মক্কা দৰ্শনৰ কথা চিন্তা-চৰ্চা কৰি থকা তীৰ্থযাত্ৰীসকলৰ বাবে দুখবৰ। বৃহস্পতিবাৰে চৌদি আৰব চৰকাৰে দেশখনত তীৰ্থযাত্ৰীসকলৰ প্ৰৱেশ সাময়িকভাৱে নিষিদ্ধ কৰাৰ সিদ্ধান্ত লয়।
চীনত মহামাৰী ৰূপ লোৱাৰ পিছত সমগ্ৰ বিশ্বতে আতংকৰ সৃষ্টি কৰা ক’ৰ’না ভাইৰাছৰ প্ৰভাৱ যাতে দেশখনত নপৰে তাৰ বাবেই এই সিদ্ধান্ত লোৱা হৈছে বুলি চৰকাৰে জানিবলৈ দিয়ে।
বৃহস্পতিবাৰে দেশখনৰ বৈদেশিক মন্ত্ৰ্যালয়ে এটা টুইটৰ জৰিয়তে কয়, ‘উমৰাহ (তীৰ্থযাত্ৰা)ৰ উদ্দেশ্যে তথা মেদিনাস্থিত হজৰত মহম্মদৰ মহজিদ দৰ্শনৰ বাবে দেশখনলৈ আহিবলগীয়া দৰ্শনাৰ্থীৰ সাময়িকভাৱে প্ৰৱেশ নিষিদ্ধ কৰা হৈছে’।
ইয়াৰ উপৰি যি সমূহ দেশত ক’ৰ’না ভাইৰাছ ধৰা পৰিছে সেই দেশ সমূহৰ নাগৰিকৰো ভিছা বাতিল কৰাৰ সিদ্ধান্ত লোৱা হৈছে বুলি চৌদি আৰবে জানিবলৈ দিয়ে।
উল্লেখ্য যে ক’ৰ’না ভাইৰাছে বিশ্বৰ সমগ্ৰ লোককে আতংকিত কৰি তুলিছে। ভাৰতৰ লগতে বিশ্বৰ ২৯ খন দেশ এই ভাইৰাছৰ কৱলত পৰিছে।
ভাইৰাছবিধৰ উৎপত্তিস্থল চীনত এই পৰ্যন্ত প্ৰায় ২ হাজাৰৰো অধিক লোকে প্ৰাণ হেৰুওৱাৰ লগতে হাজাৰ-হাজাৰ লোক ইয়াৰ আক্ৰান্ত হৈছে।
