আদালতৰ এটা গোচৰত ডি এইচ্ছ ডি জুৱেল গোটৰ প্ৰাক্তন সদস্য মুপিট ৰাজিয়ুং ওৰফে একশ্যন ডিমাছাই দিয়া সাক্ষ্য ৰাজহুৱা হোৱাৰ পিছত পাৰ্বত্য জিলাৰ ৰাজনীতি উত্তপ্ত কৰি তোলাৰ পিছত দিচপুৰৰ ৰাজনীতিতো তাৰ প্ৰভাৱ পৰা দেখা গ’ল।
আজি অসম প্ৰদেশ কংগ্ৰেছ কমিটীয়ে এসময়ৰ উগ্ৰপন্থী নেতা আৰু বৰ্তমানৰ উত্তৰ কাছাৰ পাৰ্বত্য স্বায়ত্তশাসিত পৰিষদৰ মুখ্য কাৰ্যবাহী সদস্য দেৱলাল গাৰ্লোচাক পদচ্যুত কৰাৰ দাবী উত্থাপন কৰে ৰাজ্যপালৰ ওচৰত।
হত্যা আৰু ধনদাবীত অভিযুক্ত দেৱলাল গাৰ্লোছা ওৰফে ডেনিয়েল ডিমাছাৰ অপসাৰণ বিচাৰি শনিবাৰে ৰাজ্যপালক সাক্ষাৎ কৰে বিৰোধী দলপতি দেৱব্ৰত শইকীয়াৰ নেতৃত্বত যোৱা কংগ্ৰেছৰ এটা সঁজাতী দলে।
ইয়াৰ পাছতেই গুৱাহাটীৰ ৰাজীৱ ভৱনত এখন সংবাদমেল অনুষ্ঠিত কৰি দেৱব্ৰত শইকীয়াই কয়, “কিছু বছৰ পূৰ্বে উত্তৰ কাছাৰ পাৰ্বত্য স্বায়ত্তশাসিত পৰিষদৰ তদানীন্তন মুখ্য কাৰ্যবাহী সদস্য পূৰ্ণেন্দু লাংথাছা আৰু তেওঁৰ ভাতৃ নিন্দু লাংথাছাক অতি নিৰ্মমভাৱে হত্যা কৰা হৈছিল। ইয়াৰ পূৰ্বে আন এজন ব্যক্তিৰ পৰা ৫০ লাখ টকা লোৱাৰ পিছত তেওঁক আৰু তেওঁৰ ব্যক্তিগত নিৰাপত্তাৰক্ষীজনকো হত্যা কৰা হৈছিল।
এই আটাইকেইটা ঘটনা বৰ্তমানৰ মুখ্য কাৰ্যবাহী সদস্য দেৱলাল গাৰ্লোচাই সংঘটিত কৰা বুলি শপতনামাযোগে আদালতত সাক্ষ্য প্ৰদান কৰা হৈছিল।
যিহেতু স্বায়ত্তশাসিত পৰিষদৰ নিয়ন্ত্ৰণৰ সম্পূৰ্ণ কৰ্তৃত্ব ৰাজ্যপালৰ হাতত থাকে গতিকে এই ঘটনাসমূহৰ মূল অভিযুক্তজন মুখ্য কাৰ্যবাহী সদস্য হৈ থকা বিষয়টো ৰাজ্যপালক অৱগত কৰি তেওঁক অপসাৰণ কৰাৰ দাবী জনাইছো।”
শইকীয়াই লগতে সংবিধানৰ ৬ষ্ঠ অনুসূচীৰ ১৪ নম্বৰ দফা অনুসৰি ৰাজ্যপালে এই ঘটনাৰ ৰাজ্যপালে নিজাববীয়া তদন্ত কৰি দোষীয়ে যাতে শাস্তি পায় তাৰ যাবতীয় ৱ্যৱস্থা গ্ৰহণ কৰিবলৈ অনুৰোধ জনায়।
উল্লেখ্য যে, উত্তৰ কাচাৰ পাৰ্বত্য স্বায়ত্ব শাসিত পৰিষদৰ কাৰ্যকাল ইতিমধ্যই উকলি গৈছে। কিন্তু সময়ত নিৰ্বাচন অনুষ্ঠিত কৰিব নোৱাৰাৰ বাবে ৰাজ্যপালে ইয়াৰ কাৰ্যকাল সম্প্ৰসাৰণ কৰিছিল।
আজি কংগ্ৰেছৰ প্ৰতিনিধি দলটোৱে ৰাজ্যপালৰ ওচৰত পৰিষদখন অতি শীঘ্ৰে ভংগ কৰি পুনৰ নিৰ্বাচন অনুষ্ঠিত কৰাৰো দাবী উত্থাপন কৰে।
উল্লেখযোগ্য যে হাফলঙৰ সত্ৰ ন্যায়াধীশৰ আদালতত ডি এইচ্ছ ডি জুৱেল গোটৰ প্ৰাক্তন সদস্য মুপিট ৰাজিয়ুং ওৰফে একশ্যন ডিমাচাই উত্তৰ কাছাৰ পাৰ্বত্য স্বায়ত্ত শাসিত পৰিষদৰ তদানীন্তন মুখ্য কাৰ্যবাহী সদস্য তথা কংগ্ৰেছ নেতা পূৰ্ণেন্দু লাংথাচা আৰু কাৰ্যবাহী সদস্য নিন্দু লাংথাচাক দেৱলাল গাৰ্লোচাই নিজে হত্যা কৰিছিল বুলি স্বীকাৰ কৰে আৰু সেই সময়ত মুপিট ঘটনাস্থলীত আছিল। ঘটনাটো ঘটিছিল ২০০৭ চনৰ ২৭ এপ্ৰিলত।
যোৱা ১০ আগষ্টত একেটা কাৰণতে হাফলঙত ডিমা হাচাও জিলা কংগ্ৰেছেও এখন সংবাদমেল পাতি বিজেপি শাসিত স্বায়ত্ত পৰিষদৰ মুখ্য কাৰ্যবাহী দেবলাল গাৰ্লোচাক অপসাৰণৰ দাবী তুলিছিল।
