প্ৰায় দুবছৰে বন্ধ হৈ থকা ৰাজহুৱা খণ্ডৰ কয়লা উদ্যোগ উত্তৰ পূব কয়লা ক্ষেত্ৰ মাৰ্ঘেৰিটাৰ ২৬ মাৰ্চ তাৰিখে টিকক কলিয়ৰীত সম্প্ৰসাৰিত উৎপাদন গোট মুকলি কৰি কেন্দ্ৰীয় কয়লা দপ্তৰৰ মন্ত্ৰী আৰু অসমৰ মুখ্যমন্ত্ৰীয়ে উদ্যোগটোৰ প্ৰাণ সঞ্চাৰ কৰাত স্থানীয় ৰাইজ তথা কয়লা উদ্যোগতোৰে জড়িত শ্ৰমিক, কৰ্মচাৰী সকল উৎফুল্ল হৈ পৰিছিল।
কিন্তু কয়লা ক্ষেত্ৰ মুকলিৰ পাছতে একাংশ কয়লা চোৰ সক্ৰিয় হৈ পৰিছে বুলি জানিব পৰা গৈছে। এক সূত্ৰই জানিবলৈ দিয়া অনুসৰি লিডু পাটকাই আৰু চীনা বস্তি অঞ্চলৰ পৰা ক্ৰমে জনৈক গণি ইছলাম, ছফিকুল ইছলাম, ফৰিদ, গোপাল, নিজাম, জন, ডেভিদ নামৰ একাংশ কয়লা চোৰে দিনে নিশাই কয়লা চুৰি আৰম্ভ কৰি অঞ্চলটোত সন্ত্ৰাস সৃষ্টি কৰি অহাৰ গুৰুতৰ অভিযোগ উত্থাপন হৈছে।
লগতে পঢ়ক: ৰাজ্যত পুনৰ এনকাউণ্টাৰৰ ঘটনা: আৰক্ষীৰ গুলীত আহত গাঞ্জা সৰবৰাহকাৰী
এই সমূহ কয়লা চোৰক নাকী লগাবলৈ স্থানীয় সচেতন ৰাইজে লিডু আৰক্ষীক দাবী জনাইছে। অন্যথা পুনৰ উজ্জীৱিত হোৱা উত্তৰ পূব কয়লা ক্ষেত্ৰ মাৰ্ঘেৰিটালৈ চৰম ভাবুকি কঢ়িয়াই অনাৰ সম্ভৱনা সৃষ্টি হ’ব।
উল্লেখ্য যে ২০২০ চনৰ তিনি জুনৰ পৰা পৰিবেশ সংক্ৰান্তীয় কাৰণৰ বাবে উদ্যোগটোৰ উৎপাদন বন্ধ হৈ পৰিছিল। অৱশেষত যোৱা ২৬ মাৰ্চ তাৰিখে কেন্দ্ৰীয় কয়লা মন্ত্ৰী যোশীৰ উপস্থিতিত বন্ধ হৈ পৰা উদ্যোগটোৰ পুনৰ মুকলি কৰা হয়।
এই মুকলি অনুষ্ঠানৰ সভাত ভাষণ প্ৰসংগত কেন্দ্ৰীয় মন্ত্ৰী যোশীয়ে উত্তৰ পূব কয়লা ক্ষেত্ৰ পুনৰ মুকলিৰ অৰ্থে সকলো বাধা নীতি-নিয়মৰ মাজেৰে আঁতৰ কৰাৰ বাবে ক্ষিপ্ৰতাৰে মুখ্যমন্ত্ৰীয়ে লোৱা ভূমিকাক প্ৰশংসা কৰিছিল। অতি উচ্চ মানৰ কয়লা উৎপাদন হোৱা উত্তৰ পূব কয়লাক্ষেত্ৰৰ পুনৰ মুকলি কৰণ আৰু পৰৱৰ্তী সময়ত ইয়াৰ বৰ্দ্ধিত কৰণ হ’লে স্থানীয় বিভিন্ন উদ্যোগ লাভবান হোৱাৰ লগতে নিয়োগৰ সুবিধা বৃদ্ধি পাব বুলি মন্তব্য প্ৰকাশ কৰিছিল কেন্দ্ৰীয় মন্ত্ৰীজনে।
লগতে পঢ়ক:১৭ জুলাইত চিকিৎসা বিজ্ঞানৰ নামভৰ্তিৰ (NEET UG) প্ৰৱেশ পৰীক্ষা; ২ এপ্ৰিলৰ পৰা আৰম্ভ পঞ্জীয়ণ
তেনেক্ষেত্ৰত লিডু পাটকাই আৰু চীনা বস্তি অঞ্চলৰ পৰা ৰাষ্ট্ৰীয় সম্পদ কয়লা চুৰি বন্ধ কৰাৰ ক্ষেত্ৰত তথা উপৰোক্ত কয়লা চোৰ কেইটাৰ বিৰুদ্ধে আৰক্ষীয়ে কেনেধৰণৰ ব্যৱস্থা গ্ৰহণ কৰে সেইয়া অতি লক্ষণীয় হ’ব।
স্থানীয় সচেতন মহলে কয়লা উদ্যোগলৈ ভাবুকি কঢ়িয়াই অনা এনে কয়লা চোৰ সকলৰ বিৰুদ্ধে কঠোৰ ব্যৱস্থা গ্ৰহণ কৰিবলৈ লিডু আৰক্ষীক দাবী জনাইছে।
