বোকাখাত ব্লক কংগ্রেছৰ সধাৰণ সম্পাদক জিতু শইকীয়াই বোকাখাত বিধান সভা সমষ্টিৰ বিধায়ক তথা কৃষিমন্ত্রী অতুল বৰাই তেওঁৰ শাসন কালত সমষ্টিবাসীক প্রতাৰণা কৰা বুলি অভিযোগ উত্থাপন কৰিছে।
এই সন্দর্ভত সংবাদ মাধ্যমলৈ প্রেৰণ কৰা এটা বিবৃতিত জিতু শইকীয়াই বোকাখাতৰ জনসাধাৰণৰ দাবীত অসম চৰকাৰৰ প্রস্তাৱিত সতী সাধনী বিশ্ববিদ্যালয় খন বোকাখাতত স্থাপন কৰাৰ বাবে মন্ত্ৰী অতুল বৰাই প্রতিশ্রুতি দিছিল যদিও শেহতীয়াকৈ বিশ্ববিদ্যালয়খন গোলাঘাটতহে নিৰ্মাণৰ কৰাৰ বাবে অতুল বৰা সক্ৰিয় হৈছে বুলি মন্তব্য কৰিছে।
বোকাখাত ব্লক কংগ্ৰেছৰ সাধাৰণ সম্পাদক গৰাকীৰ মতে বোকাখাতৰ মহুৰা পথাৰত অনুষ্ঠিত হৈ যোৱা শংকৰদেৱ সংঘৰ ৮৯ সংখ্যক অধিবেশনত অসমৰ মুখ্য মন্ত্রী সর্বানন্দ সোনোৱাল, স্বাস্থ্য মন্ত্রী হিমন্ত বিশ্ব শর্মাই বোকাখাতৰ বৌদ্ধিক মহলৰ ওচৰত সতী সাধনী বিশ্ব বিদ্যালয় বোকাখাতত হ’ব বুলি প্রতিশ্রুতি দিছিল।
কিন্তু বোকাখাত সমষ্টিৰ ৰাইজৰ ভোটেৰে বিধায়ক তথা মন্ত্রী হ’বলৈ সক্ষম হোৱা অতুল বৰাই সমষ্টিবাসী ৰাইজ তথা বোকাখাতৰ হাজাৰ হাজাৰ নিবনুৱাক প্রতাৰণা কৰি তেওঁলোকৰ নায্য দাবীক বৃদ্ধাংগুষ্ঠ প্রদর্শন কৰি শেহতীয়াকৈ সতী সাধনী বিশ্ববিদ্যালয়খন গোলাঘাটতহে স্থাপন কৰিবৰ বাবে উঠি পৰি লাগিছে ৷
উল্লেখযোগ্য যে অলপতে বোকাখাত সমষ্টিৰ বনগাঁৱত সতী সাধনীৰ প্ৰতিমূৰ্ত্তি স্থাপন কৰি দিয়া ভাষণত তেওঁ এই কথা প্রকাশ কৰিছে ।
জিতু শইকীয়াৰ বিবৃতি মতে বোকাখাতৰ বিধায়ক তথা কৃষি মন্ত্রী অতুল বৰাই বিগত সময়ত সমষ্টিটোৰ কৃষক ৰাইজৰ উন্নয়নৰ বাবেও কোনো ফলপ্রসূ কাৰ্য্য ব্যবস্থা হাতত লোৱা দেখা নগল ৷ যাৰ বাবে এতিয়া ক্ষুভিত সমষ্টিৰ কৃষক সকলো ৷
বোকাখাত সমষ্টিত নিজৰ নিশ্চিত পৰাজয়ৰ উমান পাই অতুল বৰাই গোলাঘাটত নিজৰ ৰাজনৈতিক ভৱিষ্যত সুৰক্ষিত ৰখাৰ স্বার্থতেই বোকাখাতৰ ৰাইজক এনেদৰে বঞ্চিত কৰিছে বুলিও মন্তব্য কৰিছে জিতু শইকীয়াই ৷
অতুল বৰাৰ এনে সিধান্তৰ তীব্র বিৰোধিতা কৰাৰ লগতে তেওঁৰ সিদ্ধান্ত বাতিল কৰি সতী সাধনী বিশ্ব বিদ্যালয় বোকাখাতত স্থাপন কৰিবলৈ ব্লক কংগ্ৰেছৰ সম্পাদক গৰাকীয়ে দাবী জনাইছে ।
জিতু শইকীয়াৰ মতে বোকাখাতত এই সতী সাধনী বিশ্ববিদ্যালয়খন প্রতিষ্ঠা হ’লে বোকাখাত সমষ্টিৰ বহু নিবনুৱা যুবক যুৱতী উপকৃত হ’ব । প্রত্যক্ষ আৰু পৰোক্ষভাৱে সহস্ৰাধিক লোকে কৰ্ম সংস্থাপন পাব।
কিন্তু বোকাখাতৰ ৰাইজৰ মুৰত ৰামটাঙোন শোধাই অতুল বৰাই যি ৰাজনীতি কৰিছে তাক অনতি পলমে বন্ধ কৰিবলৈ দাবী জনাই যুৱ কংগ্ৰেছী জিতু শইকীয়াই।
তেওঁ লগতে বোকাখাতৰ ৰাইজকো এই ক্ষেত্রত এক আপোচবিহীন স্থিতি গ্রহণ কৰি নিজৰ নায্য প্রাপ্য আজুৰি আনিবলৈ আহ্বান জনায়।
