ভোটগ্ৰহণৰ দিনাই আফ্ৰিকান দেশ কংগো-ব্ৰাজ্জাভিলেৰ ৰাষ্ট্ৰপতি নিৰ্বাচনৰ প্ৰাৰ্থী ক’ৰ’ণাত আক্ৰান্ত গে-ব্ৰীছ পাৰ্ফেইট ক’লেলাছৰ হৈছে।
বিবিচিৰ বাতৰিৰ মতে ক’ৰ’ণাক্ৰান্ত নেতাগৰাকীক চিকিৎসাৰ বাবে ফ্ৰান্সলৈ নিয়াৰ পথত বিমানতে মৃত্যু হৈছে।
উল্লেখ্য যে দেওবাৰে দেশখনত ৰাষ্ট্ৰপতি নিৰ্বাচনৰ ভোটগ্ৰহণ অনুষ্ঠিত হৈছিল।
৬১ বছৰীয়া গে-ব্ৰীছ পাৰ্ফেইট ক’লেলাছে ৰাষ্ট্ৰপতি ডেনিছ চাচৌ নগুৱেচ্চৌৰ বিৰুদ্ধে নিৰ্বাচনত অৱতীৰ্ণ হৈছিল। উল্লেখ্য যে যোৱা ২০১৬ চনতো দেশখনৰ ৰাষ্ট্ৰপতি নিৰ্বাচনত প্ৰতিদ্বন্দ্বিতা কৰি ক’লেলাছ পৰাজিত হৈছিল।
মৃত্যুৰ কেইঘণ্টামানৰ পূৰ্বে চ’ছিয়েল মিডিয়াত ক’লেলাছৰ এটা ভিডিঅ’ শ্বেয়াৰ কৰা হৈছিল আৰু ভিডিঅ’টোত মুখত থকা অক্সিজেন মাস্কটো এৰুৱাই দেশখনৰ ভোটাৰৰ লগতে অনুৰাগীসকলক তেওঁৰ পক্ষে ভোটদান কৰিবলৈ আহ্বান কৰা দেখা গৈছিল।
চিকিৎসালয়ৰ বিচনাৰ পৰা ফৰাচী ভাষাত ক’লেলাছে কৈছিল, “মোৰ মৰমৰ দেশবাসী, মই সমস্যাত আছো। মই মৃত্যুৰ সৈতে যুঁজি আছো। মই আপোনালোকক পৰিৱৰ্তনৰ পক্ষেত ভোটদান কৰিবলৈ আহ্বান জনাইছো।”
ইফালে সংবাদ সংস্থা এচ’ছিয়েট প্ৰেছৰ বাতৰি অনুসৰি যোৱা শুকুৰবাৰে ক’লেলাছে মেলেৰিয়াত আক্ৰান্ত হোৱাৰ আশংকা কৰি তেওঁৰ শেষৰখন নিৰ্বাচনী প্ৰচাৰ সভা বাতিল কৰি নিৰ্বাচনী প্ৰচাৰ সামৰণি মাৰিছিল।
উল্লেখ্য যে অসুস্থ হৈ পৰাৰ পিছতে ক’লেলাছক এখন ব্যক্তিগত চিকিৎসালয়ত ভৰ্তি কৰোৱা হৈছিল আৰু পিছত তেওঁ কোভিড১৯ত আক্ৰান্ত হোৱা বুলি চিকিৎসকে ঘোষণা কৰিছিল। ইয়াৰ পিছতে ক’লেলাছক দেওবাৰে উন্নত চিকিৎসাৰ বাবে ফ্ৰান্সলৈ নিয়া হৈছিল।
ইফালে দেশখনত নিৰ্বাচনী প্ৰচাৰ সভাবোৰত সমবেত হোৱা জনতাই সামাজিক দূৰত্ব মানি নচলাৰ লগতে মুখত মাস্ক পৰিধানো নাছিল।
স্মৰ্তব্য যে দেশখনত বৰ্তমানলৈকে ১০ হাজাৰ লোক ক’ৰ’ণাত আক্ৰান্ত হোৱাৰ বিপৰীতে ১৩০ গৰাকী ক’ৰ’ণাক্ৰান্তৰ মৃত্যু হৈছে।
