মহা অম্বুবাচী মেলাৰ শুভাৰম্ভণি : মুখ্য মন্ত্ৰী সোণোৱাল আৰু কেন্দ্ৰীয় মন্ত্ৰী প্ৰহ্লাদ সিং পেটেলে কৰিলে উদ্বোধন
ঢাক ঢোল বজাই মা কামাখ্যাৰ আৰতিৰে শুভাৰম্ভ হ’ল মহা অম্বুবাচী মেলাৰ। কাইলৈৰ পৰা অহা ২৬ জুনলৈকে অনুষ্ঠিত হ’বলগীয়া অম্বুবাচী মেলাৰ আজি ভৰলুস্থিত সোণাৰাম খেলপথাৰত আনুষ্ঠানিকভাৱে উদ্বোধন কৰে মুখ্য মন্ত্ৰী সৰ্বানন্দ সোণোৱাল আৰু কেন্দ্ৰীয় স্বতন্ত্ৰ ৰাজ্যিক পৰ্যটন ও সাংস্কৃতিক মন্ত্ৰী প্ৰহ্লাদ সিং পেটেলে।
মহা অম্বুবাচী মেলাৰ উদ্বোধন কৰি মুখ্য মন্ত্ৰী সোণোৱালে কয়, “বিশ্বৰ ৫২ খন শক্তিপীঠৰ ভিতৰত কামাখ্যা অন্যতম। অসম চৰকাৰে ২০১৬ চনৰ পৰা অম্বুবাচী মেলা সফলতাৰে উদযাপন কৰিবলৈ সক্ষম হৈছো। তাৰ আঁৰত আছে বৰাক ব্ৰহ্মপুত্ৰ সমন্বিতে ৰাইজৰ সহযোগিতা আৰু আশীৰ্বাদ।”
তদুপৰি, কামাখ্যাক এই অম্বুবাচী মেলাৰ জৰিয়তে পৰ্যটন ক্ষেত্ৰত বিশ্বৰ দৰবাৰত প্ৰতিষ্ঠিত কৰিব লাগিব বুলি মন্তব্য কৰি তেওঁ লগতে কয়, “আমি সকলোৱে মিলি অম্বুবাচী মেলাক এক মহত্বপূৰ্ণ মেলা হিচাপে পৰিগণিত কৰিব লাগিব। দেশ বিদেশৰ পৰা বিভিন্নজনে টেলিফোন যোগে যোৱা তিনিবছৰে হৈ যোৱা অম্বুবাচী মেলাৰ প্ৰশংসা কৰিছে।”
এইবছৰো অহা ৪ দিনত সমূহ ৰাইজক সহযোগিতাৰে এই মেলা সাফল্যমণ্ডিত কৰিবলৈ আহ্বান জনায় সোণোৱালে।
তেওঁ লগতে কয়, “ৰাইজে নখ জোকাৰিলে নৈ বয়, অসম চৰকাৰৰ এই তিনিবছৰৰ সফলতাৰ বাবে বৰাক ব্ৰহ্মপুত্ৰ সমন্বিতে সকলো ৰাইজক ধন্যবাদ জ্ঞাপন কৰিছো।”
আনহাতে, কেন্দ্ৰীয় মন্ত্ৰী পেটেলেও মন্ত্ৰী হোৱাৰ পাছত এই শুভ ক্ষণত কামাখ্যা মন্দিৰলৈ প্ৰথমবাৰ আহিবলৈ পাই নিজকে সৌভাগ্য মানিছে বুলি কয়। তেওঁ কয়, “আমাৰ সংস্কৃতি, লোকসংস্কৃতি আমি নিজে জীয়াই ৰাখিব লাগিব। এই মেলা সফলভাবে ৰূপায়ণ হওঁক তাৰে কামনা কৰিলো।”
উক্ত উদ্বোধনী অনুষ্ঠানত মুখ্য মন্ত্ৰী, কেন্দ্ৰীয় ৰাজ্যিক মন্ত্ৰীৰ লগতে শিক্ষা মন্ত্ৰী সিদ্ধাৰ্থ ভট্টাচাৰ্য, জল সম্পদ বিভাগৰ মন্ত্ৰী কেশৱ মহন্ত, পৰ্যটন নিগমৰ অধ্যক্ষ জয়ন্ত মল্ল বৰুৱা, বিধায়ক ৰমেন্দ্ৰ নাৰায়ণ কলিতা, গুৱাহাটীৰ সাংসদ কুইন ওজা, উপায়ুক্ত বিশ্বজিত পেগু, কামাখ্যাৰ দলৈ মোহিত চন্দ্ৰ শৰ্মা আৰু পবিন্দ্ৰ প্ৰসাদ শৰ্মাকে ধৰি অন্য বহুকেইগৰাকী বিশিষ্ট ব্যক্তি উপস্থিত থাকে।
আজি নিশা ৮ বজাৰ পৰা আৰম্ভ হ’ব বলিউডৰ জনপ্ৰিয় কণ্ঠশিল্পী কৈলাশ খেৰৰ সংগীতানুষ্ঠান।