মাত্ৰ দুদিনৰ ভিতৰতে দ্বিতীয়বাৰৰ বাবে দিল্লীত চিএনজি বা গেছৰ দাম বৃদ্ধি পালে। জানিব পৰা মতে, দেওবাৰৰ পৰা ৰাজধানী দিল্লী আৰু ইয়াৰ দাঁতিকাষৰীয়া অঞ্চলসমূহত প্ৰতি কিলোগ্ৰাম চিএনজিৰ দাম এক টকাকৈ বৃদ্ধি কৰা হৈছে। অৱশ্যে এই সময়ছোৱাত পেট্ৰল আৰু ডিজেলৰ দামত নতুনকৈ কোনো ধৰণৰ পৰিৱৰ্তন হোৱা নাই।
ইয়াৰ পূৰ্বে শুকুৰবাৰে সমগ্ৰ দেশতে পেট্ৰল আৰু ডিজেলৰ দাম বৃদ্ধি পাইছিল আৰু সেইদিনা দিল্লীত চিএনজিৰ দাম প্ৰতি কিলোগ্ৰামত দুটকাকৈ বাঢ়িছিল। কিন্তু দুদিনৰ ভিতৰতে পুনৰ গেছৰ দাম বৃদ্ধি হোৱাৰ ফলত বৰ্তমান দিল্লীত প্ৰতি কিলোগ্ৰাম চিএনজিৰ দাম ৮০.০৯ টকা হৈছেগৈ। আনহাতে নয়ডা আৰু গাজিয়াবাদত প্ৰতি কিলোগ্ৰাম চিএনজিৰ মূল্য ৮৮.৭০ টকা, গুৰুগ্ৰামত ৮৫.১২ টকা, মুজফ্ফৰনগৰ, মিৰাট আৰু ছামলিত ৮৮.৫৮ টকা হোৱাৰ লগতে কানপুৰত ৯১.৪২ টকা আৰু আজমীৰত ৮৯.৪৪ টকা হৈছে। বিশেষজ্ঞসকলৰ মতে, চিএনজিৰ এই দাম বৃদ্ধিয়ে ৰাজহুৱা পৰিবহণ আৰু সাধাৰণ বস্তুৰ দামৰ ওপৰত ডাঙৰ প্ৰভাৱ পেলাব।
উল্লেখ্য যে চলিত বৰ্ষৰ আৰম্ভণিতে মধ্যপ্ৰাচ্যত যুদ্ধ আৰম্ভ হোৱাৰ পিছৰে পৰা ইন্ধনৰ দাম বৃদ্ধি পোৱাৰ আশংকা কৰা হৈছিল। যোৱা ২৮ ফেব্ৰুৱাৰীত ইৰাণ আৰু আমেৰিকাৰ মাজত হোৱা সংঘৰ্ষৰ পিছৰে পৰা সমগ্ৰ বিশ্বতে ইন্ধনৰ এক বৃহৎ সংকটৰ সৃষ্টি হৈছে। ইতিমধ্যে বহু দেশত পেট্ৰল, ডিজেল আৰু গেছৰ দাম বৃদ্ধি পাইছে আৰু এতিয়া ভাৰততো ইয়াৰ প্ৰভাৱ পৰিবলৈ আৰম্ভ কৰিছে। দিল্লীত ৰাজহুৱা পৰিবহণৰ এক ডাঙৰ অংশ চিএনজিৰ দ্বাৰা চলে। সেয়েহে চিএনজিৰ দাম বৃদ্ধি পালে যাত্ৰীসকলৰ ওপৰতো ইয়াৰ বোজা পৰিব। বিশেষজ্ঞসকলৰ মতে, ইৰাণৰ যুদ্ধৰ ফলত সমগ্ৰ বিশ্বতে খাৰুৱা তেল আৰু গেছৰ দাম বৃদ্ধি পোৱাৰ বাবেই চিএনজিৰ দাম বৃদ্ধি হোৱাটো একপ্ৰকাৰ নিশ্চিত আছিল।
