ব্যাপকভাৱে কোভিড বিধি উলংঘন : নাই মুখত মাস্ক, বেংক-দোকান-পোহাৰতো নাই সামাজিক দূৰত্ব
ৰাজ্যত ভায়াৱহভাৱে কোভিড১৯ ৰ সংক্ৰমণ বৃদ্ধি পোৱাৰ সমান্তৰালভাৱে তামুলপুৰ মহকুমাৰ বিভিন্ন ঠাইত বৃদ্ধি পাইছে কোভিডৰ সংক্ৰমণ।
কোভিড১৯ এ সমগ্ৰ ৰাজ্যখনত ভয়াবহ ৰূপ লৈ বহু লোকৰ প্ৰাণ কাঢ়ি নিয়াৰ পিছতো কিন্তু এতিয়াও তামুলপুৰ মহকুমাত সজাগ হোৱা নাই একাংশ লোক। একাংশ লোকে আজি তামুলপুৰ মহকুমা সদৰৰ বিভিন্ন বিত্তীয় প্ৰতিষ্ঠান, দোকান-পোহাৰ আদিত কভিড১৯ প্ৰট’কল ভংগ কৰি সমবেত হোৱা কাৰ্যই সচেতন মহলক শংকিত কৰি তুলিছে।
একাংশ লোকে আজি তামুলপুৰ মহকুমা সদৰৰ ইউকো বেংক, অসম গ্ৰামীণ বিকাশ বেংকৰ সম্মুখত, কাপোৰৰ দোকানত, বিভিন্ন ব্যৱসায়িক প্ৰতিষ্ঠানৰ লগতে ৰাস্তাই ঘাটে মাস্ক নিপিন্ধাকৈ বা মাক্সখন ঠুতুৰিত আঁৰি লৈ আৰু সামাজিক দূৰত্ব নমনাকৈ ঘূৰি ফুৰা কাৰ্যই তামুলপুৰলৈ বিপদ মাতি অনা পৰিলক্ষিত হৈছে আৰু সমগ্ৰ তামুলপুৰ মহকুমাত গণ সংক্ৰমণৰ তীব্ৰ আশংকাই দেখা দিছে।
উল্লেখ্য যে সোমবাৰৰ দিনটোত বাক্সা জিলাত নতুনকৈ ৭৮ গৰাকী লোক কোভিড ১৯ ত আক্ৰান্ত হৈছিল আৰু এই ৭৮ গৰাকী কোভিড ১৯ ত আক্ৰান্তৰ ভিতৰত তামুলপুৰ খণ্ড প্ৰাথমিক চিকিৎসালয়ৰ অধীনৰ তামুলপুৰ, কুমাৰীকাটা আৰু নাগ্ৰীজুলিত আক্ৰান্ত ২৬ গৰাকী লোক আছে।
বুধবাৰেও তামুলপুৰত ১৫ গৰাকী, কুমাৰীকাটাত চাৰি গৰাকী আৰু নাগ্ৰীজুলিত ৭ গৰাকী সহ মুঠ ২৬ গৰাকী লোকৰ দেহত কোভিড ১৯ ৰ সংক্ৰমণ ধৰা পৰিছে।
অৰ্থাৎ বিগত ৩৬ ঘণ্টাৰ ভিতৰত তামুলপুৰ, কুমাৰীকাটা আৰু নাগ্ৰীজুলিত মুঠ ৫২ গৰাকীকৈ লোক কোভিড ১৯ ত আক্ৰান্ত হৈছে।
ইপিনে সমগ্ৰ বাক্সা জিলাত আজি নতুনকৈ ৫২ গৰাকীকৈ লোক আক্ৰান্ত হৈছে আৰু বাতৰি লিখাৰ পৰলৈকে জিলাখনত মুঠ ৪২১ গৰাকীৰ দেহত কভিড ১৯ সংক্ৰিয় হৈ আছে। জিলা খনত এতিয়ালৈকে ৮ গৰাকী লোক কোভিডত আক্ৰান্ত হৈ মৃত্যু হৈছে।
কোভিড ১৯ ৰ এনে ভয়াৱহ সংক্ৰমণৰ পিছতো তামুলপুৰ মহকুমা সদৰত একাংশ লোক আৰু ব্যৱসায়ীয়ে চৰকাৰী নীতি নিৰ্দেশনাক বুঢ়া আঙুলি দেখুৱাই ব্যৱসায়িক প্ৰতিষ্ঠানত ব্যৱসায় চলোৱাৰ লগতে আন একাংশই বাটে ঘাটে ঘুৰি ফুৰা কাৰ্যই তামুলপুৰ মহকুমাত বৃহৎ গণ সংক্ৰমণৰ আশংকা আৰু অধিক তীব্ৰতৰ কৰি তুলিছে।
এই ক্ষেত্ৰত তামুলপুৰ আৰক্ষী প্ৰশাসনে নিৰ্লিপ্ত ভুমিকা গ্ৰহণ কৰাৰ গুৰুতৰ অভিযোগ উত্থাপন কৰিছে তামুলপুৰৰ একাংশ সচেতন নাগৰিকে।
কোভিড ১৯ ৰ বিধি ভংগকাৰী সকলৰ বিৰুদ্ধে কঠোৰ স্থিতি গ্ৰহণ কৰাৰ বাবেও স্থানীয় সচেতন ৰাইজে আৰক্ষী প্ৰশাসনক অনুৰোধ জনাইছে।