কাছাৰ জিলাত নিয়োজিত কেন্দ্ৰীয় সংৰক্ষিত আৰক্ষী বাহিনীৰ এজন জোৱান শিবিৰৰ পৰাই হৈছে নিৰুদ্দেশ।
জোৱানগৰাকীৰ নিৰুদ্দেশক কেন্দ্ৰ কৰি সৃষ্টি হৈছে চাঞ্চল্যৰ। নিৰুদ্দিষ্ট জোৱানজনক ৰাম সিং শ্যাম বুলি চিনাক্ত কৰা হৈছে।
মধ্যপ্ৰদেশৰ বাসিন্দা ৰাম সিং শ্যামক কেইবাবছৰ ধৰি দয়াপুৰ চি আৰ পি এফ শিবিৰত নিযুক্তি দিয়া হৈছিল।
যোৱা ৩১ ডিচেম্বৰত ব্যক্তিগত কামৰ বাবে ওলাই অহাৰ পিছতে তেওঁ নিৰুদ্দেশ হোৱা বুলি জানিব পৰা গৈছে।
প্ৰকাশিত খবৰ অনুসৰি, সেইদিনা বিয়লি প্ৰায় ৪:৩০ বজাত শ্যামে ঘৰৰ কোনো সামগ্ৰী কিনিবলৈ ওলাই গৈছিল।
সেই সময়ত তেওঁৰ পত্নী আৰু সন্তানো আছিল ঘৰত। কিন্তু কেইবা ঘণ্টাৰ পিছতো তেওঁ ঘৰলৈ উভতি নোযোৱাত চিন্তিত হৈ পৰে পৰিয়াল।
তাৰ পিছতে শ্যামৰ পত্নীয়ে শিবিৰৰ বিষয়াসকলক এই বিষয়ে সদৰী কৰে।
কিন্তু তাৰ পিছতো শ্যামৰ সন্ধান নাপাই চি আৰ পি এফে স্থানীয় আৰক্ষী থানাত তেওঁৰ নিৰুদ্দেশৰ ৰিপ’ৰ্ট দাখিল কৰে।
আৰক্ষীয়ে ইতিমধ্যে এই গোচৰৰ তদন্ত কৰিছে আৰু চিচিটিভিৰ ফুটেজ পৰীক্ষা কৰি তেওঁৰ সন্ধান অব্যাহত ৰাখিছে বুলি সদৰী কৰে।
