প্ৰথম পৰ্য্যায়ৰ পঞ্চায়ত নিৰ্বাচনৰ বাবে মাথোঁ তিনিটা দিন বাকী থকা সময়ত ইতিমধ্যে ৰাজ্যৰ প্ৰতিটো প্ৰান্তত বিশেষকৈ গ্ৰাম্যাঞ্চলত ব্যাপক নিৰ্বাচনী প্ৰচাৰ চলিছে। বিভিন্ন ৰাজনৈতিক দলৰ নিৰ্বাচনী প্ৰচাৰৰ প্ৰতিযোগিতাৰ মাজতে নিৰ্বাচনী যুঁজৰ অংশ হিচাপে ৰাইজো ব্যস্ত হৈ পৰিছে।
পঞ্চায়ত নিৰ্বাচনৰ ৰণশিঙা বজাবলৈ শনিবাৰে বিশ্বনাথত উপস্থিত হয় মুখ্যমন্ত্ৰী সৰ্বানন্দ সোণোৱাল | দিনৰ প্ৰায় ১২.৩০ মান বজাত বিশ্বনাথৰ আৱৰ্ত ভৱনৰ সমীপত হেলিকপ্টাৰ যোগে অৱতৰণ কৰি মুখ্য মন্ত্ৰী গৰাকীয়ে পোনে পোনে বিশ্বনাথৰ গড়েহাগীস্থিত কমলা কান্ত নাট্য সমাজ প্ৰাংগণত অনুষ্ঠিত হোৱা বিজেপিৰ নিৰ্বাচনী প্ৰচাৰ সভাত অংশগ্ৰহণ কৰে।
নিৰ্বাচনী ভাষণত মুখ্য মন্ত্ৰীয়ে কয়, ‘’কংগ্ৰেছ-অগপৰ মিত্ৰতা অপৱিত্ৰ মিত্ৰতা। এই মিত্ৰতাই কেতিয়াও গাওঁ উন্নয়ন কৰিব নোৱাৰে। একাংশ বুদ্ধিজীবী আৰু সংবাদ মাধ্যমে উগ্ৰপন্থীক উদগনি জগাই আহিছে।‘’ মুখ্য মন্ত্ৰী সোণোৱালে নিৰ্বাচনী সভাখনত অংশ গ্ৰহণ কৰি বিৰোধী দল সমূহৰ বিৰুদ্ধে তীক্ষ্ণ বাক্যবান নিক্ষেপ কৰে।
আনহাতে, আগন্তুক পঞ্চায়ত নিৰ্বাচনত ভাৰতীয় জনতা পাৰ্টীৰ জয় নিশ্চিত বুলি মন্তব্য প্ৰদান কৰি মুখ্য মন্ত্ৰী সোণোৱালে সমূহ অসমবাসীৰ আশিস বিচাৰে। এই নিৰ্বাচনী সভাখনত অংশ গ্ৰহণ কৰে তেজপুৰৰ সাংসদ আৰ পি শৰ্মা, চতিয়াৰ বিধায়ক পদ্ম হাজৰিকা, বিশ্বনাথৰ বিধায়ক প্ৰমোদ বৰঠাকুৰকে ধৰি ভাৰতীয় জনতা পাৰ্টীৰ ৰাজ্যিক পৰ্যায়ৰ বহুকেইগৰাকী নেতাই।
ইপিনে, নিজৰ মন্তব্যৰে বিতৰ্ক সৃষ্টি কৰা তেজপুৰৰ সাংসদ আৰ পি শৰ্মাই মূখ্য মন্ত্ৰীৰ সন্মুখতে মুখ্য মন্ত্ৰী সোণোৱালক ছলমান খানতকৈও বেছি সুন্দৰ বুলি মন্তব্য প্ৰকাশ কৰি ৰাইজৰ মাজত হাহিৰ খোৰাক জগায়।