কংগ্ৰেছ নেতা ৰাহুল গান্ধীয়ে আজি শিৱসাগৰত দলৰ নিৰ্বাচনী প্ৰচাৰৰ আৰম্ভণি কৰি কয় যে কংগ্ৰেছ ক্ষমতালৈ আহিলে অসমত কা বলৱৎ হ’বলে নিদিয়ে।
কা-বিৰোধী প্ৰতীকেৰে গামোচা পৰিহিত কংগ্ৰেছ নেতাজনে ভাৰতীয় জনতা পাৰ্টিক কটাক্ষ কৰি কয়- “শুনক হাম দো হামাৰে দো, কা কেতিয়াও বাস্তৱ নহয়।’’
গান্ধীয়ে কয় যে অবৈধ অনুপ্ৰৱেশকাৰীৰ বিষয়টো আলোচনাৰ মাজেৰে সম্ভৱ। এইক্ষেত্ৰত তেওঁ অসম চুক্তিৰ কথা উল্লেখ কৰি কয় যে কোনোবাই যদি ইয়াক অগ্ৰাহ্য কৰি হিংসা বিয়পাব বিচাৰে, তেনেহ’লে কংগ্ৰেছ আৰু অসমবাসী ৰাইজে তেওেলোকক যোগ্য প্ৰত্যুত্তৰ দিব।
উল্লেখযোগ্য যে শনিবাৰে, বিত্তমন্ত্ৰী অমিত শ্বাহে কৈছিল যে দেশজুৰি কৰোনাভাইৰাচ ভেকচিনেচন প্ৰগ্ৰেম শেষ হোৱাৰ পাছতে কা বলবৎ হ’ব।
তদুপৰি তেওঁ অভিযোগ কৰে যে বিজেপি-আৰএছএছে অসমক ভাগ ভাগ কৰিব খুজিছে।
কংগ্ৰেছক ‘জনতাৰ দল’ হিচাপে অভিহিত কৰি গান্ধীয়ে কয় যে তেওঁলোক ক্ষমতালৈ আহিলে বিজেপিয়ে চটিওৱা ঘৃণাৰ ৰাজনীতিক উভালি পেলোৱা হ’ব।
“জাতি, ধৰ্ম, ভাষা, শ্ৰেণী নিৰ্বিশেষে আমি সমাজৰ সকলো লোককে আগুৱাই লৈ যাম আৰু অসমৰ যুৱকসকলৰ বাবে সংস্থাপনৰ ব্যৱস্থা কৰিম’’- গান্ধীয়ে ঘোষণা কৰে।
গান্ধীয়ে কয় যে ৰাজ্যৰ প্ৰাকৃতিক সম্পদ আৰু ৰাজহুৱা খণ্ডসমূহ দেশখনৰ দুজন শীৰ্ষ উদ্যোগপতিক বিক্ৰী কৰি দিয়া হৈছে।
তদুপৰি মোদী চৰকাৰে ‘দুজন উদ্যোগপতি বন্ধু’ক বৃহৎ পৰিমাণৰ লোণ মাফ কৰি কভিদ-১৯ মহামাৰীৰ সময়ত ৰাজহুৱা টকা লুট কৰাৰো কংগ্ৰেছ নেতাজনে অভিযোগ কৰে।
চাহ বাগানৰ শ্ৰমিকসকলৰ মজুৰি সন্দৰ্ভত গান্ধীয়ে ঘোষণা কৰি যে যদি কংগ্ৰেছ ক্ষমতালে আহে তেনেহ’লে তেওঁলোকৰ মজুৰি বৰ্তমানৰ ১৬৭ টকাৰ পৰা ৩৬৫ টকালৈ বৃদ্ধি কৰা হ’ব।
গান্ধীয়ে কয় যে মোদী চৰকাৰে চাহবাগানসমূহ গুজৰাটী ব্যৱসায়ীক গতাই দি শ্ৰমিকসকলৰ শোষণ কৰাৰ সুবিধা দিছে।
মুখ্যমন্ত্ৰী সৰ্বানন্দ সোণোৱালক চোকা সমালোচনা কৰি কয় যে মুখ্যমন্ত্ৰীয়ে নাগপুৰ আৰু দিল্লীৰ কথা শুনে, যদি অসমে সোণোৱালৰ দৰে এজন মুখ্যমন্ত্ৰী লাভ কৰে, তেনেহ’লে অসমবাসীৰ একো লাভ নহ’ব।
এইক্ষেত্ৰত গান্ধীয়ে কয় যে ৰাজ্যখনৰ বাবে এজন “নিজৰ মুখ্যমন্ত্ৰী’’ৰ প্ৰয়োজন, নাগপুৰ অথবা দিল্লীৰ আশীষধন্য মুখ্যমন্ত্ৰীৰ প্ৰয়োজন নাই।
নিৰ্বাচনী সভাখনত গান্ধীয়ে প্ৰাক্তন মুখ্যমন্ত্ৰী তৰুণ গগৈকো সোঁৱৰণ কৰি কয় যে হিংসাত্মক পৰিৱেশ এটাৰ পৰা গগৈয়ে অসমক শান্তিৰ পৰিৱেশ এটালে লৈ আহিছিল।
নিৰ্বাচনী সভাখনত ছট্টিছগড়ৰ মুখ্যমন্ত্ৰী তথা অসমৰ দলীয় পৰ্যবেক্ষক ভূপেশ বাঘেল, কংগ্ৰেছৰ অসমৰ দায়িত্বত থকা জিতেন্দ্ৰ সিং, সাংসদ গৌৰৱ গগৈ, প্ৰদ্যুৎ বৰদলৈ, আব্দুল খালেক, ৰাজ্যিক সভাপতি ৰিপুণ বৰা আৰু অন্যান্য জ্যেষ্ঠ কংগ্ৰেছী নেতাসকলে অংশগ্ৰহণ কৰে।
