কংগ্ৰেছে অসমত আগন্তুক বিধানসভা নিৰ্বাচনত বিজেপিক ৰুধিবলৈ কেইবাখনো সমিতি গঠন কৰিছে।
দলটোৱে গঠন কৰা সমিতিবোৰৰ ভিতৰত আছে নিৰ্বাচন সমিতি, ইস্তাহাৰ সমিতি, ব্যৱস্থাপনা সমিতি, সমন্বয় সমিতি, প্ৰচাৰ সমিতি আৰু মিডিয়া সমিতি।
দলৰ ৰাষ্ট্ৰীয় অধ্যক্ষ ছোনিয়া গান্ধীয়ে অসম প্ৰদেশ কংগ্ৰেছৰ সভাপতি ৰিপুণ বৰাক ৰাজ্যিক নিৰ্বাচন সমিতি আৰু সমন্বয় সমিতিৰ অধ্যক্ষ হিচাপে নিযুক্ত কৰিছে। এই সমিতিত আন ২৩ জন সদস্য থাকিব।
আনহাতে প্ৰচাৰ সমিতিৰ নেতৃত্বত নগাঁৱৰ সাংসদ প্ৰদ্যুত বৰদলৈ থাকিব য’ত আন ৪৯জন সদস্য আছে।
প্ৰাক্তন মন্ত্ৰী ৰকিবুল হুছেইনক প্ৰচাৰ সমিতিৰ অধ্যক্ষ নিযুক্ত কৰা হৈছে আনহাতে কলিয়াবৰৰ সাংসদ গৌৰৱ গগৈক ইস্তাহাৰ সমিতিৰ নেতৃত্ব প্ৰদান কৰিছে।
ইফালে বিজেপি এৰি কংগ্ৰেছত যোগদান কৰা প্ৰাক্তন সাংসদ ৰাম প্ৰসাদ শৰ্মাক নিৰ্বাচন ব্যৱস্থাপনা সমিতিৰ মুৰব্বী আৰু বৰপেটাৰ সাংসদ আব্দুল খালেকক মিডিয়া ইনচাৰ্জৰ দায়িত্ব প্ৰদান কৰা হৈছে।
মহিলা কংগ্ৰেছৰ সভাপতি সুস্মিতা দেৱক আউটৰিচ সমিতিৰ অধ্যক্ষ নিযুক্ত কৰা হৈছে।
উল্লেখ্য যে অসমত বিজেপিক শাসনৰ পৰা ওফৰাবলৈ কংগ্ৰেছ দলৰ নেতৃত্বত যোৱা ১৯ জানুৱাৰিত পাঁচটা দলৰ ‘মহাজোঁটবন্ধন’ গঠন হৈছিল।
শেহতীয়াকৈ, দলৰ শীৰ্ষ তিনিজন কেন্দ্ৰীয় নেতা ক্ৰমে ভূপেশ বাঘেল (ছত্তীশগড়ৰ মুখ্য মন্ত্ৰী), মুকুল ৱাচনিক (এআইচিচিৰ সাধাৰণ সম্পাদক) আৰু চাকিল আহমেদ খান (বিহাৰ বিধায়ক)ক অসমত নিৰ্বাচনী প্ৰচাৰৰ চোৱা-চিতা কৰিবলৈ নিযুক্ত কৰিছিল।