ইন্টাৰনেটৰ জগতখনত তোলপাৰ লগোৱা এটা ব্যংগাত্মক ৰাজনৈতিক দল ককৰোচ জনতা পাৰ্টী চমুকৈ চিজেপিয়ে শেহতীয়াকৈ এক বাধাৰ মুখামুখী হৈছে। বিগত কেইটামান দিনত লাখ লাখ মানুহৰ যোগদান আৰু কোটি কোটি ভিউছ লাভ কৰাৰ পিছত যোৱা নিশা হঠাতে ইনষ্টাগ্ৰামৰ পৰা দলটোৰ অফিচিয়েল পেজটো নোহোৱা হৈ যায়। এই ঘটনাটোক লৈ ছচিয়েল মিডিয়াত তীব্ৰ চাঞ্চল্যৰ সৃষ্টি হৈছে। বহুতে দাবী কৰিছে যে অতি কম সময়ৰ ভিতৰতে পেজটোৰ জনপ্ৰিয়তা অতিমাত্ৰা বৃদ্ধি পোৱাৰ বাবেই একাউণ্টটো হেক কৰা হৈছে অথবা ৰাজনৈতিক চাপৰ বাবে মেটা কৰ্তৃপক্ষই ইয়াক সাময়িকভাৱে বন্ধ বা চচপেণ্ড কৰি দিছে।
লাভ কৰা খবৰ অনুসৰি যোৱা নিশাৰ পৰা চিজেপিৰ ইনষ্টাগ্ৰাম একাউণ্টটো কমেও দুবাৰমান সাময়িকভাৱে নোহোৱা বা বন্ধ হৈ পৰিছিল। কিন্তু আচৰিত কথাটো হ’ল এই খেলিমেলিৰ মাজতেও পেজটোৰ ফল’ৱাৰ্ছৰ সংখ্যা অতি দ্ৰুতগতিত বৃদ্ধি পাইছে। যোৱা নিশা য’ত একাউণ্টটোৰ ফল’ৱাৰ্ছ প্ৰায় ৯০ লাখ আছিল, সেয়া সকলো বাধা নেওচি বৰ্তমান ১ কোটি ১০ লাখ অতিক্ৰম কৰিছে। ইন্টাৰনেট ব্যৱহাৰকাৰী একাংশৰ মতে পেজটোত একেলগে বহুসংখ্যক লোকৰ সমাগম হোৱাৰ বাবে কোনো কাৰিকৰী বিজুতিও ঘটিব পাৰে। অৱশ্যে একাউণ্টটো সম্পূৰ্ণৰূপে বন্ধ হোৱা বা হেক হোৱাৰ কোনো চৰকাৰী প্ৰমাণ পোৱা নাই কাৰণ বৰ্তমান পেজটো আকৌ সক্ৰিয় হৈ পৰিছে।
ইয়াৰ মাজতে এটা ভিডিঅ’ বাৰ্তাৰ জৰিয়তেৰ তীব্ৰ ক্ষোভ প্ৰকাশ কৰিছে চিজেপিৰ প্ৰতিষ্ঠাপক তথা বষ্টন বিশ্ববিদ্যালয়ৰ ৩০ বছৰীয়া ছাত্ৰ অভিজিৎ দিপকে। তেওঁ পোনপটীয়াকৈ চৰকাৰক লক্ষ্য কৰি প্ৰশ্ন উত্থাপন কৰে যে যুৱ প্ৰজন্মৰ অধিকাৰৰ কথা কোৱা বা ভিন্নমত পোষণ কৰাৰ বাবে কিয় তেওঁলোকৰ ছচিয়েল মিডিয়া একাউণ্টসমূহক এইদৰে লক্ষ্য কৰি লোৱা হৈছে। নিজৰ বক্তব্যত ক্ষোভ উজাৰি দিপকে কয় যে চীনে যেতিয়া আমাৰ ভূখণ্ডত অনুপ্ৰৱেশ কৰে তেতিয়া কোনো ব্যৱস্থা লোৱা নহয়, কিন্তু চৰকাৰে আমাৰ দৰে যুৱক-যুৱতীসকলৰ কণ্ঠৰোধ কৰিবলৈহে উঠি-পৰি লাগিছে।
কেৱল ইয়াতেই ক্ষান্ত নাথাকি তেওঁ প্ৰধানমন্ত্ৰী নৰেন্দ্ৰ মোদীকো পোনপটীয়াকৈ সমালোচনা কৰি প্ৰশ্ন কৰে যে মানুহে কিয় ভাবে যে মোদীয়েই আটাইতকৈ শক্তিশালী আৰু সাহসী প্ৰধানমন্ত্ৰী। দিপকে প্ৰত্যাহ্বান জনাই কয় যে প্ৰধানমন্ত্ৰী যদি সঁচাকৈয়ে ইমান শক্তিশালী, তেন্তে তেওঁ মুকলিকৈ সংবাদ মেল পাতি কঠিন প্ৰশ্নৰ সন্মুখীন হ’ব লাগে। অৱশ্যে এই ধৰণৰ অনলাইন বাধা বা ৰাজনৈতিক চাপত যুৱ প্ৰজন্মক হাৰ নামানিবলৈ আহ্বান জনাই তেওঁ কয় যে এই আন্দোলন সাধাৰণ যুৱক-যুৱতীসকলৰ মনৰ ক্ষোভৰ পৰা গঢ়ি উঠিছে আৰু তেওঁলোকৰ সমৰ্থনতেই ই আগবাঢ়ি যাব।
উল্লেখ্য যে যোৱা ১৫ মে’ত ভাৰতৰ মুখ্য ন্যায়াধীশ সূৰ্য কান্তৰ একাংশ নিবনুৱা যুৱকক লৈ কৰা এটা মন্তব্যক কেন্দ্ৰ কৰিয়েই এই চিজেপি বা ককৰোচ জনতা পাৰ্টীৰ জন্ম হৈছিল। ধৰ্মনিৰপেক্ষ, সমাজতান্ত্ৰিক, গণতান্ত্ৰিক আৰু এলেহুৱা— এই শ্লোগানটোক আগত ৰাখি মূলত নীট পৰীক্ষাৰ বিতৰ্ক, প্ৰশ্নকাকত ফাদিল, নিবনুৱা সমস্যা আৰু বাক-স্বাধীনতাৰ দৰে গুৰুত্বপূৰ্ণ বিষয়সমূহক মিম আৰু ধেমেলীয়া কৌতুকৰ জৰিয়তে এই প্লেটফৰ্মত তুলি ধৰা হৈছে। মেটা বা ইনষ্টাগ্ৰাম কৰ্তৃপক্ষৰ ফালৰ পৰা এই সাময়িক সমস্যাটোক লৈ এতিয়ালৈকে কোনো আনুষ্ঠানিক মন্তব্য কৰা হোৱা নাই যদিও সময়ৰ লগে লগে এই ককৰোচ বাহিনীৰ শক্তি যিদৰে বৃদ্ধি পাইছে, সি ভাৰতীয় ৰাজনীতিত এক নতুন মাত্ৰা যোগ কৰিছে।
