ভাৰতত শেহতীয়াকৈ ককৰোচ জনতা পাৰ্টী বা চিজেপি নামৰ এটা ব্যংগাত্মক ৰাজনৈতিক আন্দোলন আৰম্ভ হৈছে। ইণ্টাৰনেটত ভাইৰেল হৈ পৰা এই দলটোৱে মাত্ৰ কেইদিনমানৰ ভিতৰতে ইনষ্টাগ্ৰামত ৯ মিলিয়ন বা ৯০ লাখ ফল’ৱাৰ অতিক্ৰম কৰিছে। ইয়াৰ লগে লগে চিজেপিয়ে ২০১৪ চনৰ পৰা শাসনত থকা ভাৰতীয় জনতা পাৰ্টী অৰ্থাৎ বিজেপিক পিছ পেলাইছে। বৰ্তমান ইনষ্টাগ্ৰামত বিজেপিৰ ৮.৭ মিলিয়ন ফল’ৱাৰ থকাৰ বিপৰীতে কংগ্ৰেছৰ ১৩.২ মিলিয়ন আৰু আম আদমী পাৰ্টীৰ ১.৯ মিলিয়ন ফল’ৱাৰ আছে।
ভাৰতৰ মুখ্য ন্যায়াধীশ সূৰ্য কান্তৰ এক বিতৰ্কিত মন্তব্যৰ পিছতেই ১৬ মে’ত যুৱপ্ৰজন্মৰ প্ৰতিবাদ হিচাপে এই আন্দোলনটো আৰম্ভ হৈছিল। তাৰ পিছত ১৭ মে’ত ইনষ্টাগ্ৰামত একাউণ্ট খোলা হয় আৰু মাত্ৰ ৭৮ ঘণ্টাৰ ভিতৰত ই ৩ মিলিয়ন ফল’ৱাৰ লাভ কৰে। ২০ মে’ৰ ভিতৰত এই সংখ্যা ৯ মিলিয়ন পাৰ হৈ যায়। আটাইতকৈ আচৰিত কথাটো হ’ল যে চিজেপিয়ে মাত্ৰ ৫৪ টা প’ষ্ট কৰি এই সফলতা লাভ কৰিছে, আনহাতে বিজেপিয়ে এতিয়ালৈকে ১৮ হাজাৰৰো অধিক প’ষ্ট শ্বেয়াৰ কৰিছে। এক্স বা টুইটাৰতো এই দলটোৰ ১ লাখ ৬৫ হাজাৰৰো অধিক ফল’ৱাৰ আছে।
এই প্লেটফৰ্মটোৱে মূলতঃ নিবনুৱা সমস্যা, প্ৰশ্নকাকত ফাদিল আদিৰ দৰে বিষয়বোৰ উত্থাপন কৰি ৰাজনৈতিক সজাগতা সৃষ্টিৰ চেষ্টা কৰিছে। ইয়াৰ দ্ৰুত বৃদ্ধি দেখি ইণ্টাৰনেট ব্যৱহাৰকাৰীসকলেও বিভিন্ন ধৰণৰ প্ৰতিক্ৰিয়া প্ৰকাশ কৰিছে। বহুতে বিজেপিৰ নিৰ্বাচনী শ্ল’গান সলনি কৰি অবকী বাৰ ১০ মিলিয়ন পাৰ বুলি ধেমালি কৰা দেখা গৈছে। কিছুমান মানুহে আকৌ প্ৰশ্ন কৰিছে যে ইনষ্টাগ্ৰামৰ এই জনপ্ৰিয়তাই নিৰ্বাচনত সঁচাকৈয়ে ভোটলৈ ৰূপান্তৰিত হ’বনে। ইয়াৰ উত্তৰত দলটোৱে কৈছে যে যুৱপ্ৰজন্মৰ শক্তিক কোনেও আওকাণ কৰা উচিত নহয়।
এই ককৰোচ জনতা পাৰ্টীৰ আঁৰৰ ব্যক্তিজন হৈছে মহাৰাষ্ট্ৰৰ ঔৰংগাবাদৰ অভিজিৎ ডিপকে নামৰ এজন ৩০ বছৰীয়া যুৱক। আমেৰিকাৰ বষ্টন ইউনিভাৰ্চিটিৰ পৰা স্নাতকোত্তৰ ডিগ্ৰী লাভ কৰা অভিজিতে পূৰ্বে আম আদমী পাৰ্টীৰ ছচিয়েল মিডিয়া স্বেচ্ছাসেৱক হিচাপেও কাম কৰিছিল। অখিলেশ যাদৱ আৰু মহুৱা মৈত্ৰৰ দৰে জনপ্ৰিয় ৰাজনীতিবিদসকলেও ছচিয়েল মিডিয়াত এই আন্দোলনটোক সমৰ্থন জনাইছে। বৰ্তমানলৈকে দলটোৰ ৱেবছাইটত ১ লাখ ৬০ হাজাৰৰো অধিক লোকে পঞ্জীয়ন কৰিছে। অভিজিতে জানিবলৈ দিছে যে ৰাইজৰ সঁহাৰি আৰু পৰামৰ্শৰ ওপৰত ভিত্তি কৰি তেওঁ ভাৰতলৈ উভতি আহি এই আন্দোলনটোক বাস্তৱত আগুৱাই নিয়াৰ কথা চিন্তা কৰিব পাৰে।
