দৰঙৰ দহজন ব্যক্তিৰ স্বব নমুনা ক’ভিড-১৯ পৰীক্ষাৰ বাবে দেওবাৰে গুৱাহাটীলৈ প্ৰেৰণ কৰা হৈছে।
এই আটাইকেইজন ব্যক্তিৰ গুৱাহাটীৰ আঠগাওঁ মছজিদৰ ধৰ্মীয় সভাৰ সৈতে সম্পৰ্ক আছে। তেওঁলোক ক’ভিড-১৯ পজিটিভ ৰোগীৰ সংস্পৰ্শলৈ আহিছিল।
গুৱাহাটী চিকিৎসা মহাবিদ্যালয় আৰু হস্পিটেলত তেওঁলোকৰ নমুনা পৰীক্ষা কৰা হ’ব আৰু সোমবাৰে ফলাফল পোৱা যাব বুলি আশা কৰা হৈছে।
দৰঙৰ স্বাস্থ্য বিভাগৰ মিডিয়া কমিউনিকেচন অফিচাৰ নিৰ্মল কুমাৰ বেৰিয়াই নৰ্থইষ্ট নাওত এই তথ্য সদৰী কৰিছে।
খাৰুপেটীয়া প্ৰাথমিক স্বাস্থ্য কেন্দ্ৰত উক্ত দহজন লোকৰ চাৰিজনক আৰু ছিপাঝাৰ প্ৰাথমিক স্বাস্থ্য কেন্দ্ৰ আৰু মঙলদৈৰ জনাৰাম চৌকা মডেল হস্পিটেলত তিনিজনকৈ কুৱাৰেণ্টাইন কৰি ৰখা হৈছে।
স্বাস্থ্য বিভাগৰ বিষয়াগৰাকীয়ে জনোৱা মতে শনিবাৰৰ পৰা ব্যক্তিকেইজনক কুৱাৰেণ্টাইন কৰা হৈছে।
গুৱাহাটীৰ আঠগাওঁ মছজিদক ইতিমধ্যে ১৪দিনৰ বাবে ছীল কৰি অঞ্চলটোক কণ্টেইনমেণ্ট জ’নৰূপে ঘোষণা কৰা হৈছে।
আঠগাওঁ মছজিদত সভা কৰা তিনিজন ব্যক্তিক ইতিমধ্যে ক’ভিড-১৯ পজিটিভ পোৱা গৈছে।
ধুবুৰীতো শনিবাৰে ১৯গৰাকী ব্যক্তিক কুৱাৰেণ্টাইন কৰা হৈছে। এই আটাইকেইগৰাকী ব্যক্তিয়ে আঠগাওঁ মছজিদত ধৰ্মীয় সভা অনুষ্ঠিত কৰা ক’ভিড-১৯ ৰোগীকেইগৰাকীৰ সংস্পৰ্শলৈ আহিছিল।
আঠগাওঁ মছজিদৰ ধৰ্মীয় সভাত কমেও এশগৰাকী ব্যক্তিয়ে ভাগ লোৱা বুলি প্ৰকাশ পাইছে।
পিছত ইয়াৰে একাংশ ব্যক্তিয়ে বিলাসীপাৰাৰ এটা মছজিদতো সভা অনুষ্ঠিত কৰিছিল। সেই মছজিদটোকো ইতিমধ্যে প্ৰশাসনে ছীল কৰিছে।
