দুবছৰ পূৰ্বে ঐতিহ্যমণ্ডিত কটন কলেজক কটন বিশ্ববিদ্যালয়লৈ উন্নীত কৰাৰ প্ৰৱল বিৰোধিতা হোৱাৰ সময়ত তদান্তীনত শিক্ষা মন্ত্ৰী তথা বিত্ত মন্ত্ৰী হিমন্তই বিশ্ববিদ্যালয়খনক এখন বিশ্বমানৰ উচ্চ শিক্ষাৰ প্ৰতিষ্ঠান কৰিবলৈ অসম চৰকাৰ আগ বাঢ়িছে বুলি ইয়াত বাধা নিদিবলৈ আহ্বান জনাইছিল। কিন্তু মন্ত্ৰীজনৰ কথা যে এটা ফোঁপোলা প্ৰতিশ্ৰুতিহে আছিল সেয়া প্ৰমাণ হৈছে বিশ্ববিদ্যালয়খনৰ ছাত্ৰ একতা সভাই উদঙাই দিয়া তথ্যত।
৭ মাৰ্চত ছাত্ৰ একতা সভাই বিশ্ববিদ্যালয়খনৰ ছুডমাৰ্চন হ’লত সংবাদ মাধ্যমৰ আগত কয় যে বিত্ত মন্ত্ৰীজনে ২০১৬-১৭-অৰ বাজেটত প্ৰতিষ্ঠানটোৰ বাবে ১০০ কোটি ধাৰ্য্য কৰা দেখুৱাই আজিলৈকে এটকাও নিদিলে। ফলত বিশ্ববিদ্যালয়খন এতিয়া চৰম আৰ্থিক সংকটত পৰিছে আৰু সকলো ধৰণৰ উন্নয়ন, আন্তঃগাঁথনিৰ কাম স্তব্ধ হৈ আছে।
আনহাতে ৰাজ্যিক বিশ্ববিদ্যালয়লৈ উন্নীত হোৱাৰ লগে লগে প্ৰতিষ্ঠানটোৰ প্ৰয়োজনৰ তালিকাখন বৃদ্ধি পোৱাৰ বিপৰীতে য়ু জি চিৰ পৰা পোৱা কিছুমান অনুদান পোৱাৰ পৰা বঞ্চিত হৈ আছে।
বিশ্ববিদ্যালয়খনত শিক্ষকৰ ১৪৯টা পদ খালী হৈ আছে। ইয়াৰ ফলত উপযুক্ত পাঠদানৰ পৰা বঞ্চিত হৈ আছে বিশ্ববিদ্যালয়ৰ ছাত্ৰ-ছাত্ৰী। একেদৰে অনা-শিক্ষক কৰ্মচাৰীৰ পদো প্ৰায় ৫০টা খালী হৈ থকা বুলি জনালে ছাত্ৰ একতা সভাৰ সাধাৰণ সম্পাদক প্ৰাঞ্জল কলিতাই।
সেইদৰে প্ৰয়োজন অনুপাতে ছাত্ৰাৱাস, ছাত্ৰীনিৱাসৰ অভাৱ। প্ৰায় ৫৫০০ ছাত্ৰ-ছাত্ৰী থকা বিশ্ববিদ্যালয়খনত প্ৰায় ৫০০গৰাকী ছাত্ৰ-ছাত্ৰীৰ বাবেহে হোষ্টেলৰ আসন আছে। নতুনকৈ হোষ্টেল নিৰ্মাণ আৰু পুৰণিবোৰৰ মেৰামতিৰ বাবে নাই আৰ্থিক অনুদান।
সাধাৰণ সম্পাদক কলিতাই জনোৱা মতে, ছাত্ৰ একতা সভাই চৰকাৰক বিশ্ববিদ্যালয়খনে সন্মুখীন হৈ থকা সমস্যাসমূহ উল্লেখ কৰি এইবোৰ শীঘ্ৰে সমাধান কৰিবলৈ দাবী জনাই চাৰি মাহৰ পূৰ্বে স্মাৰক পত্ৰ দিছিল। তাৰ পিছতো চৰকাৰে কোনো পদক্ষেপ লোৱা নাই। অনতি পলমে সমস্যাবোৰ সমাধান নকৰিলে কটনৰ ছাত্ৰ-ছাত্ৰীয়ে ৰাজপথ অৱৰোধ কৰিবলৈ বাধ্য হ’ব বুলি সকীয়াই দিয়ে ছাত্ৰ একতা সভাই।
