‘২১ত কংগ্ৰেছৰ মহাজোঁটে চৰকাৰ কৰিব। বিজেপিৰ ১০০+ ৰ ঠাইত ১০০- হ’ব। মহাজোঁটে ১০০ আসন লৈ আমি চৰকাৰ কৰিম।‘ ৰাজীৱ ভৱনত সম্বোধন কৰা এক সংবাদমেলত এই দাবী কৰে প্ৰাক্তন কংগ্ৰেছী মন্ত্ৰী ৰকিবুল হুছেইনে।
উল্লেখযোগ্য যে, ২০২১ৰ বিধানসভা নিৰ্বাচনৰ দিন চমু চাপি অহাৰ লগতে বিজেপি আৰু কংগ্ৰেছৰ মাজত বাকযুদ্ধ তুংগত উঠা পৰিলক্ষিত হৈছে। এদিন যদি বিজেপিয়ে ১০০+ আসন লৈ চৰকাৰ গঠন কৰাৰ কথা ঘোষণা কৰে আনদিনা আকৌ ‘মহাজোঁট’ৰ সহায়ৰে ১০০+ আসন লৈ চৰকাৰ গঠন কৰাৰ কথা ঘোষণা কৰে কংগ্ৰেছে।
সেই একেই দাবীয়ে আজি কৰিলে বিৰোধী দলৰ উপ দলপতি ৰকিবুল হুছেইনে।
ইপিনে, এআইয়ুডিএফৰ উপৰিও চিপিআই, চিপিআই(এম)ৰ সৈতে মিত্ৰতাৰ আনুষ্ঠানিক আলোচনা অনুষ্ঠিত কৰিব বুলি ঘোষণা কৰে ৰকিবুলে।
সংবাদমেলত তেওঁ কয় ‘অতি কম দিনৰ ভিতৰত কংগ্ৰেছৰ সৈতে বিভিন্ন জাতি-জনগোষ্ঠীৰ মিত্ৰতা হ’ব। অতি সোনকালে প্ৰথমে দেউৰী জনগোষ্ঠীৰ লগত মিত্ৰতা হ’ব। চিপিআই, চিপিএমৰ নেতাই কংগ্ৰেছলৈ মিত্ৰতাৰ বাবে চিঠি পঠাইছে। কাইলৈৰ পৰা আনুষ্ঠানিকভাৱে কথা-বতৰা আৰম্ভ হ’ব।‘
তদুপৰি, ৬ জনগোষ্ঠীৰ সকলোৰে মনবোৰ বেয়া বুলি উল্লেখ কৰি ৰকিবুলে কয় ‘টেঙা আম এবাৰ বেচিব পাৰে। তেওঁলোকে বাজেটত বিভিন্ন প্ৰতিশ্ৰুতি দি পূৰণ কৰিব নোৱাৰি এতিয়া যি টি বকিবলৈ আৰম্ভ কৰিছে।‘
‘তেওঁলোকে মেডিকেল কলেজৰ আধাৰশিলা স্থাপন কৰিব আৰু আমি মহাজোঁটৰ চৰকাৰে সেয়া সম্পূৰ্ণ কৰিম। কংগ্ৰেছে কেতিয়াও নিৰ্বাচন কেন্দ্ৰিক ৰাজনীতি নকৰে।‘ তেওঁ লগতে দাবী কৰি কয়।
ইপিনে, উন্নয়ন কোনে কিমান কৰিলে তাক লৈ নিৰ্বাচনী প্ৰচাৰ চলাব লাগে বুলি উল্লেখ কৰি হুছেইনে কয় ‘তুচ্ছ-তাছিল্ল্য বিক্ৰী কৰা বন্ধ কৰিব লাগে।‘
ইপিনে, কংগ্ৰেছ-এআইয়ুডিএফৰ মিত্ৰতাৰ প্ৰসংগত সোধাত ৰকিবুলে কয় ‘বদৰুদ্দিন আজমলৰ লগত বিজেপিৰ সম্পৰ্ক মধুৰ। যি আজমলক গালি পাৰি থাকে তেওঁৱেই মুম্বাইৰ হিমন্ত বিশ্ব শৰ্মাৰ ঘৰত গৈছিল। পঞ্চায়ত নিৰ্বাচনত নগাঁও দৰঙত বিজেপি-এআইয়ুডিএফে মিত্ৰতা কৰি জিলা পৰিষদ দখল কৰিছিল।‘
তেওঁ আৰু কয় ‘বিজেপি-এআইয়ুডিএফৰ সম্পৰ্ক পুৰণা। বিজেপি-এআইয়ুডিএফে হাতত হাত ধৰি ৰাজ্য সভাত দুবাৰকৈ প্ৰাৰ্থী দিছিল। বিজেপিয়ে আনুষ্ঠানিকভাৱে এআইয়ুডিএফৰ লগত মিত্ৰতা কৰিছিল। আমি এতিয়ালৈকে আনুষ্ঠানিকভাৱে কাৰো লগত মিত্ৰতা কৰা নাই।‘