কংগ্ৰেছ নেতা কানহায়া কুমাৰে শনিবাৰে (৪ অক্টোবৰ) নিৰ্বাচনমুখী বিহাৰৰ ভাগলপুৰ জিলাৰ পিৰপাইন্টিত নিৰ্মাণ হ’বলগীয়া তাপ বিদ্যুৎ কেন্দ্ৰৰ কথা উল্লেখ কৰি চৰকাৰ ক্ষুৰধাৰ সমালোচনা কৰে। তেঁও কয় যে ভোট চোৰ চৰকাৰখনে এইবাৰ মাটি চোৰ কৰিবলৈ ওলাইছে।
পাটনাস্থিত কংগ্ৰেছৰ মুখ্য কাৰ্যালয়ত সংবাদ মাধ্যমক সম্বোধন কৰি নেতাগৰাকীয়ে প্ৰশ্ন কৰে যে“ কিছু সময়ৰ পৰা বিহাৰত ভূমি জৰীপ চলি থকাৰ কথা চলি আছিল, আৰু মানুহে নিজৰ মাটিৰ কাগজ-পত্ৰ হাতত লৈ স্থানীয় চৰকাৰী কাৰ্যালয়ৰ দুৱাৰে-দুৱাৰে ঘূৰি আছিল, কিন্তু চৰকাৰৰ আচল উদ্দেশ্য আছিল দখল কৰিবলগীয়া মাটি চিনাক্ত কৰি এই ভূমি ব্যৱসায়ী বন্ধুৰ হাতত গতাই দিয়া। ভাগলপুৰৰ ১০০০ একৰৰো অধিক মাটি বিদ্যুৎ প্ৰকল্পৰ বাবে আদানীক প্ৰতি একৰত ১ টকাৰ হাৰত কিয় দিয়া হ’ল?”
কানাহায়াই লগতে উল্লেখ কৰে যে শক্তি প্ৰকল্পটো পূৰ্বৰ ইউনাইটেড প্ৰগ্ৰেছিভ এলায়েন্স (ইউপিএ) চৰকাৰে আৰম্ভ কৰিছিল যদিও পিছলৈ, ইয়াক কাৰ্যতঃ “সন্দেহজনক চৰ্তত” আদানী গোটক গতাই দিয়া হ’ল।
ইয়াৰ পূৰ্বে কংগ্ৰেছ নেতা পৱন খেৰাই অভিযোগ কৰিছিল যে যেতিয়াই আৰু য’তেই বিধানসভাৰ নিৰ্বাচন আহে আৰু বিজেপিয়ে নিৰ্বাচনত পৰাস্ত হোৱা যেন অনুভৱ কৰে, তেতিয়াই আদানীক এনে উপহাৰ দিয়ে।
খেৰাই কয়‘ইয়াৰ বাবে বিজেপিয়ে এক বিশেষ আৰ্হি মানি চলে। মহাৰাষ্ট্ৰ, ঝাৰখণ্ড আৰু ছত্তীশগড়ত বিধানসভা নিৰ্বাচনৰ পূৰ্বে আদানী গ্ৰুপক এইদৰেই শক্তি প্ৰকল্প দিয়া হৈছিল। যেতিয়া তেওঁলোকে (বিজেপি) নিৰ্বাচনত পৰাস্ত হ’ব বুলি অনুভৱ কৰে, তেতিয়াই আদানী গোটক এনে উপহাৰ দিয়া হয়।’
লগতে প্ৰকল্পটোৰ বাবে চুক্তিবদ্ধ হোৱা শক্তি বিতৰণৰ দৰৰ ওপৰতো কানহায়াই প্ৰশ্ন উত্থাপন কৰে। তেওঁ লক্ষ্য কৰে যে, “অন্য ৰাজ্যত আদানী গ্ৰুপে প্ৰতি ইউনিটত ৩ৰ পৰা ৩.৫ টকাৰ নিৰ্দিষ্ট হাৰত শক্তিৰ চুক্তি লৈছে, কিন্তু বিহাৰত তেওঁলোকক প্ৰতি ইউনিটত ৬ টকাৰ দৰত চুক্তি প্ৰদান কৰা হৈছে।”
উল্লেখ্য যে, পাঁচ বছৰৰ ভিতৰত এই প্ৰকল্প আৰম্ভ হোৱাৰ সম্ভাৱনা আছে। বিহাৰৰ মুখ্যমন্ত্ৰী নীতিশ কুমাৰ নেতৃত্বাধীন নেশ্যনেল ডেম’ক্ৰেটিক এলায়েন্স (এন ডি এ) চৰকাৰে ভাগলপুৰ জিলাৰ পিৰপাইন্টিত ২৪০০ মেগাৱাটৰ অতি জটিল তাপ বিদ্যুৎ প্ৰকল্পৰ বাবে ১০৫০ একৰ মাটি “হস্তান্তৰ” কৰাৰ অভিযোগ উত্থাপন হৈছে।
ইয়াৰ পূৰ্বেও কোৱা হৈছিল যে বিহাৰৰ ৰাজধানী পাটনাৰ পৰা প্ৰায় ৩০০ কিলোমিটাৰ দূৰত্বত থকা ভাগলপুৰ জিলাৰ পিৰপাইন্তিত আগন্তুক তাপ শক্তি প্ৰকল্পৰ পৰা বিদ্যুৎ যোগানৰ বাবে বিহাৰ ষ্টেট পাৱাৰ জেনেৰেচন কোম্পানী লিমিটেডৰ সৈতে ২৫ বছৰীয়া শক্তি যোগান চুক্তি (পি এছ এ) স্বাক্ষৰ কৰা হৈছে। আগষ্ট মাহত বিএছপিজিচিএলে আদানী পাৱাৰলৈ জাৰি কৰা লেটাৰ অৱ এৱাৰ্ড (এলঅ’এ)ৰ পাছত এই চুক্তি সম্পাদন কৰা হৈছিল।
