অসম-অৰুণাচল সীমান্তৰ বিশ্বনাথৰ শামুক জুলি নামৰ এখন গাঁও। য’ত গাঁওবাসীয়ে বছৰ বছৰ ধৰি বঞ্চিত হৈ আছে উন্নত স্বাস্থ্য সেৱাৰ পৰা। অঞ্চলটোত আজিলৈ স্থাপন কৰা নহ’ল এটা স্বাস্থ্য কেন্দ্ৰ। যাৰ ফলত অঞ্চলটোৰ জনসাধাৰণে চিকিৎসা গ্ৰহণৰ বাবে প্ৰায় ২৫ কিলোমিটাৰ নিলগৰ বিশ্বনাথ মহকুমা অসামৰিক চিকিৎসালয়লৈ যাবলগীয়া হয়।
উল্লেখ্য যে অঞ্চলটোত এখনো স্বাস্থ্য কেন্দ্ৰ স্থাপন নকৰাত দীৰ্ঘ দিনৰ পৰাই স্থানীয় লোকসকল উন্নত চিকিৎসা সেৱা লাভৰ পৰা বঞ্চিত হৈ আহিছে। তেনে স্থলত বৃহস্পতিবাৰে বিশ্বনাথৰ শামুক জুলি গাঁৱত চি আৰ পি এফৰ ৩০ নং বেটেলিয়নৰ কমাণ্ডেণ্ট (Commandant) দিনেশ সিং ছন্দেলে এটা এদিনীয়া স্বাস্থ্য শিৱিৰৰ উদঘাটন কৰে।
বিভিন্ন সময়ত চি আৰ পি এফে উক্ত অঞ্চলটোত চিভিল একশ্যন প্ৰ’গ্ৰাম (CIVIL ACTION PROGRAM) ৰ জৰিয়তে জনসাধাৰণৰ মাজত সু-সম্পৰ্ক গঢ়ি তোলাৰ বাবে অনুস্থিত কৰি আহিছে বিভিন্ন সামাজিক অনুষ্ঠান। আৰু ইয়াৰ লগত সংগতি ৰাখিয়ে কালি উক্ত এদিনীয়া স্বাস্থ্য শিবিৰ অনুষ্ঠানটো অনুষ্ঠিত হয়।
এই স্বাস্থ্য শিৱিৰটো অনুষ্ঠিত কৰাৰ বাবে অঞ্চলটোৰ স্বাস্থ্য সেৱাৰ পৰা বঞ্চিত বহু লোকে স্বাস্থ্য পৰীক্ষা কৰাৰ বাবে ওলাই আহে। ৰাতিপুৱা ১০ বজাৰ অনুষ্ঠিত হোৱা এই স্বাস্থ্য শিৱিৰত উপস্থিত হয় কন-কন শিশুৰ পৰা বৃদ্ধলৈকে। এনে এক সমস্যাৰে জৰ্জৰিত অঞ্চলত কেন্দ্ৰীয় ৰিজাৰ্ভ পুলিচৰ অনুষ্ঠানটিক ধন্যবাদ জনাইছে স্থানীয় ৰাইজে।
প্ৰশ্ন হয় যে পাভৈ পঞ্চায়তৰ অন্তৰ্গত এনে এখন সীমান্তৱৰ্তী এলেকাত বাৰম্বাৰ বিভাগীয় কৰ্তৃপক্ষক সমস্যা সন্দৰ্ভত ৰাজহুৱা আবেদন নিবেদন কৰাৰ পাছতো আজি পৰ্য্যন্ত ৰাজ্য চৰকাৰে এখন স্বাস্থ্য কেন্দ্ৰ নিৰ্মাণ নকৰাত স্থানীয় ৰাইজ ক্ষুব্ধ হৈ পৰিছে।
“কেতিয়া সাৰ পাব ৰাজ্য চৰকাৰ নে চিকিৎসা সেৱাৰ পৰা সদায় এইদৰে বঞ্চিত হৈ থাকিব অঞ্চলবাসী?” শামুক জুলিবাসীৰ মনত এতিয়া উদয় হৈছে এই প্ৰশ্নৰ।
