এক বীভৎস তথা মানৱ সমাজক লজ্জানত কৰা ঘটনা সংঘটিত হৈছে কেৰালাত। ক’ভিড-১৯ত আক্ৰান্ত এগৰাকী ১৯ বছৰীয়া যুৱতীক এজন এম্বুলেন্স চালকে ধৰ্ষণ কৰা ঘটনাই দেশজুৰি চাঞ্চল্যৰ সৃষ্টি কৰিছে।
জানিব পৰা মতে, ক’ভিড-১৯ত আক্ৰান্ত যুৱতীগৰাকীক চিকিৎসাৰ বাবে ঘৰৰ ওচৰৰে পাঠানামথিট্টা ক’ভিড চেণ্টাৰলৈ লৈ যোৱা অৱস্থাত এম্বুলেন্সৰ চালকজনে ধৰ্ষণ কৰে।
এই ঘটনা সংঘটিত হোৱাৰ পিছতে যুৱতীগৰাকীৰ মাতৃৰ অভিযোগৰ ভিত্তিত এম্বুলেন্সৰ চালকজনক দেওবাৰে আটক কৰে আৰক্ষীয়ে।
অভিযুক্ত ধৰ্ষণকাৰী চালকজন ২৯ বছৰীয়া নৌফাল বুলি চিনাক্ত কৰা হৈছে।
ইফালে এই ঘটনা পোহৰলৈ অহাৰ পিছতে এম্বুলেন্সৰ চালকজনক চাকৰিৰ পৰা বৰ্খাস্ত কৰা হয় বুলি কানিভু ১০৮ এম্বুলেন্স চাৰ্ভিছৰ পৰা জানিবলৈ দিয়ে।
এই জঘন্য ঘটনাটো শনিবাৰে আৰানমূলাত সংঘটিত হয় বুলি জনাই আৰক্ষীয়ে।
ঘটনাৰ সবিশেষ সন্দৰ্ভত ছোৱালীজনীৰ ভাষ্য সংগ্ৰহ কৰা হৈছে বুলিও আৰক্ষীয়ে প্ৰকাশ কৰে।
উল্লেখ্য যে কিছুদিন পূৰ্বে ত্ৰিপুৰাতো এই ধৰণৰ ঘটনা সংঘটিত হৈছিল। য’ত ক’ভিড কেয়াৰ চেণ্টাৰত কৰ্মৰত চাফাই কৰ্মীয়ে দুগৰাকী যুৱতীক নিৰ্যাতন চলাইছিল।
ইয়াৰ উপৰি ক’ৰ’না মহামাৰীৰ এই দুৰ্যোগৰ সময়ত দেশৰ বিভিন্ন ক’ভিড কেয়াৰ চেণ্টাৰত যুৱতীসকলক নিৰ্যাতন চলোৱাৰ অভিযোগ উত্থাপন হৈ আহিছে।