অসম প্ৰদেশ কংগ্ৰেছ কমিটিৰ উদ্যোগত আৰম্ভ হোৱা ‘সময় পৰিৱৰ্তনৰ’ যাত্ৰাৰ দ্বিতীয়টো পৰ্যায় আজি যোৰহাট জিলাত উপস্থিত হয়। সভাপতি গৌৰৱ গগৈৰ নেতৃত্বত আৰম্ভ হোৱা এই যাত্ৰাই জিলাখনৰ বিভিন্ন প্ৰান্তত এক উষ্ম সঁহাৰি লাভ কৰা পৰিলক্ষিত হৈছে।
দিনটোৰ কাৰ্যসূচীৰ আৰম্ভণিতে গৌৰৱ গগৈয়ে ঐতিহাসিক শ্ৰীশ্ৰী আঠখেলীয়া নামঘৰত আশীৰ্বাদ গ্ৰহণ কৰে। ইয়াৰ পিছতে তেওঁ তিতাবৰৰ ৰাজীৱ ভৱনত উপস্থিত হৈ প্ৰয়াত প্ৰাক্তন মুখ্যমন্ত্ৰী তৰুণ গগৈৰ প্ৰতিমূৰ্তিত মাল্যাৰ্পণ কৰি শ্ৰদ্ধা নিবেদন কৰে। তিতাবৰত তেওঁক গায়ন-বায়ন, দিহানাম আৰু বিহুৰে আদৰণি জনায় দলীয় কৰ্মীসকলে।
বোকাহোলা বাগান খেলপথাৰত আয়োজিত বিশাল জনসভাত ভাষণ দি গৌৰৱ গগৈয়ে বিজেপি চৰকাৰক ক্ষুৰধাৰ সমালোচনা কৰে। তেওঁৰ ভাষণৰ মূল দিশসমূহ আছিল:
গগৈয়ে কয় যে কংগ্ৰেছৰ আদৰ্শ হ’ল দুখীয়াৰ চকুৰ পানী মচা, কিন্তু বিজেপি কেৱল পুঁজিপতিৰ স্বাৰ্থত ব্যস্ত।
মুখ্যমন্ত্ৰীৰ পৰিয়ালক লক্ষ্য কৰি তেওঁ অভিযোগ কৰে যে এটা বিশেষ পৰিয়ালে আজি ১২ হাজাৰ বিঘা মাটি দখল কৰিছে, আনহাতে সাধাৰণ ৰাইজৰ অৱস্থা দিনক দিনে শোচনীয় হৈছে।
গাঁৱে-ভূঞে বিজেপি চৰকাৰে মদৰ দোকান মুকলি কৰি সমাজ ধ্বংস কৰাৰ অভিযোগ তুলি তেওঁ প্ৰতিশ্ৰুতি দিয়ে যে কংগ্ৰেছ ক্ষমতালৈ আহিলে এই দোকানসমূহ বন্ধ কৰা হ’ব।
যাত্ৰাৰ মাজতে গৌৰৱ গগৈয়ে আগন্তুক নিৰ্বাচনৰ বাবে এটা বিশেষ গীত মুকলি কৰে— “আলি কাটি জালি দিম বৰপীৰা পাৰি দিম/এইবাৰ কংগ্ৰেছ চৰকাৰ আনি দিম”।
সংবাদমেল যোগে তেওঁ চৰকাৰী আঁচনিসমূহক ‘পিঞ্জৰা’ বুলি অভিহিত কৰি কয় যে অৰুণোদয় আঁচনিৰ নামত মহিলাসকলক বিজেপিৰ সভালৈ যাবলৈ বাধ্য কৰোৱা হৈছে। ১২৫০ টকা দি মহিলাসকলৰ বহুমূলীয়া সময় কাঢ়ি লোৱা কাৰ্যক তেওঁ ‘ৰাজত্বৰ মনোভাৱ’ বুলি আখ্যা দিয়ে।
আজিৰ এই কাৰ্যসূচীত গৌৰৱ গগৈৰ সৈতে আছিল বিৰোধী দলপতি দেৱব্ৰত শইকীয়া, প্ৰাক্তন সাংসদ ৰিপুণ বৰা, বিধায়ক ভাস্কৰজ্যোতি বৰুৱা আৰু প্ৰাক্তন বিধায়ক ৰাজীৱলোচন পেগু।
প্ৰদেশ কংগ্ৰেছৰ সূত্ৰই জনোৱা মতে, কাইলৈ এই যাত্ৰা শিৱসাগৰ আৰু ডিমৌত অনুষ্ঠিত হ’ব।
