ক’ৰ’ণাৰ ভেকচিন লোৱাৰ দুসপ্তাহ পিছতে ক’ৰ’ণাত আক্ৰান্ত হোৱা হাৰিয়ানাৰ স্বাস্থ্যমন্ত্ৰী অনিল ভিজৰ অৱস্থা সংকটজনক হৈ পৰিছে।
কিছুদিন পূৰ্বে হাৰিয়ানাৰ স্বাস্থ্য মন্ত্ৰী গৰাকীয়ে ভাৰত বায়’টেকৰ ক’ৰ’ণা ভাইৰাছৰ ভেকচিন গ্ৰহণ কৰিছিল।
ক’ৰ’ণাৰ ভেকচিন গ্ৰহণৰ দুসপ্তাহ পিছতে হাৰিয়ানাৰ স্বাস্থ্যমন্ত্ৰী গৰাকী ক’ৰ’ণাত আক্ৰান্ত হৈছিল। ইয়াৰ পিছতে তেওঁক চিকিৎসালয়ত ভৰ্তি কৰোৱা হৈছিল যদিও যোৱা নিশা তেওঁৰ স্বাস্থ্যৰ অৱস্থা অতি সংকটজনক হৈ পৰাত গুৰুগ্ৰামৰ মেডান্ত চিকিৎসালয়ত ভৰ্তি কৰোৱা হয়।
চিকিৎসালয় সূত্ৰই প্ৰকাশ কৰা মতে মন্ত্ৰী ভিজৰ ফুছফুছত সংক্ৰমণ হৈছে আৰু তেওঁৰ স্বাস্থ্যৰ অৱস্থা বৰ্তমান অতি সংকটজনক।
ক’ৰ’ণা ভাইৰাছৰ ভেকচিন পৰীক্ষামূলক ভাবে গ্ৰহণ কৰাৰ পিছতো মন্ত্ৰী অনিল ভিজ কিয় পুনৰ ক’ৰ’ণাত আক্ৰান্ত হ’ল তাকে লৈ এতিয়া বিভিন্ন মহলত সন্দেহৰ সৃষ্টি হৈছে।
ক’ৰ’ণা ভাইৰাছৰ ভেকচিনে মানুহক সঁচাকৈয়ে ভাইৰাছ বিধৰ পৰামুক্ত কৰিব পাৰিবনে নে নাই তাকে লৈ এতিয়া বহুতৰ চিন্তা হৈছে।
হাৰিয়ানাৰ স্বাস্থ্য মন্ত্ৰী অনিল বিজৰ আশু আৰোগ্য কামনা কৰি ৰাজ্য খনৰ বহু লোকে প্ৰাৰ্থনা কৰা বুলি জানিব পৰা গৈছে।