিছ এ কে ৪৭ ৰাইফলৰ পৰাই ওলোৱাটো স্পষ্ট হৈছে।
যদিও কাথাৰে তেওঁৰ চাৰ্ভিছ ৰাইফলেৰে গুলী চলাই আত্মহত্যা কৰা বুলি বাতৰি ওলাইছে, গুৱাহাটীৰ আৰক্ষী আয়ুক্তই জানিব দিয়ে যে আৰক্ষী জোৱানজনে আত্মহত্যা কৰিছে নে নাই সেয়া এতিয়াও নিশ্চিত হ’বলৈ বাকী আছে।
গুৱাহাটীৰ আৰক্ষী আয়ুক্ত হিচাপে অলপতে কাৰ্যভাৰ গ্ৰহণ কৰা প্ৰদীপ চন্দ্ৰ শালৈয়ে সংবাদ মাধ্যমক জানিবলৈ দিছে যে, ‘’ এই মুহূৰ্তত এয়া আত্মহত্যাৰ ঘটনা নে আৰক্ষী জোৱানজনৰ মৃত্যত আন কোনো লোক জড়িত আছে সেই বিষয়ে মন্তব্য কৰাটো কঠিন।‘’
