পহলগামৰ সন্ত্ৰাসবাদী আক্ৰমণৰ পাছতে বিভিন্ন প্ৰতিবন্ধকতা আৰোপ কৰিছে পাকিস্তানৰ ওপৰত। বাদ পৰিযোৱা নাই ভাৰতত বাস কৰা পাকিস্তানী নাগৰিকো। জম্মু-কাশ্মীৰ উচ্চ ন্যায়ালয়ত এজন কেন্দ্ৰীয় সংৰক্ষিত আৰক্ষী বাহিনীৰ জোৱানে তেওঁৰ পাকিস্তানী পত্নীক ভাৰতৰ পৰা বিতাড়িত হোৱাৰ পৰা ৰক্ষা কৰিবলৈ গোচৰ ৰুজু কৰিছে।
পহলগাম কাণ্ডৰ পাছত ভাৰতে পাকিস্তানী নাগৰিকৰ হ্ৰস্বম্যাদী ভিছা বাতিল কৰাৰ সিদ্ধান্ত লৈছে, যাৰ বাবে ভাৰতীয় সেনা জোৱান জনৰ পত্নীৰ ভিছাৰ ম্যাদ শেষ হৈছে। প্ৰকাশিত তথ্য অনুসৰি দম্পতীহালে পত্নীৰ দীৰ্ঘম্যাদী ভিছাৰ আবেদন মঞ্জুৰ কৰাৰ অনুৰোধ জনাইছে। উচ্চ ন্যায়ালয়ৰ ন্যায়াধীশ ৰাহুল ভাৰতীয়ে কেন্দ্ৰীয় চৰকাৰ আৰু জম্মু-কাশ্মীৰ চৰকাৰক ১০ দিনৰ ভিতৰত নিজৰ স্থিতি দাখিল কৰিবলৈ নিৰ্দেশ দিছে।
বৰ্তমান পাকিস্তানী নাগৰিক হিচাপে ভাৰতত আছে মহিলাগৰাকী, আৰু তেওঁৰ ভিছাৰ ম্যাদ ইতিমধ্যে শেষ হৈ গৈছে বুলি সদৰী কৰিছে। আদালতে জনোৱা মতে, তেওঁক দীৰ্ঘম্যাদী ভিছা প্ৰদান কৰা হ’ব নে নহয়, সেই সিদ্ধান্ত কেন্দ্ৰীয় চৰকাৰে ল’ব। এই গোচৰৰ পৰৱৰ্তী শুনানিৰ দিন ১৪ মে’ত ধাৰ্য কৰিছে। এই ঘটনাই ভাৰত-পাকিস্তান সম্পৰ্কৰ প্ৰেক্ষাপটত আইনী আৰু কূটনৈতিক জটিলতা সন্দৰ্ভত এক নতুন আলোচনাৰ সূচনা কৰিছে।
মহিলাগৰাকী হ্ৰস্বম্যাদী টুৰিষ্ট ভিছাৰে ভাৰতলৈ আহিছিল, যাৰ ম্যাদ ২২ মাৰ্চত শেষ হৈছে। ভিছাৰ ম্যাদ উকলি যোৱাৰ পিছত তেওঁক ‘এগজিট পাৰ্মিট’ প্ৰদান কৰা হৈছিল, কিন্তু সেইটোও বাতিল কৰা হৈছে বুলি অবেদনকাৰীৰ অধিবক্তাই জনাইছে। দম্পতীহালে দাবী কৰিছে যে তেওঁলোক অনলাইনত বিবাহৰ পঞ্জীয়ন কৰিছিল কিন্তু বিবাহৰ প্ৰমাণ পত্ৰত নিৰ্দিষ্ট স্থানৰ উল্লেখ থকাৰ বাবে আদালতে এই বিবাহৰ আইনগত স্বীকৃতিৰ ওপৰত প্ৰশ্ন উত্থাপন কৰিছে। ন্যায়াধীশৰ মতে, এই বিষয়ত কেন্দ্ৰীয় চৰকাৰৰ মতামত অতি গুৰুত্বপূৰ্ণ।
