গোৱালপাৰা জিলাত দ্বিতীয় পৰ্যায়ত অনুষ্ঠিত হ’বলগীয়া পঞ্চায়ত নিৰ্বাচনৰ বতাহে উত্তাল কৰি তুলিছে সমগ্ৰ কৃষ্ণাই অঞ্চল। দলীয় প্ৰাৰ্থীৰ লগতে নিৰ্দলীয় প্ৰাৰ্থীসকলে নিৰ্বাচনী প্ৰচাৰ অভিযান জোৰদাৰ কৰা সময়তে বিৰোধী দল কংগ্ৰেছেও বিভিন্ন ঠাইত সভা অনুষ্ঠিত কৰি প্ৰাৰ্থীসকলৰ হৈ প্ৰচাৰ অভিযান চলাই আছে।
মঙলবাৰে সন্ধিয়া কৃষ্ণাই চাৰিআলিত কংগ্ৰেছ দলৰ এখন নিৰ্বাচনী সভা অনুষ্ঠিত হয়। দুধনৈ ডায়েটৰ অৱসৰপ্ৰাপ্ত অধ্যক্ষ জাফৰ আলী আহমেদৰ সভাপতিত্বত অনুষ্ঠিত সভাখনত উপস্থিত থাকে প্ৰদেশ কংগ্ৰেছৰ সম্পাদক মানস বৰা।
প্ৰায় পাঁচ শতাধিক সমৰ্থক উপস্থিত থকা সভাখনত মানস বৰাই ভাষণ প্ৰসংগত শাসকীয় বিজেপি তথা অগপক তীব্ৰ সমালোচনা কৰে।
পৰিৱৰ্তনৰ প্ৰতিশ্ৰুতিৰে শাসনৰ গাদীত বহা বিজেপি চৰকাৰখনে কি পৰিৰ্ৱতন আনিলে সেই কথা আজি আৰু অসম বাসীক নতুকৈ ক’ব লগা একো নাই। নিৰ্বাচনৰ পিছ দিনাই বিদেশী খেদিব বিছৰা বিজেপি দলে এতিয়া বিদেশী অনাৰ কথাহে চিন্তা কৰিছে বুলি উল্লেখ কৰি মানস বৰাই দ্বিতীয় পৰ্যায়ৰ নিৰ্বাচনত কংগ্ৰেছ দলক ভোট দান কৰাৰ বাবে আহ্বান জনায়।
