গুৱাহাটীৰ ৰাজীৱ ভৱনৰ সন্মুখত শনিবাৰে বিজেপি আৰু কংগ্ৰেছ কৰ্মীৰ মাজত এক উত্তপ্ত পৰিস্থিতিৰ সৃষ্টি হয়। দিল্লীত অনুষ্ঠিত এ আই সন্মিলনত যুৱ কংগ্ৰেছে কৰা প্ৰতিবাদৰ বিৰোধিতা কৰি প্ৰায় দুই শতাধিক বিজেপি আৰু অসম গণ পৰিষদৰ সমৰ্থকে হাতে হাতে দলীয় পতাকা আৰু ৰাহুল গান্ধীৰ বেনাৰ লৈ ৰাজীৱ ভৱনৰ সন্মুখত প্ৰতিবাদ সাব্যস্ত কৰে। প্ৰতিবাদকাৰীসকলে কংগ্ৰেছ মুৰ্দাবাদ শ্ল’গান দিয়াৰ লগতে ৰাহুল গান্ধী আৰু গৌৰৱ গগৈৰ জুমুঠি দাহ কৰে। আনকি কংগ্ৰেছৰ নিৰ্বাচনী প্ৰচাৰ চলোৱা বাহনতো একাংশ প্ৰতিবাদকাৰীয়ে কলা ৰং সানি পৰিস্থিতি অধিক উত্তপ্ত কৰি তোলে। যুৱ মৰ্চাৰ এজন নেতাই অভিযোগ কৰে যে সমগ্ৰ বিশ্বৰ প্ৰতিনিধি উপস্থিত থকা এ আই সন্মিলনৰ সময়ত যুৱ কংগ্ৰেছে দেশক লজ্জানত কৰিছে। তেওঁলোকৰ মতে ৰাহুল গান্ধী আৰু গৌৰৱ গগৈৰ চিন্তাধাৰা দেশৰ সাৰ্বভৌমত্বৰ পৰিপন্থী।
বিজেপিৰ এই প্ৰতিবাদৰ প্ৰত্যুত্তৰ দিবলৈ ৰাজীৱ ভৱনৰ পৰা শতাধিক কংগ্ৰেছ কৰ্মী ওলাই আহে আৰু পৰিৱেশ অধিক উত্তজনাপূৰ্ণ হৈ পৰে। কংগ্ৰেছ কৰ্মীসকলে বিজেপিৰ বিৰুদ্ধে মাটি চোৰ আৰু গৰু চোৰ বুলি শ্ল’গান দিয়াৰ লগতে প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহ আৰু মুখ্যমন্ত্ৰী হিমন্ত বিশ্ব শৰ্মাৰ প’ষ্টাৰ দাহ কৰি প্ৰতিবাদ সাব্যস্ত কৰে। এই প্ৰতিবাদক কেন্দ্ৰ কৰিয়েই আৰক্ষীৰ সৈতে কংগ্ৰেছ কৰ্মীৰ টনা-আঁজোৰা আৰম্ভ হয়। কংগ্ৰেছ কৰ্মীসকলৰ অভিযোগ যে আৰক্ষীয়ে পক্ষপাতিত্বমূলক আচৰণ কৰি বিজেপি কৰ্মীক বাধা দিয়াৰ পৰিৱৰ্তে তেওঁলোককহে আক্ৰোশমূলকভাৱে বাধা দিছে। এই প্ৰতিবাদৰ মাজতে আৰক্ষীয়ে কংগ্ৰেছ কৰ্মীৰ ওপৰত লাঠিচালনা কৰাৰ লগতে চৰ মৰা বুলিও গুৰুতৰ অভিযোগ উত্থাপিত হৈছে।
এই সংঘাতৰ আটাইতকৈ চৰ্চিত দিশটো আছিল ২১ ফেব্ৰুৱাৰী অৰ্থাৎ শনিবাৰে গুৱাহাটীৰ ৰাজীৱ ভৱনৰ সন্মুখত সংঘটিত হোৱা এক অপ্ৰীতিকৰ ঘটনা। কংগ্ৰেছৰ জ্যেষ্ঠ মুখপাত্ৰ ৰাতুল কলিতাক দিশপুৰৰ ডিচিপি মৃণাল ডেকাই চৰ মৰা বুলি জানিব পৰা গৈছে। এ আই সন্মিলনৰ বিৰোধিতাৰ প্ৰতিক্ৰিয়া স্বৰূপে বিজেপিৰ প্ৰতিবাদ চলি থকাৰ সময়তে আৰক্ষীৰ এই কাৰ্যই কংগ্ৰেছ কৰ্মীসকলৰ মাজত তীব্ৰ ক্ষোভৰ সৃষ্টি কৰিছে। দিনটোৰ এই ঘটনাই সমগ্ৰ গুৱাহাটীৰ ৰাজীৱ ভৱন এলেকাত এক প্ৰকাৰৰ যুদ্ধসদৃশ পৰিৱেশৰ সৃষ্টি কৰে আৰু দুয়ো পক্ষৰ মাজত হোৱা এই কাজিয়াই ৰাজনৈতিক মহলত জোকাৰণি তুলিছে।
