ঘৰুৱা এলপিজি চিলিণ্ডাৰৰ মূল্য বৃদ্ধিৰ বিৰুদ্ধে কংগ্ৰেছ দলে কেন্দ্ৰৰ মোডী চৰকাৰৰ বিৰুদ্ধে তীব্ৰ প্ৰতিবাদ সাব্যস্ত কৰিছে। কংগ্ৰেছ সভাপতি মল্লিকাৰ্জুন খাৰ্গেয়ে বিজেপি নেতৃত্বাধীন চৰকাৰক তীব্ৰ আক্ৰমণ কৰি কয় যে এই অনিয়ন্ত্ৰিত মূল্যবৃদ্ধিৰ আটাইতকৈ ডাঙৰ ভুক্তভোগী হৈছে দেশৰ সাধাৰণ জনতা। তেওঁ তথ্য দাঙি ধৰি কয় যে কেৱল যোৱা চাৰি মাহৰ ভিতৰত ৰন্ধন গেছৰ দাম ৮৯ টকা বৃদ্ধি পাইছে, যিয়ে সাধাৰণ মানুহৰ কঁকাল ভাঙি দিছে। যোৱা ১২ বছৰত মোডী চৰকাৰে ঘৰুৱা এলপিজিৰ দাম মুঠ ৫৩০ টকা বৃদ্ধি কৰিছে বুলি তেওঁ ক্ষোভ প্ৰকাশ কৰে।
খাৰ্গেয়ে সামাজিক মাধ্যম এক্সৰ এটা পোষ্টৰ জৰিয়তে পুৰণি দিনবোৰ মনত পেলাই দি কয় যে ইউপিএ চৰকাৰৰ সময়ত এইসকল বিজেপি নেতাই মূল্যবৃদ্ধিৰ বিৰুদ্ধে ৰাজপথলৈ ওলাই আহিছিল। তেওঁ প্ৰশ্ন কৰে যে আজি বিজেপিৰ নেতাসকলে গেছ চিলিণ্ডাৰ লৈ ৰাজপথত প্ৰতিবাদ কিয় কৰা নাই। ইয়াৰ উপৰিও কংগ্ৰেছ সভাপতিগৰাকীয়ে প্ৰধানমন্ত্ৰী নৰেন্দ্ৰ মোডীক লক্ষ্য কৰি প্ৰশ্ন কৰে যে সংসদত পশ্চিম এছিয়া যুদ্ধৰ সময়ত ৪১ খন দেশৰ পৰা ইন্ধন বৈচিত্ৰ্যকৰণৰ যিবোৰ ডাঙৰ ডাঙৰ দাবী কৰা হৈছিল, সেইবোৰৰ কি হ’ল। তেওঁ গ্ৰাম্য অঞ্চলত এলপিজিৰ নাটনিৰ প্ৰসংগ উত্থাপন কৰি কয় যে ২০২৫-২৬ বৰ্ষত উজ্জ্বল যোজনাৰ অধীনত থকা ৫.৫৬ কোটি পৰিয়ালে এবাৰো চিলিণ্ডাৰ ৰিফিল কৰিবলৈ সক্ষম হোৱা নাই আৰু ৩.৩০ কোটি পৰিয়ালে দ্বিতীয়বাৰৰ বাবে চিলিণ্ডাৰ ভৰোৱা নাই।
শেহতীয়াকৈ ঘৰুৱা এলপিজি চিলিণ্ডাৰৰ মূল্য আৰু ২৯ টকা বৃদ্ধি পোৱাৰ পিছত দেশৰ ৰাজধানী দিল্লীত ১৪.২ কিলোগ্ৰামৰ এটা চিলিণ্ডাৰৰ মূল্য ৯১৩ টকাৰ পৰা পোনে পোনে ৯৪২ টকা হৈছেগৈ। আনহাতে বিৰোধীৰ এই আক্ৰমণৰ মাজতে পেট্ৰ’লিয়াম আৰু প্ৰাকৃতিক গেছ মন্ত্ৰালয়ে চৰকাৰৰ স্থিতি স্পষ্ট কৰিছে। মন্ত্ৰালয়ৰ তৰফৰ পৰা জাৰি কৰা এক চৰকাৰী বিবৃতিত দাবী কৰা হৈছে যে ভাৰতত ৰন্ধন গেছ চুবুৰীয়া দেশসমূহৰ তুলনাত আজিও বহুত সস্তা। আনকি আমেৰিকা, কানাডা আৰু অষ্ট্ৰেলিয়াৰ দৰে উন্নত দেশৰ তুলনাতো ভাৰতীয় গ্ৰাহকে কম মূল্য ভৰিবলগীয়া হৈছে বুলি মন্ত্ৰালয়ে জনাইছে।
মন্ত্ৰালয়ৰ মতে বজাৰত যোগানৰ খৰচ ১৬০০ টকাতকৈ অধিক হৈছে যদিও দিল্লীৰ সাধাৰণ গ্ৰাহকে ইয়াক লাভ কৰিছে ৯৪২ টকাত। আনহাতে প্ৰধানমন্ত্ৰী উজ্জ্বল যোজনাৰ হিতাধিকাৰীসকলে ৰাজসাহায্যৰ পিছত এই চিলিণ্ডাৰ কাৰ্যক্ষেত্ৰত মাত্ৰ ৬৪২ টকাত লাভ কৰিছে। ইফালে দিল্লীৰ একাংশ সাধাৰণ গ্ৰাহকে এই সন্দৰ্ভত তীব্ৰ অসন্তুষ্টি প্ৰকাশ কৰিছে। দিল্লীৰ হৰকেশ্বৰনগৰৰ শিৱকুমাৰ নামৰ এজন গ্ৰাহকে কয় যে গেছৰ মূল্য বৃদ্ধিৰ বাবে দৰিদ্ৰ লোকৰ ওপৰত বহুত অত্যাচাৰ হৈছে আৰু শ্ৰমিক শ্ৰেণীৰ জীৱন দুৰ্বিষহ হৈ পৰিছে। দিল্লীৰ ওখলাৰ আকিল আহমেদে কয় যে চৰকাৰে দৰিদ্ৰ জনসাধাৰণৰ প্ৰতি লক্ষ্য ৰখা নাই আৰু পূৰ্বতে পোৱা ৰাজসাহায্যও এতিয়া শেষ হৈ গৈছে, যাৰ বাবে কম দৰমহা পোৱা লোকসকলৰ গেছ ক্ৰয় কৰাৰ ক্ষমতা নাইকীয়া হৈ পৰিছে।
