অসম চৰকাৰৰ কেবিনেট মন্ত্ৰীয়ে বিধায়ক পুঁজি লগাইছে খ্ৰীষ্টান ধৰ্ম প্ৰসাৰত : প্ৰাক্তন আৰ এছ এছ নেতা
বিজেপি নেতৃত্বাধীন অসম চৰকাৰৰ এজন কেবিনেট মন্ত্ৰী ৰিহন দৈমাৰীয়ে স্থানীয় এলেকা উন্নয়নৰ পুঁজি খ্ৰীষ্টান ধৰ্ম প্ৰসাৰত ব্যৱহাৰ কৰিছে বুলি গুৰুতৰ অভিযোগেৰে বিধানসভাৰ অধ্যক্ষলৈ পত্ৰ প্ৰেৰণ কৰিছে লিগেল ৰাইটছ অবজাৰ্ভেটৰি (Legal Rights Observatory) নামৰ সংগঠন এটাই।
লিগেল ৰাইটছ অবজাৰ্ভেটৰি আৰ এছ এছৰ সৈতে সম্পৰ্কিত আৰু সংগঠনটোৰ মুৰব্বী বিনয় যোশী এজন প্ৰাক্তন আৰ এছ এছ কৰ্মী।
যোশীয়ে মুম্বাই ঠিকনাৰ পৰা প্ৰেৰণ কৰা এই পত্ৰখনৰ একোটা প্ৰতিলিপি সংবাদ মাধ্যমলৈও প্ৰেৰণ কৰিছে।
“ওদালগুৰিৰ বিধায়ক আৰু অসমৰ কেবিনেট মন্ত্ৰী ৰিহন দৈমাৰীয়ে বিধায়কৰ স্থানীয় এলেকা উন্নয়ন পুঁজি অপব্যৱহাৰ কৰি ওদালগুৰি আৰু দাঁতিকাষৰ অঞ্চলবোৰত ধৰ্মান্তৰকৰণক উৎসাহিত কৰিবলৈ ব্যৱহাৰ কৰাৰ অভিযোগ উঠিছে। ৰিহন দৈমাৰীৰ সহায়ত গীৰ্জাৰ আগ্ৰাসন ইমান প্ৰবল হৈ পৰিছে যে স্থানীয় বাথৌ ধৰ্ম অস্তিত্বৰ সংকটত পৰিছে”, পত্ৰখনত দাবী যোশীৰ।
তেওঁৰ মতে, মন্ত্ৰীজনৰ সক্ৰিয় সহযোগিতাত ৱৰ্ল্ড ভিজন আৰু নৰ্থ ইষ্টাৰ্ন ছ’চিয়েল ৰিছাৰ্চ চেণ্টাৰ, গুৱাহাটীৰ অধীনত ধৰ্মান্তৰকৰণ চলি আছে।
মুখ্য মন্ত্ৰীৰ পৰিৱৰ্তে বিধানসভাৰ অধ্যক্ষলৈ পত্ৰ লিখাৰ কাৰণ ব্যাখ্যা কৰি যোশীয়ে লিখিছে যে ৰাজ্যৰ বৰ্তমানৰ গৃহ মন্ত্ৰীজনৰ সাহস নাই বাবেই তেওঁ অধ্যক্ষক অনুৰোধ জনাইছে।
তেওঁ কয়, “অনুগ্ৰহ কৰি বড়োলেণ্ডক আন এখন নাগালেণ্ড হোৱাৰ পৰা বচাবলৈ উক্ত বিধায়কজনৰ পুঁজি অপব্যৱহাৰৰ চি বি আই তদন্ত দিয়ক।”
বড়োলেণ্ডত কাঠফুলাৰ দৰে গজি উঠা গীৰ্জাবোৰলৈ অহা পুঁজিৰ উৎসৰ অনুসন্ধান কৰিবলৈ ৰাজ্যখনৰ ডি জি পিক নিৰ্দেশ দিয়াৰ বাবেও যোশীয়ে পত্ৰখনত অনুৰোধ জনায়।
যদি বড়োলেণ্ডত খ্ৰীষ্টান ধৰ্ম প্ৰসাৰৰ বাবে বিধায়ক পুঁজিৰ অপব্যৱহাৰ হোৱাটো প্ৰমাণিত হয়, তেন্তে বিধায়কজনক অযোগ্য ঘোষণা কৰাৰ লগতে তেওঁৰ কাৰ্য্যকালত অপব্যৱহাৰ হোৱা পুঁজিৰ সমস্ত ধন পুনৰুদ্ধাৰ কৰিবলৈ আহ্বান জনায় যোশীয়ে।