ভাৰতীয় কফি ব’ৰ্ডৰ সহযোগত ৪৩ আছাম ৰাইফলছে অসমৰ ডিমা হাছাও জিলাৰ হাফলঙস্থিত চৰকাৰী বাগানত আজি কফি গছপুলি ৰোপণ কৰি এক প্ৰশংসনীয় কাৰ্যসূচী ৰূপায়ন কৰে।
হাফলঙৰ আছাম ৰাইফলছ পাব্লিক স্কুলৰ ৫০ গৰাকী ছাত্ৰ-ছাত্ৰীৰ লগতে ৫০ জনৰো অধিক সৈনিকে হাফলঙত অনুষ্ঠিত এই কফি গছপুলি ৰোপণ কাৰ্যসূচীত উপস্থিত থাকে।
উল্লেখযোগ্য যে ৪৩ আছাম ৰাইফলছে ভাৰতীয় কফি ব’ৰ্ডৰ সহযোগত অসমৰ ডিমা হাছাও জিলাৰ হাফলঙত কফি গছপুলি ৰোপণৰ ওপৰত এটা প্ৰশিক্ষণ শিবিৰ আৰু কৰ্মশালাৰ আয়োজন কৰিছিল। আৰু এই কৰ্মশালাৰ শেষ কাৰ্যসূচী হিচাপে আজি কফি গছপুলি ৰোপণ কৰা হয়।
স্কুলীয়া ছাত্ৰ-ছাত্ৰীৰ লগতে আছাম ৰাইফলছৰ সৈনিকৰ দলটোৱে কফি ৰোপণ কাৰ্যসূচীত সম্পূৰ্ণ উৎসাহেৰে অংশগ্ৰহণ কৰি ২০০ জোপা কফি গছপুলি ৰোপণ কৰে।
৭২ সংখ্যক স্বাধীনতা দিৱস উদযাপনৰ উদ্দেশ্য আগত ৰাখিয়েই এইদৰে ৪৩ আছাম ৰাইফলছে এনেধৰণৰ প্ৰশংসনীয় পদক্ষেপ গ্ৰহণ কৰা পৰিলক্ষিত হৈছে।
