বড়োলেণ্ড বিশ্ববিদ্যালয়ত নতুন উপাচাৰ্য নিযুক্তিৰ দাবীত বড়োলেণ্ড ছাত্ৰ সন্থাই চলাই থকা অনিৰ্দিষ্টকালীন ধৰ্মঘটে দহদিন অতিক্ৰম কৰিছে। ফলত বিশ্ববিদ্যালয়খনৰ শৈক্ষিক পৰিৱেশ নষ্ট হোৱাৰ লগতে প্ৰশাসনিক কাম-কাজ, ষান্মাসিক পৰীক্ষা, কৰ্মশালা আদি বন্ধ হৈ পৰিছে। এই পৰিপ্ৰেক্ষিতত মুখ্য মন্ত্ৰী সৰ্বানন্দ সোণোৱালে বড়োলেণ্ড ছাত্ৰ সন্থাৰ প্ৰতিনিধি দলৰ সৈতে বৈঠকত মিলিত হ’বলৈ সন্মত হৈছে।
কাইলৈ, অৰ্থাৎ ১ অক্তোবৰত দিচপুৰত মুখ্য মন্ত্ৰীৰ আলোচনাকক্ষত মুখ্য মন্ত্ৰী সৰ্বানন্দ সোণোৱালৰ বি এছ য়ুৰ প্ৰতিনিধি দলৰ সৈতে এই বৈঠকখন অনুষ্ঠিত হ’ব। জানিব পৰামতে, তাৰ বাবে ৰাজ্য চৰকাৰৰ উচ্চ শিক্ষা বিভাগৰ যুটীয়া সচিবে কোকৰাঝাৰ জিলা উপায়ুক্তলৈ পত্ৰ প্ৰেৰণ কৰিছে।
ইয়াৰ প্ৰাক মুহূৰ্তত আজি কোকৰাঝাৰত অনুষ্ঠিত এখন সংবাদমেলত বি এছ য়ুৰ সভাপতি সৌগৌমছাৰ বসুমতাৰী আৰু অন্যান্য নেতৃবৰ্গই স্পষ্টকৈ কয় যে উক্ত বৈঠকত তেওঁলোকৰ দাবী মানি ল’লেহে সংগঠনটোৱে আন্দোলনৰ কাৰ্যসূচী প্ৰত্যাহাৰ কৰিব।
“দাবীসমূহৰ ওপৰত ফলপ্ৰসূ আলোচনা হ’লেহে অনিৰ্দিষ্টকালীন ধৰ্মঘট প্ৰত্যাহাৰ কৰা-নকৰাৰ ওপৰত সিদ্ধান্ত গ্ৰহণ কৰা হ’ব”, এইবুলি সংবাদমেলত সৌগৌমছাৰ বসুমতাৰীয়ে জানিবলৈ দিয়ে।
আনহাতে, বিশ্ববিদ্যালয়ত চলি থকা অনিৰ্দিষ্টকালীন ধৰ্মঘটৰ পৰিপ্ৰেক্ষিতত শিক্ষানুষ্ঠানখনৰ শৈক্ষিক পৰিৱেশ বিনষ্ট হোৱাত গভীৰ উদ্বেগ প্ৰকাশ কৰিছে আছু, এবছু আৰু আৰছুৰ কোকৰাঝাৰ জিলা সমিতিয়ে।
আজি সংবাদ মাধ্যমলৈ প্ৰেৰণ কৰা এটা যৌথ বিবৃতিত এবছুৰ কোকৰাঝাৰ জিলা সমিতিৰ সভাপতি জনক উজীৰ, সম্পাদক সৌমদৌন ব্ৰহ্ম, আছুৰ জিলা সভাপতি সুবোধ ৰায়, সম্পাদক সবিন শৰ্মা আৰু আৰছুৰ সভাপতি ক্ৰৌকসিং চাপাৰ, সম্পাদক বিন্দু ৰাভাই বিবৃতিত উল্লেখ কৰে যে বড়োলেণ্ড বিশ্ববিদ্যালয়ত চলি থকা অনিৰ্দিষ্টকালীন ধৰ্মঘটৰ ফলত বিশ্ববিদ্যালয়ৰ প্ৰশাসনিক কাম-কাজৰ লগতে কৰ্মশালা, ষান্মাষিক পৰীক্ষাও বন্ধ হৈ পৰাত উদ্বেগ প্ৰকাশ কৰে।
শিক্ষাগ্ৰহণ কৰি থকা ছাত্ৰ-ছাত্ৰীসকলৰ পাঠদান আৰু প্ৰশাসনিক কাম-কাজ ব্যাহত নকৰাকৈ আন্দোলনকাৰীসকলক আন্দোলন কৰাৰ পৰামৰ্শ প্ৰদান কৰি তিনিওটা সংগঠনৰ নেতৃবৃন্দই শিক্ষাৰ অধিকাৰৰ পৰা ছাত্ৰ-ছাত্ৰীসকলক বঞ্চিত নকৰিবলৈ আন্দোলনকাৰীৰ প্ৰতি আহ্বান জনাইছে। তাৰোপৰি সমগ্ৰ বিষয়বস্তু চালিজাৰি চাই এই ক্ষেত্ৰত বিশ্ববিদ্যালয়খনৰ আচাৰ্য তথা ৰাজ্যপালক ফলপ্ৰসূ ব্যৱস্থা গ্ৰহণ কৰিবলৈ বিবৃতিযোগে আহ্বান জনাইছে আছু,এবছু আৰু আৰছুৱে।