প্ৰধানমন্ত্ৰী নৰেন্দ্ৰ মোডী নেতৃত্বাধীন বিজেপি চৰকাৰৰ আমোলত পেট্ৰ’ল, ডিজেল, ৰন্ধন গেছকে ধৰি অত্যাৱশ্যকীয় সামগ্ৰীৰ অস্বাভাৱিক মূল্যবৃদ্ধি আৰু ৰাফেল যুদ্ধ বিমান ক্ৰয় কেলেংকাৰিৰ প্ৰতিবাদত নিখিল ভাৰত কংগ্ৰেছ কমিটিয়ে আজি আহ্বান জনোৱা ১০ ঘন্টীয়া ভাৰত বন্ধৰ সৰ্বাত্মক প্ৰভাৱ পৰে বৰপেটা চহৰত।
এই বন্ধৰ সময়ছোৱাত যান বাহনৰ চলাচল বন্ধ হোৱাৰ লগতে বৰপটা বৰবজাৰকে ধৰি আটাইবোৰ ব্যৱসায়িক প্ৰতিষ্ঠান সম্পূৰ্ণৰূপে বন্ধ হৈ পৰে ৷ যান বাহনৰ চলাচল বন্ধ হোৱাৰ ফলত সাধাৰণ ৰাইজৰ লগতে বৰপেটা চিকিৎসা মহাবিদ্যালয় হাস্পতালৰ ৰোগী আৰু অভিভাৱকসকল ভীষণ অসুবিধাত পৰে।
ইপিনে বৰপেটা চহৰত থকা “বাজাৰ ইণ্ডিয়া” নামৰ ব্যৱসায়িক প্ৰতিষ্ঠানখন পুৱাৰ পৰাই বন্ধ থকা বাবে দিনৰ প্ৰায় ১০ মান বজাত বিজিপি দলৰ একাংশ কৰ্মীয়ে প্ৰতিষ্ঠানখনৰ কৰ্মচাৰীক ব্যৱসায়িক প্ৰতিষ্ঠানখন খুলিবলৈ ধমকি দিয়ে। ইয়াকে লৈ বিজেপি আৰু বন্ধৰ সমৰ্থক সকলৰ মাজত যুক্তি তৰ্ক হয় যদিও দণ্ডাধীশৰ উপস্থিতিত আৰক্ষীয়ে পৰিস্থিতি নিয়ন্ত্ৰণ কৰে ৷
চহৰখনত যান বাহনৰ চলাচল বন্ধ হোৱাৰ ফলত অফিচ-কাছাৰী একপ্ৰকাৰ জনশূন্য হৈ পৰে ৷ অৱশ্যে চহৰখনত দুই এখন ব্যক্তিগত বাহন চলাচল কৰা পৰিলক্ষিত হয় ৷
বৰপেটা চহৰৰ ব্যৱসায়িক প্ৰতিষ্ঠানৰ একাংশ স্বত্বাধিকাৰীয়ে “নৰ্থ ইষ্ট নাও”ৰ এই প্ৰতিবেদকক জনায় যে, কংগ্ৰেছ দলক সমৰ্থন কৰি তেওঁলোকে বন্ধ পালন কৰা নাই ৷ বন্ধৰ ফলত কেন্দ্ৰীয় চৰকাৰে যাতে চৰকাৰে পেট্ৰ’ল, ডিজেল, ৰন্ধন গেছ আদি অত্যাৱশ্যকীয় সামগ্ৰীৰ মূল্য হ্ৰাস কৰাৰ সিদ্ধান্ত লয় তাৰ বাবেহে তেওঁলোকে এই বন্ধৰ প্ৰতি সমৰ্থন জনাইছে ৷
আনহাতে, বন্ধৰ সমৰ্থকসকলে জনীয়াত প্ৰধান মন্ত্ৰী নৰেন্দ্ৰ মোডীৰ পুত্তলিকা দাহ কৰি তীব্ৰ প্ৰতিবাদ সাব্যস্ত কৰে।
