আলফা বিৰোধী অভিযানৰ নামত ১৯৯৪ চনৰ তিনিচুকীয়াত সেনাবাহিনীয়ে চলোৱা ভুৱা এনকাউণ্টাৰৰ গোচৰ বৃহস্পতিবাৰে বন্ধ ঘোষণা কৰিলে গুৱাহাটী উচ্চ ন্যায়ালয়ে। ন্যায়াধীশ অচিন্ত্য মল্ল বুজৰ বৰুৱা আৰু ন্যায়াধীশ ৰবিন ফুকনৰ বিভাগীয় বিচাৰপীঠে লগতে এই ভুৱা এনকাউণ্টাৰত সেনাই হত্যা কৰা পাঁচগৰাকী যুৱকৰ পৰিয়ালক ২০ লাখ টকাকৈ ক্ষতিপূৰণ দিবলৈ কেন্দ্ৰক নিৰ্দেশ দিয়ে।
উল্লেখ্য যে, আলফাই ১৯৯৪ চনৰ ফেব্ৰুৱাৰীত তিনিচুকীয়াৰ ডাংগৰী অঞ্চলৰ তালাপ চাহ বাগিচাত অসম সীমান্ত চাহ লিমিটেডৰ জেনেৰেল মেনেজাৰ ৰামেশ্বৰ সিঙক হত্যা কৰাৰ পিছতে তীব্ৰ অভিযান আৰম্ভ কৰিছিল ভাৰতীয় সেনাই।
এই আলফা দমন অভিযানৰ নামতে সেনাই ১৭-১৯ ফেব্ৰুৱাৰীত জিলাখনৰ বিভিন্ন স্থানৰ পৰা সদৌ অসম ছাত্ৰ সন্থাৰ ৯ গৰাকী কৰ্মীক সন্দেহযুক্ত হিচাপে আটক কৰে। ভাৰতীয় সেনাৰ ধলা শিবিৰত আলফাৰ সন্দেহত ধৰি অনা এই যুৱকসকলক ৰখোৱা হৈছিল।
কিন্তু নিশাৰ ভিতৰতে এই ৯ গৰাকী নিৰীহ যুৱকৰ ভিতৰত পাঁচগৰাকীক ডিব্ৰু-ছৈখোৱা সংৰক্ষিত বনাঞ্চলত গুলীয়াই হত্যা কৰা হয়। ইফালে যুৱক কেইগৰাকীৰ অৱস্থান সন্দৰ্ভত কোনো তথ্য নোপোৱাত আছুৰ তদানীন্তন উপ-সভাপতি জগদীশ ভূঞাই গুৱাহাটী উচ্চ ন্যায়ালয়ত হাবিয়াছ কৰ্পাছ আবেদন বা বন্দী প্ৰত্যক্ষ দৰ্শন আবেদন দাখিল কৰে।
জগদীশ ভূঞাৰ আবেদনৰ শুনানি গ্ৰহণ কৰি মুখ্য ন্যায়াধীশ এছ.এন. ফুকন আৰু ন্যায়াধীশ এ. পাটনাইকে ধৃত যুৱককেইগৰাকীক নিকটতম থানাত যুৱককেইগৰাকীক হাজিৰ কৰিবলৈ সেনাবাহিনীক নিৰ্দেশ দিয়ে। কিন্তু ইতিপূৰ্বেই সেনাই পাঁচ যুৱকক হত্যা কৰাৰ পৰিপ্ৰেক্ষিতত চাৰিগৰাকী জীৱিত লোকৰ লগতে পাঁচগৰাকীৰ মৃতদেহ আৰক্ষী থানাত গতাই দিয়ে।
সেনাই হত্যা কৰা এই পাঁচগৰাকী নিৰীহ যুৱক আছিল ক্ৰমে প্ৰবীণ সোণোৱাল, প্ৰদীপ দত্ত, দেৱজিত বিশ্বাস, অখিল সোণোৱাল আৰু ভবেন মৰাণ। আলফা কেডাৰ বুলি দাবী কৰি সেনাই চলোৱা এই হত্যাকাণ্ডৰ বিৰুদ্ধে ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছিল।
ৰাজ্যজুৰি হোৱা প্ৰতিবাদৰ পিছতে গোচৰটো কেন্দ্ৰীয় তদন্তকাৰী সংস্থা চিবিআইক গতাই দিয়া হয় আৰু তদন্তকাৰী সংস্থাটোৱে তদন্তৰ পিছত ভুৱা এনকাউণ্টাৰত জড়িত ১৮ পঞ্জাব ৰেজিমেণ্টৰ ৭ গৰাকী সেনা জোৱানৰ বিৰুদ্ধে অভিযোগনামা দাখিল কৰে।
২০১৮ চনৰ অক্টোবৰ মাহত ছামাৰী জেনেৰেল কোৰ্ট মাৰ্শ্বেলে এই সাতগৰাকী সেনা জোৱানক দোষী সাব্যস্ত কৰি যাৱজ্জীৱন কাৰাদণ্ডৰ শাস্তি প্ৰদান কৰিছিল। দোষী সাব্যস্ত হোৱা জোৱান কেইগৰাকী আছিল মেজৰ জেনেৰেল এ কে লাল, কৰ্ণেল থমাছ মেথিউ আৰু আৰ এছ ছিবিৰেন, জুনিয়ৰ কমিচনড অফিচাৰ আৰু নন কমিচনড অফিচাৰ দিলীপ সিং, জগদেও সিং, আলবিন্দৰ সিং আৰু শিবেন্দৰ সিং।
সেনাই চলোৱা এই নৃশংস হত্যাকাণ্ডৰ ২৯ বছৰ পিছত বৃহস্পতিবাৰে গুৱাহাটী উচ্চ ন্যায়ালয়ে এই পুৰণি গোচৰ বন্ধ কৰাৰ সিদ্ধান্ত লয়। গোচৰৰ প্ৰমাণ বা সাক্ষী উদ্ধাৰ কৰাৰ কঠিনতালৈ লক্ষ্য ৰাখি আদালতে এই গোচৰটো বন্ধ কৰাৰ সিদ্ধান্ত লৈছে। আদালতে লগতে তিনিচুকীয়াৰ জিলা ন্যায়াধীশক হত্যাৰ বলি হোৱা যুৱককেইগৰাকীৰ আত্মীয়ক চিনাক্ত কৰিবলৈ নিৰ্দেশ দিছে।
উচ্চ ন্যায়ালয়ৰ নিৰ্দেশাৱলী অনুসৰি নিহত পাঁচ যুৱকৰ পৰিয়াল তথা আত্মীয়ই ১৫ দিনৰ ভিতৰত আদালতৰ সন্মুখত উপস্থিত হ’ব লাগিব। ক্ষতিপূৰণৰ ধনৰাশি উচ্চ ন্যায়ালয়ত জমা কৰা হ’ব আৰু জিলা ন্যায়াধীশে চিনাক্ত কৰা অনুসৰি ভুক্তভোগীৰ পৰিয়ালক প্ৰদান কৰা হ’ব বুলি আদালতে লগতে উল্লেখ কৰে।
